Ирыстон курдиæттæй цух никуы уыд. Зæрдæйæн æхсызгондæр ноджы уый вæййы, æмæ хистæр фæлтæрæн кæй ис, сомбон ныфсджынæй сæ фарсмæ чи æрлæудзæн, ахæм кæстæртæ. Уыцы ныфсдæттæг цаутæн арæх вæййæм æвдисæн, алыгъуызон конкурстæ æмæ фестивалты нæ кæстæртæ размæ уæндон къахдзæф куы акæнынц, уæд. Æрæджы та нæ курдиатджын суинæгтæ дыууæйæ фесты номхæссæн сæ диссаджы арæхстдзинад æмæ аивадон æнтыстæй.
Бæрæг куыд у, афтæмæй 24-27 марты Кæсæг-Балхъары сæйраг горæт Налцыччы уагъд цыд 4-æм Æхсæнадæмон конкурс аивады æндæр æмæ æндæр хуызтæй. Ацы конкурсы хайад райсынмæ фæхуыдтой Цхинвалы музыкалон ахуыргæнæндоны дæр, уый тыххæй сæм конкурс ауадзыны уагæвæрд æрæрвыстой марты райдианы. Кæй зæгъын æй хъæуы, ахæм ахсджиаг мадзалы хайад райсын коллектив банымадта æнæмæнгхъæуæгыл, стæй бæрндзинад дæр æнкъардæуыд, цæмæй дзы аивады æндæр дæсныты ‘хсæн бацахстаиккой аккаг бынат. Цхинвалы музыкалон ахуыргæнæндоны директор Гæджиты Жаннæ куыд загъта, афтæмæй конкурс уагъд æрцыд Артийскы дунеон комитеты министрад, Уæрæсейы Артийскы националон комитет, Гнесинты номыл Уæрæсейы музыкæйы академи, Кавказы сфæлдыстады Æхсæнадæмон Академи æмæ Налцыччы бынæттон администрацийы культурæйы управленийы хъæппæрисæй. Оргкомитеты сæрдар æмæ Вице-Президент уыд Адыгей, Хъæрæсе-Черкесийы, Дагъыстан, Абхаз, Хуссар Ирыстон æмæ Мæхъæлы аивæдты сгуыхт архайæг, Уæрæсейы литературон преми «Золотой орел»-ы лауреат, «Петр Великий»-ы ордены кавалер æмæ «Адæмты хæлардзинад»-ы ордены хицау Бетуганов А.А.
Музыкалон ахуыргæнæндоны директор Гæджиты Жаннæ æмæ коллектив бæстон ахъуыды кодтой æмæ конкурсмæ афæндараст кодтой, сæ зæрдæ æппæты тынгдæр кæуыл дардтой, уыцы ахуыргæнинæгты. Уыдон та сты музыкалон скъолайы 5-æм къласы ахуыргæнинаг академион вокалæй Быценты Аннæ-Мария æмæ музыкалон ахуыргæнæндоны адæмон инструментты 4-æм курсы ахуыргæнинаг Дудайты Константин. Хицæнтæй цалдæр ныхасы зæгъын æмбæлы ацы дыууæ хайадисæджы тыххæй. Быценты чызгæн ис рæсугъд хъæлæс, адæймаг ын йæ зардмæ хъусынæй нæ фефсæды, аивадæн табугæнджыты æрбахоны йæхимæ. Цæттæ йæ кæны музыкалон ахуыргæнæндоны директор, педагог Гæджиты Жаннæ. Аннæ-Мария иттæг хорз сæххæст кодта уырыссаг автор Петровы романс. Дудайты Константин та йæ ахуыр райдыдта Битеты Павелы но-мыл Цхинвалы 2-æм музыкалон скъолайы, гуымсæгыл цæгъдын æй ахуыр кодта Хъазиты Гоча. Уыцы рæстæджы цахæм ахуыргæнинаг уыд, уый фæбæрæг ацы конкурсы дæр. Кæй зæгъын æй хъæуы, 4-æм Æхсæнадæмон конкурсы уыд 600 хайадисæджы, се ‘ппæт дæр уыдысты тыхджын æмæ сæ цæттæдзинадæй сæхимæ æркæсын кодтой аивадуарзджыты. Фæлæ уæддæр тыхджындæрты ‘хсæн тыхджындæртæ вæййы, æмæ уыдон та разындысты цхинвайлаг æвзонг хайадисджытæ – Быценты Аннæ-Мария æмæ Дудайты Константин. Сæ дыууæ дæр бацахстой фыццаг бынæттæ æмæ хорзæхджын æрцыдысты сыгъзæрин майдантæй. Гæджиты Жаннæ та йæ профессионалон дæсныдзинад, педагогон курдиат, нысанмæздæхт æмæ æвзонг фæлтæры хъомылады æвæллайгæ куысты тыххæй хорзæх-джын æрцыд дипломæй, афтæ ма йын лæвæрд æрцыд сертификат квалификаци фæбæрзонддæр кæныны курсытæ кæй рацыд 4-æм Æхсæнадæмон конкурсы, уый тыххæй.
Зæгъын хъæуы, ныры рæстæджы ацæуæнтæ фæзын сты бæрæг аххосæгтæм гæсгæ. Ацы ран сæ уавæры бацыд æмæ сын сæ фæндаг срæвдз кодта РХИ-йы Культурæйы министр Остъаты Мадинæ æмæ йын уый тыххæй зæгъынц стыр бузныг.
Газеткæсджыты номæй мах дæр арфæ кæнæм музыкалон æмæ вокалон аивады уæлахиздзаутæн, сæ дарддæры æнтыстытæм та сын æнæрхъæцæй æнхъæлмæ кæсдзыстæм.
Хуыбиаты Н.
Comments are closed, but trackbacks and pingbacks are open.