Ивгъуыд къуыри йæ куыст фæцис Петербурджы дунеон экономикон форум, цыран хайад райста хуссарирыстойнаг делегаци дæр.

Цхинвалмæ æрыздæхгæйæ, делегацийы сæргълæууæг Хицауады Сæрдар Пухаты Эрик фехъусын кодта, зæгъгæ, Санкт-Петербург æмæ Хуссар Ирыстоны хицауадтæ фæнд кæнынц базарадон-экономикон, зонадон-техникон æмæ гуманитарон фадгуыты æмкуысткæнынады тыххæй сразыдзинадыл сæ къухтæ æрфыссын.

«Нæ хицауадты ‘хсæн æмархайды тыххæй развæлгъау бадзырдтæ ауагъд æрцыд Петербурджы дунеон экономикон форумы фæзуаты. Ныртæккæ дыууæ фарсы цæттæ кæнынц сразыдзинады проект, кæцыйыл, развæлгъау бæрæггæнæнтæм гæсгæ, къухтæ æрфыстæуыдзæн ацы аз фæззæджы. Бастдзинæдтæ фæарфдæр кæнын, хæдзариуæггæнæг субъектты ‘хсæн базарадон ахастытæ рæзынæн æмæ инвестицион æмархайды тыххæй хæрзвадат уавæртæ саразын   пайда уыдзæн Санкт-Петербургæн дæр æмæ Хуссар Ирыстонæн дæр», – загъта Пухаты Эрик.

Йæ ныхæстæм гæсгæ, хъуыддагон æмæхсæнады минæвæрттимæ фембæлдтыты рæстæджы уынаффæ цыд ахæм перспективон здæхты рæзты  фарстатыл, куыд рекреацион индустри.

Йæ рады Хицауады Сæрдары хæдивæг, экономикон рæзты министр Бекъойты Геннади куыд банысан кодта, афтæмæй Санкт-Петербург æмæ Хуссар Ирыстон фæнд кæнынц æмкуысткæнынад райрæзын кæнын экономикæ, æнæниздзинад хъаъхъхъæнын, культурæ, спорт æмæ туризмы фадгуыты.

Comments are closed, but trackbacks and pingbacks are open.