24 апрелы горæт Цхинвалы спортивон клуб «Лига чемпионов»-ы ауагъдæуыд ирон эстрадæйы мэтр, маэстро Сагкаты Валерийы мысæн изæр.

Мадзалмæ хуынд æрцыдысты Республикæ Хуссар Ирыстоны Президент Тыбылты Леонид, Паддзахадон университеты ректор Тедеты Вадим, РХИ-йы культурæйы министр Остъаты Мадинæ, Сагкаты Валерийы æмкъай Джапаридзе Луиза, йæ хъæбултæ æмæ хъæбулы хъæбултæ, афтæ ма æхсæнады минæвæрттæ куыд Хуссар Ирыстонæй, афтæ Цæгат Ирыстонæй дæр.

Мадзал бацæттæ кодта дохтыр, зарæггæнæг, æхсæнадон архайæг æмæ Сагкаты Валерийы хорз æмгар Куыдзеты Игорь.

Райдайæны мадзаламонджытæ, курдиатджын фæндыр-дзæгъдæг Сæппиаты Зæлинæ æмæ РХИ-йы паддзахадон драмон театры актер Мамиты Григори раарфæ кодтой уазджытæн æмæ сæ базонгæ кодтой Валерийы цард æмæ сфæлдыстадимæ.

«Валери уыд æппæт ирон адæмы уарзондæр курдиатджын зарæггæнæг. Уый уыд ирон зарæджы рухс стъалы. Валерийы зарджытæм хъусгæйæ, адæймаджы зæрдæ арф банкъары зарæджы мидис, ахъарынц йе уæнгты зарæджы зæлтæ. Зарæггæнæджы хъæлæсæй раскъуыйгæ зæлтæ ахизынц дадзинты æмæ свæййынц адæймаджы уæнгты рæбинаг. Хъыгагæн, кæд абон Валери не ’хсæн нал ис, уæддæр йæ рухс ном æнустæм цæрдзæн нæ зæрдæты», — загъта Сæппиаты Зæлинæ.

Мадзал аразæг Куыдзеты Игорь йæ раныхасы загъта, ацы мадзал бацæттæ кæнынмæ йæ кæй баразæнгард кодта, музыкалон фадыджы йæ сæйраг ахуыргæнæг, йæ хорз æмгар æмæ зондамонæг Сагкаты Валерийы ном Ирыстоны æхсæнадæй рох кæй ма хъуамæ уа, уыцы хъуыды. Ууыл Игорь рагæй фæнд кодта бакусын æмæ бацæттæ кодта клип Сагкаты Валерийы уарзондæр зарджытæй сæ иу «Голубоглазый одинокий»-йы бындурыл.

«Ацы зарæг равзæрстон уый тыххæй æмæ дзы фылдæр уыд Валеримæ хæстæг контексттæ. Валери йæхæдæг дæр уыд цъæхдзаст лæппу, æмæ куыд бирæ аивады архайджытæ, афтæ йæ миддуне уыд иунæг, уыд стæм удысконды хицау. Уыимæ ма зарæг фыст у уырыссаг æвзагыл æмæ уый та фадат ратдзæн, цæмæй ссара йæ хъусæджы, куыд ирон аивадуарзджыты ’хсæн, афтæ æндæр нациты ’хсæн дæр.

Ацы клип саразыны куысты хайад райстой бирæтæ, уыцы нымæцы куыд Цæгат Ирыстоны драмон теарты бæхджын къорд „Нарт“, ансамбль „Горец“, Дзæуджыхъæуы авиаклуб æмæ бирæ æндæртæ. Иудзырдæй, клип арæзт æрцыд Цæгат æмæ Хуссар Ирыстоны æхсæнады минæвæртты æмархайдæй. Сагкаты Валерийы мысæн изæры фæлгæтты хаст ис ацы клипæн йæ презентаци дæр. Фæнды мæ уæлдай бузныг зæгъын Республикæ Хуссар Ирыстоны Президент Тыбылты Леонидæн, ацы мадзал бацæттæ кæныны хъуыддаджы нын финансон æххуыс кæй бакодта, уый тыххæй. Бузныг зæгъын Республикæ Хуссар Ирыстоны Культурæйы министр Остъаты Мадинæйæн, афтæ ма мадзалмæ æрбацæуджытæн се ’ппæтæн дæр», — загъта Куыдзеты Игорь.

Уый фæстæ Сагкаты Валерийы тыххæй йæ мысинæгтæ æмæ йæ хъуыдытæ загъта РХИ-йы адæмон артисткæ, Хетæгкаты Къостайы премийы лауреат, РХЙ-йы сгуыхт артисткæ, драматург, поэтессæ Галуанты Людмилæ.

«Валери кæд гениалон зарæггæнæг уыд, уæддæр ын кæддæриддæр уыд материалон цухдзинæдтæ, уымæн æмæ йæ бинонтæ уыдысты мæгуыр. Мæнмæ гæсгæ æххуыс кæнын фæхъæуы Валерийы хуызæн курдиатджын адæмæн, фæхъæуы сæ фарсмæ балæууын сæ дарддæры фæндаджы. Валери куыд æмгар, афтæ уыд æнувыд, ирд æмæ хæларзæрдæ. Мæнæн мæ зарджытæй Валери æххæст кодта бирæты. Изæрыгæтты-иу мах арæх бадтыстæм æмæ-иу цæттæ кодтам зарджытæ… Мах никуы ферох кæндзыстæм Валерийы рухс ном. Рухсаг у, Валери».

Валерийы æввахс æмгар, зынгæ хуссарирыстойнаг зарæггæнæг, композитор Харебаты Тимур йæ мысинæгты радзырдта, фыццаг хатт Валерийы уый кæй бакодта вокалон-инструменталон ансамбль «Айзæлд»-мæ.

«Валериимæ мах цардыстæм фæрсæй-фæрсмæ, уыдыстæм сыхæгтæ. Иуахæмы æнæнхъæлæджы фехъуыстон Том Джонсоны хъæлæсæй æххæст зарæг æнæ аккомпонементтæй. Æз тынг бацымыдис кодтон, чи у уыцы зарæг æххæстгæнæг, кæмæн ис ахæм æнахуыр диссаджы хъæлæс. Бацыдтæн сæ хæдзары размæ æмæ рахизын кодтон æддæмæ уыцы цымыдисон хъæлæсы хицауы, — уый разынд Сагкаты Валери. Уый уыд 60-æм азты, уæд ыл цыд æвддæс азы. Валерийæн зарæггæнæджы хъæлæс æмæ курдиат уыдысты Хуыцауæй ратгæ».

РХИ-йы культурæйы министр Остъаты Мадинæ йæ раныхасы раарфæ кодта Президент Тыбылты Леонидæн, мадзал-аразджытæн Куыдзеты Игоры сæргълæудæй æмæ загъта: «Æз тынг хорз хъуыды кæнын Сагкаты Валерийы ныгæнæн бон… Уыцы бон алчи дæр йæ сæйраг хæсыл нымадта Валерийы йе ’нусон фæндагыл афæндараст кæнын. Абон мæн фæнды стыр бузныг зæгъын Тыбылты Леонидæн, Культурæ-йы министрады домгæ фарстатæм кæддæриддæр йе ’ххуысы къух кæй фæдаргъ кæны, уый тыххæй. Афтæ ма бузныг зæгъын Куыдзеты Игорæн ацы мадзал бацæттæ кæныны тыххæй».

Сагкаты Валерийы цардæмбал Джапаридзе Луиза раарфæ кодта Республикæйы Президентæн, мадзал бацæттæгæнджытæн, уазджытæн æмæ чидæриддæр йе ’ххуысы къух фæдаргъ кодта Валерийы ном сæнусон кæныны хъуыддагмæ, уыдонæн се ’ппæтæн дæр.

Республикæйы сæргълæууæг Тыбылты Леонид мысæн изæры йæ раныхасы загъта арфæйы ныхæстæ Куыдзеты Игорæн, ирон легендарон зарæггæнæг, ирон зарæджы гениалон æххæстгæнæг Сагкаты Валерийы мысæн изæр бацæттæ кæныны тыххæй

«Æз амондджын хъуыддагыл нымайын, Валерийы кæй зыдтон æввахсмæ. Сагкаты Валери уыд цымыдисон адæймаг, уарзта йæ Ирыстон, йæ адæмы. Стыр æхцондзинады æнкъарæнтæ райстон ацы мадзалы рæстæджы, Валерийы горæты уынгты æд гитарæ фæцæйцæугæйæ æрымысгæйæ. Валери разæнгард кодта фæсивæды аивады бæрзæндтæм. Сагкаты Валерийы мæлæт у æппæт Ирыстоны трагеди, ирон аивады трагеди. Ацы мадзалы фæлгæтты Куыдзеты Игорь сиды махмæ, цæмæй ма рох кæнæм Валерийы æнгæс ирон этносы пара-хатгæнджыты», — загъта Тыбылты Леонид.

Мысæн изæры азарыдысты Цæгат æмæ Хуссар Ирыстоны этрадон зарæггæнджытæ: РХИ-йы сгуыхт артист Бугуылты Георги, Тасойты Игорь, Болататы Мая, Андрей Клинчаев, Равшан Камилджинов, афтæ ма чысыл равдыстытæ сæххæст кодтой Куыдзеты Игоры чызг æмæ лæппу Виктория æмæ Сослан.

Мадзалы кæронбæттæны Куыдзеты Игорь банысан кодта, клип «Голубоглазый одинокий» кæй у йæ дарддæры бирæ фæндты райдайæн. Фæнд ма кæны Хуссар æмæ Цæгат Ирыстоны Валерийы ном арыны цытæн хæрзаудæн концерттæ ауадзын. Уыдонæй райсгæ финансон фæрæзтæй та фæнд кæны горæт Цхинвалы, зарæггæнæджы уарзондæр бынæттæй сæ иу — раздæры Пионерты парчы Сагкаты Валерийы цырт саразын.

Comments are closed, but trackbacks and pingbacks are open.