Сфидар кодтой лæггæдты ног тарифтæ

Хицауады Сæрдары хæстæ æххæстгæнæг Бекъойты Геннадийы сæрдариуæгадæй ауагъдæуыд Хицауады рабадт, кæцыйы рæстæджы фидаргонд æрцыдысты цæрæнуатон-коммуналон хæдзарады лæггæдты ног тарифтæ. Дзырдæуыд 2020 азы паддзахадон бюджеты ивындзинæдтыл, уынаффæ цыд республикæйы æхсæнрайонон арæнты паддзахадон хынцынады фарстатыл. Хицауады уæнгтæ сфидар кодтой æмæ Парламентмæ уынаффæмæ бавдыстой «РХИ-йы Ленингоры районы административон-территориалон арæнтæ сæвæрыны тыххæй» закъоны проект.

Бекъойты Геннадийы ныхæстæм гæсгæ, кусæгон къорд, кæцыйы сконды сты  Паддзахадон регистрацийы службæйы, республикæйы кадастр æмæ картографийы, Хъæууон хæдзарады министрады æмæ районон администрациты  специалисттæ, стыр куыст бакодта æмæ дарддæр дæр кусы административон-территориалон иуæгтæ æмæ сæ кадастрон хыгъд ахицæн кæныныл.

Рабадты рæстæджы æркастæуыд æмæ фидар æрцыд  Дзулфыцæн комбинатæн Паддзахадон бюджетæй субсидитæ радтыны тыххæй уынаффæйы проект, 600 гр уæзы афтæхуыйнæг «социалон дзул», 1-аг гъæды мæнæуы ссадæй уадзыны тыххæй цы æфтиаг нæ райста æмæ цы бахардз кодта, уыдон баххæст кæныны тыххæй.

Рабадты рæстæджы фидаргонд æрцыд «2020 азæн РХИ-йы Паддзахадон бюджеты тыххæй» закъоны æфтиæгты æмæ хæрдзты хаймæ ивындзинæдтæ бахæссыны тыххæй» закъоны проект. Ивындзинæдтæ баст сты фæрæзтæ уæрæсейаг финансон æххуысы дыууæ функционалон здæхтыл адих кæнынимæ: 2020-2022 азты социалон-экономикон рæзты Инвестицион программæйыл, афтæ ма медицинон препараттæ æмæ ифтонггæрзтæ балхæныны, уыцы нымæцы СОVID-19-æй рынчынтæн медицинон æххуыс бакæныны фæдыл РХИ-йæн баххуыс кæныны тыххæй УФ-йы Хицауады уынаффæ равдисыны æнæмæнгхъæуындзинады, медицинон кусджыты куыстмызд бафидын, РХИ-йы санитарон-эпидемиологон æдасдзинад сифтонг кæныныл». 

Мадзалы рæстæджы скъуыддзаг æрцыд  Хъæууон хæдзарады министрады, уыцы нымæцы республикæйы ветеринарон службæйы  кусджыты паддзахадон хорзæхтæй – Кады Грамотæтæ æмæ РХИ-йы Хицауады Грамотатæй схорзæхджын кæнын. Хъæууон хæдзарады министр Пухаты Левы куырдиатмæ гæсгæ хицауадон хорзæхтæм бавдыстæуыд иуæндæс адæймаджы.

Цæрæнуатон-коммуналон лæггæдты ног тарифты тыххæй экономикон рæзты министры хæдивæг Тадтаты Дзамболат куыд банысан кодта, афтæмæй 2021 азы январæй электроэнергийы аргъ уыдзæн: горæты цæрджытæн – 3 сомы, хъæуы цæрджытæн – 2,37 сомы; газы аргъ та – 4,51 сомы.

Юридикон цæсгæмттæн тарифтæ уыдзысты: электроэнергийæн – 3,94 сомы; газæн – 5,54 сомы.

«Тарифтæ фæфылдæр сты, уæрæсейаг оптон базары электроэнерги æмæ газы æргътæ кæй фæфылдæр сты, уый фæстиуæгæн. Уæрæсейы энергоресурстæ кæй фæзынаргъдæр сты, уый тыххæй бахъуыд, бар-æнæбары, РХИ-йы дæр тариф 72 капеччы фæзынаргъдæр кæнын, кæцыты 50 проценты хæрдзтæ бафидын йæхимæ райста паддзахад», – бамбарын кодта Тадтаты Дзамболат.

Бекъойты Геннади та банысан кодта, зæгъгæ, хицауад æппæт дæр сарæзта, цæмæй æнæбындурæй ма   фæзынаргъ уой тарифтæ республикæйы цæрджытæн.

«Цæрджытæн æххуысæн Хицауад паддзахадон казнæйы хыгъдæй дарддæр дæр компенсаци кæндзæн электроэнерги æмæ газы аргъы иу хай. Ныртæккæ мах кусæм 2021 азæн электро-нергийы хæрдзты тыххæй  субсидитæ фæфылдæр кæныны фарстыл, бюджет куыд амона, уымæ гæсгæ», – банысан кодта Бекъойты Геннади.