27-æм апрелы информацион агентад «Спутник»-ы пресс-центры уыд пресс-конференци Галаты Барисы номыл Республикæ Хуссар Ирыстоны кафт æмæ зарды паддзахадон ансамбль «Симд»-ы аивадон къухдариуæггæнæг, Республикæ Хуссар Ирыстоны сгуыхт артист Гуылæрты Радион æмæ йæ солисткæтæн. Пресс-конференцийы уазджытæ журналисттæн радзырдтой ансамблы куыст æмæ архайды тыххæй, афтæ ма сæм цы плæнттæ ис, æмæ ансамблæн куыд цæттæ кæнынц фидæны артистты, æппæт уыдæтты фæдыл.
Куыд зонæм, афтæмæй ивгъуыд аз ансамблы коллективæн уыд реорганизаци – райстой ног кафджыты, раивтой хоры солистты æмæ оркестры. Коллективæн ма уæд снысан кодтой ног аивадон къухдариуæггæнæг дæр – Гуылæрты Радионы.
«Коллективы реорганизацийы фæстæ, мах фехъусын кодтам, зæгъгæ, ансамблмæ исæм ног фæлтæр. Кæй зæгъын æй хъæуы, бирæты фæндыд бахауын махмæ, фæлæ райстам аккагдæрты. Мах нæхæдæг зылдыстæм республикæйы æндæр сфæлдыстадон коллективтыл дæр, цæмæй «Симд»-æн равзæрстаиккам националон кафтмæ серьезон ахаст чи дары, ахæм курдиатджын фæсивæды. Уыдон абон сты нæ ансамблы артисттæ», – загъта ансамблы аивадон къухдариуæггæнæг. Уый ма куыд банысан кодта, афтæмæй ансамбль «Симд»-ы цур скъола-студийы ахуыр кæнынц 185 адæймаджы, кæцы цæттæ кæны ансамблæн фидæны артистты. Семæ кусынц ансамблы хореографтæ. Ам цы æрыгон фæсивæд архайынц, уыдон сты æндæр æмæ æндæр кары сывæллæттæ æмæ сыл цæуы 6-18 азы онг. «Скъола-студийы чи ахуыр кæны, уыдонæй мах равзæрстам цалдæры æмæ сæ фидæнмæ бакæндзыстæм паддзахадон ансамблы скондмæ. Иугæр ахæм æмвæзадмæ куы рахизой, уæд хъуамæ сæхиуыл фылдæр кусой, ахуыр кæной уыцы программæ æмæ се мбæлттæй фæстæдæр ма уой. Ис нын, цæуыл кусæм, уый. Ногдзинадæй нæм цы ис, уый дисциплинæ, ног программæ æмæ ног уæлæдарæс, кæцыйæ сæрыстыр сты нæ артисттæ. Ногдзинæдтæ нæм ис, фæлæ зæгъдзынæн уый æмæ «Симд»-ы традицитæ ивд кæй ма хъуамæ цæуой, афтæ ма нæ ахаст куыстмæ дæр хъуамæ уа серьезон», – банысан кодта Радион.
Пресс-конференцийы ма банысанчындæуыд æрæджы паддзахадон ансамбль «Симд» гастролон балцы кæй уыдис Республикæ Дагъыстаны æмæ сыл хорз тæлмæнтæ кæй ныууагъта сæ балц. «Махачкалайы мах аккагæй ралæууыдыстæм сценæмæкæсджыты раз. Артисттæ сæххæст кодтой нæ ансамблы репертуары хуыздæр хореографион номыртæ æмæ ныл сæ цæст æрæвæрдтой Кавказы адæмтæ. Дарддæр кондæй дæр уыдыстæм хорз, тынг рæсугъд кафæндзаума нын бахуыдтой Годжыцаты Изольдæ æмæ Токаты Миланæ æмæ сын зæгъæм бузныг.
Ацы ног уæлæдарæсы эскизтыл куыстам иумæ, сæрмагондæй хъуыддагмæ йæ хъус дардта нæ директор Гаглойты Кристинæ. Мах æрæййæфта карантины рæстæг æмæ зындзинæдтæ æвзæрстам, хуыйджытæм ацæуын-иу куы бахъуыдис коллективы, уæд. Абон нæ паддзахадон ансамблæн цы уæлæдарæс ис, ахæм Цæгат Кавказы ансамблтæй иуæн дæр нæй. Уыдон мæ ныхæстæ не сты, загътой сæ аивадæн аргъгæнджытæ», – банысан кодта Радион.
Ансамблæн 2021 азы ацы гастролтæ уыдысты фыццæгтæ æмæ та нын куыд фехъусын кодтой, афтæмæй та ныридæгæн сæхи цæттæ кæнынц радон гастролон балцытæм. Фыццаг уал абалц кæндзысты Цæцæны Республикæмæ, дарддæр та фæнд кæнынц дыууæ концерты радтын Цæгат Ирыстон-Аланийы. Гастролон балцы ма хъуамæ ацæуой Хъæрæсе-Балхъар æмæ Адыгейæмæ. Сæрды ма фæнд кæнынц Абхазы Республикæ æмæ горæт Сочимæ ацæуын дæр. Ахæм график сын кæй ис, уымæ гæсгæ коллектив цæттæ кæнынц гастролтæм æмæ Цхинвалы концерт та хаст цæуы фæстæдæрмæ.
Пресс-конференцийы ма сæ фыццаг гастролты тыххæй, сæ ног уæлæдарæс æмæ сæ дарддæры плæнтты тыххæй радзырдтой паддзахадон ансамбль «Симд»-ы солисткæтæ Бязырты Аланæ æмæ Санахъоты Жаннæ. «Мах нымад стæм куыд республикæйы цæсгом, афтæ. Уымæ гæсгæ мах хъомыл кæнæм куыд нæ ног фæлтæры, афтæ нæхи дæр. Кæддæриддæр тырнæм уымæ, цæмæй аккагæй æмæ бæрзонд хæссæм нæ паддзахады ном. Фæнды мæ бузныджы ныхæстæ зæгъын æппæт уыдонæн, кæцытæ аудынц æмæ табу кæнынц «Симд»-æн. Стыр бузныг ма мæ фæнды зæгъын æппæт уыдонæн, кæцыты фæрцы скодтам ног рæсугъд уæлæдарæс», – загъта Бязырты чызг.
Ансамблы солисткæ Санахъоты Жаннæ дæр стыр аргъ кæны ирон кафт æмæ аивадæн. «Ирон кафт, ирон аивад кæддæриддæр хъуамæ уой бæрзонд æмвæзадыл. Ахæм æмвæзадыл та йæ хъуамæ æвæрой паддзахадон ансамблы коллектив. Дагъыстаны куы уыдыс-тæм, уæд хъуыды кодтам ууыл, цæмæй равдыстаиккам «Симд»-ы цæсгом, тых æмæ стыр профессионализм. Алкæй дæр нæ фæндыд, цæмæй фæцыдаиккам сценæмæкæсджыты зæрдæмæ æмæ афтæ дæр рауадис. Стыр бузныг нæ кафæндзаумайы тыххæй дæр. Сценæйыл нæхи хатыдыстæм паддзæхтæй», – загъта ансамблы солисткæ.
Пресс-конференцийы уазджытæ ма банысан кодтой, зæгъгæ, ныртæккæ паддзахадон ансамбль «Симд» ахæм æмвæзадыл нæ уаид, нæ республи-кæйы Президент Бибылты Анатоли йæм йæ хъус куы нæ ‘рдардтаид æмæ сын куы нæ баххуысс кодтаид, уæд.
ЦХУЫРБАТЫ Ларисæ
Comments are closed, but trackbacks and pingbacks are open.