Коронавирусон низæй чи адзæбæх вæййы, уыдонæнæй сæ фылдæрæн сæ æнæниздзинад бахъыгдард вæййы, низ ныууадзы арф фæд адæймаджы органтыл æмæ ахæмтæн фæхъæуы реабилитацион мадзæлттæ аразын. Ныры онг дыууæ къорды æрвыст æрцыдысты Уæрæсемæ реабилитацимæ, кæцытæн æмбæлон æххуыс бакодтой Ессентукы санаториты. Фыццаг къорды уыдысты, дохтыртæй чи фæрынчын ис, уыдон, дыккаг къорды та – дохтыртæ дæр æмæ хуымæтæг цæрджытæ дæр.
Амбулаторон-поликлиникон медицинон центры сæргълæууæг Санахъоты Тамарæ куыд фехъусын кодта, афтæмæй 15 ноябры ногæй арвыстой 11 адæймаджы.
«Хъуамæ арвыстаиккам 13 адæймаджы, фæлæ дзы дыууæйæ нал ацыдысты æмæ уымæ гæсгæ уыцы бынæттæ фесæфтысты. Æртыккаг къорды иууылдæр сты хуымæтæг цæрджытæ æмæ æрвыст æрцыдысты Пятигорскмæ», – загъта Санахъоты Тамарæ.
Банысан кæнын ма хъæуы уый, санаторитæм кæй арвыстой, уыдон тынг райгондæй кæй баззадысты, се ‘нæниздзинад бæрæг кæй фæхуыздæр ис.
Comments are closed, but trackbacks and pingbacks are open.