Цæгат Ирыстон-Аланийы уагъд цæуы Хуссар Ирыстоны æмæ РЦИ-Аланийы адæмон нывгæнæг Чилæхсаты Магрезы сæрмагонд равдыст «Симфония в красках», зæгъгæ. Равдыст гом кæныны церемонийы фæлгæтты нывгæнæджы Уæрæсейы Нывгæнджыты цæдис схорзæхджын кодта «Александр Ивановы сыгъзæрин майдан»-æй. Александр Иванов сфæлдыста зындгонд ныв «Явление Христа народу», зæгъгæ. Ивановы номыл Уæрæсейы Нывгæнджыты цæдис хорзæх сфидар кодта хæрзæрæджы, æмæ йæ радта æрмæстдæр дыккаг хатт.
«Ирыстоны ацы хорзæх ничи ма райста, мæнæн уый уыд æнæнхъæлæджы. Стыр бузныг, мæ равдыстмæ чи æрбацыд, уыдонæн. Равдыст ис Цæгат Ирыстоны Национ музейы æмæ аххæсдзæн 10 марты онг», – загъта Чилæхсаты Магрез.
Банысан кæнын хъæуы уый дæр, æмæ «Александр Ивановы сыгъзæрин майдан» лæвæрд кæй цæуы культурæйы архайджытæн се стыр æнтыстыты тыххæй. Чилæхсайы фыртæн хорзæх радта РЦИ-Аланийы Нывгæнджыты цæдисы сæрдар Мæргъиты Таймураз.
«Уый у уникалон равдыст. Чилæхсаты Магрезы ном Ирыстоны зоны алчи дæр. Уый йæхæдæг йæхицæн скодта ахæм ном, кæцы тынг ахсджиаг у нывгæнæгæн. Уый у Ирыстоныл, райгуырæн къуымыл зарæггæнæг. Уый уымæн цæуы йæ зæрдæйæ»,- загъта Мæргъиты Таймураз.
Нывгæнæджы равдыст баст у йæ 80 азы юбилейимæ. «Экспозицийы ис 100 алыгъуызон нывы, кæцытыл куыстон фæстаг æхсæз азы. Загътой мын, цæмæй равдыст саразон Цхинвалы дæр æмæ сразы дæн. План кæнæм равдыст сæрды æрласын», – йæ ныхасмæ бафтыдта уый.
Уый ма у бирæнымæц премитæ æмæ хорзæхты хицау. Хорзæхджын у К.Станиславскийы номыл УФ-йы паддзахадон премийæ, афтæ ма у национ преми «Русская галерея ХХI века»-йы лауреат. Зындгонд ма у, куыд театралон нывгæнæг, афтæ. Чилæхсайы фырт у 120 спектаклы декорациты автор, кæцыты фылдæр хай бацыд ирон сценæйон культурæйы сыгъзæрин фондмæ. Курдиатджын нывгæнæг райгуырд хæххон хъæу Чеселты 1940 азы 5-æм майы. Йæ нывты арæх æвдисы райгуырæн Ирыстоны традицитæ, адæмы, рæсугъд æрдз. Нывгæнæджы куыстытæ æвдыст цыдысты Уæрæсейы хуыздæр музейты, Европæ, АИШ æмæ Японы коллекционерты сæрмагонд æмбырдгæндты.
Comments are closed, but trackbacks and pingbacks are open.