Галаты Барисы номыл Республикæ Хуссар Ирыстоны кафт æмæ зарды паддзахадон ансамбль «Симд» сæхи цæттæ кæнын райдыдтой гастролон балцмæ Республикæ Дагъыстанмæ. 16-æм апрелы «Симд» горæт Махачкалайы уырыссаг драмон театры сценæйыл равдисдзысты концерт «Танцы народов Кавказа в Дагестане», зæгъгæ, ахæм номимæ.
Ансамбль «Симд»-ы директор Гаглойты Кристинæ нын куыд радзырдта, афтæмæй сæ концертон программæмæ хаст æрцыдысты ансамблы репертуары хуыздæр хореографион номыртæ. Сценæмæкæсджытæ, фыццаджыдæр, бакæсдзысты æмæ аргъгæнæг уыдзысты, рагæй фæстæмæ ирон адæм сæрыстыр кæмæй сты, уыцы нæртон кафт «Симд»-æн. Уымæй дарддæр ма сæххæст кæндзысты «Хонгæ кафт», «Чызджыты кафт», «Рог кафт», «Абхазаг кафт», «Цæцæйнаг кафт» æмæ ма Кавказы адæмты æндæр кæфтытæ дæр. Паддзахадон ансамбль «Симд»-ы цур цы хор архайы, уыдон та Республикæ Хуссар Ирыстоны сгуыхт артист Саппиаты Залинæйы къухдариуæгадæй адæмы рæгъмæ рахæсдзысты æмæ сæххæст кæндзысты сæ ног программæйы зарджытæй. Хуссарирыстойнаг артисттæ сæххæст кæндзысты ирон æмæ дагъыстайнаг адæмон зарджытæ.
«Нæ ансамблы нын горæт Махачкалайы уагъдцæуæг музыкалон мадзалмæ кæй фæхуыдтой, уыцы хъуыддагыл мах сæмбæлдыстæм стыр æхсызгонæй. «Симд» гастролон балцы цæуы æртæ боны æмгъуыдмæ. Ныридæгæн сфæлдыстадон коллективтæ сæхи цæттæ кæнынц æмæ 15-æм апрелы хъуамæ афæндараст уæм. Махачкалайы ацы концертон программæ организацигонд æмæ уагъд цæуы Уæрæсейы Федерацийы Культурæйы министрады æххуысæй, кæй зæгъын æй хъæуы, Республикæ Хуссар Ирыстон æмæ Дагъыстаны Культурæйы министрадты æххуысæй дæр. Паддзахадон ансамблы фæндагон хæрдзтæ сæхимæ айстой нæ фысымтæ æмæ сын уый тыххæй зæгъæм стыр бузныджы ныхæстæ. Уæлдæр банысангонд концерт уагъд цæуы проект «Обменные культурные мероприятия России и Южной Осетии»-йы фæлгæтты», – банысан кодта Галаты Барисы номыл кафт æмæ зарды паддзахадон ансамбль «Симд»-ы директор.
ЦХУЫРБАТЫ Ларисæ
Comments are closed, but trackbacks and pingbacks are open.