Сæрдыгон улæфтытæ ацы аз райдыдтой рæстæгæй раздæр. Сывæллæттæн (æмæ, кæй зæгъын æй хъæуы, сæ ныййарджытæн дæр) æппынфæстаг, сæ бон у сæ фæллад суадзын, фылдæр афынæй кæнын æмæ дистанцион урокты фæстæ баулæфын. Ацы рæстæг тынг уарзынц скъоладзаутæ. Фæлæ фæзыны æндæр проблемæ: цæмæй аирхæфса адæймаг йæхи сæрибар рæстæджы? Сæрдыгон бонтæ куыд хъæуы æрвитын цымыдисонæй? Цалынмæ сывæллæттæ компьютертæ, планшеттæ æмæ телефонтæй хъазынц, уæдмæ сæ ныййарджытæ сæ «сæртæ цъæл кæнынц», цæмæй сæ сывæллæттæ ахæм уæззау санитарон-эпидемиологон уавæры сæ рæстæг ма æрвитой æнæпайдайæ.

  Кæй зæгъын æй хъæуы, фылдæр хъусдард здахын хъæуы сывæллæтты æнæниздзинадмæ. Æнæхъæн ахуыры азы мидæг ма сывæллонмæ йæ зонындзинæдты æдтейæ бафты æгъуыссæг æмæ ныуæртты уаргъæвæрд. Æгæр бирæ уроктæ йын лæмæгъ кæнынц йæ змæлынгæнæн активондзинад. Уымæ гæсгæ сæрдыгон каникулты рæстæджы уæ сывæллæттæн фадат радтут æмæ фылдæр фынæй кæной, фылдæр змæлой æмæ цин кæной.

Куыд сорганизаци кæнын хъæуы кæстæр кълæсты скъоладзауы рæстæг, кæд æмæ æрвылбонон ирхæфсæнтæ  къухты зынæй æфтынц, уæд?

Чингуытæ кæсын

Чингуытæ æнæмæнгдæр хъуамæ хаст æрцæуой алы сывæллоны æнæмæнгхъæуæг номхыгъдмæ. Чиныг кæсын лæууы фыццаг пункты цалдæр аххосагмæ гæсгæ:

– цымыдисон чиныг гæнæн ис кæсай сахатгай;

– регулярон тренировкæтæ бæрзонддæр кæнынц кæстæр кълæсты скъоладзауы тагъд кæсыны рæстæг;

– фыццагкъласон тагъддæр сахуыр вæййы чиныг кæсын;

– хорз чингуытæ хъомыл кæнынц сабийы моралон æгъдæуттæ æмæ æргъадтыл;

– ссарæн ис æмбæлон чиныг æмæ дзы сисæн ис бирæ пайдайы миниу-джытæ.

Алы саби дæр уарзы йе ‘ввахс адæмимæ чиныг кæсын. Кæд æмæ уын уæ дадатæ æмæ уæ нанатæ чингуытæ кастысты чысылæй, уæд уын амондджын сабибонтæ уыд.

Киномæ кæсыны изæр

Къуыри иу хатт æнæмæнгдæр сорганизаци кæнут хорз кинонывмæ кæсыны хъуыддаг. Уæхæдæг равзарут, цы кинонывмæ бакæсат, уый. Аскъуыддзаг æй кæнут уæ бинонтимæ. Бакæсут зæронд советон кинонывтæм кæнæ аргъæуттæм, кæннод та – нырыккон киношедевртæм. Ахсджиаг у, цæмæй киноныв уа зондæн ахъаз. Киномæ бакæсыны фæстæ цалдæр минуты рахицæн кæнут, цæмæй йыл æрныхас кæнат æмæ йæ равзарат, уæ хъуыдытæ зæгъат: киноныв цæмæй уыд цымыдисон, цæмæй фæцыд кæнæ цæмæй нæ фæцыд уæ зæрдæмæ. Лæмбынæг байхъусут  уæ бинонты кæстæрты хъуыдымæ дæр.

«Зæнджын» хъæзтытæ – æппæт бинонтæн

Уæлыстъол хъæзтытæ – зæрдæмæдзæугæ куыст, кæцы райтынг кæны сывæллоны æмæ æнгом кæны æппæт бинонты. Иууыл стратегион уæлыстъол хъæзтытæй сæ иуыл нымад сты шахматтæ.

Шахматтæ æххуыс кæнынц хъуыды кæнынæн, раздæр исты план кæнынæн, хъуыддаг скъуыддзаг кæнынæн æмæ исты зын уавæрæй рацæуынæн.

Уæ сывæллон нæма зоны шахматтæй хъазын? Сæрдыгон каникултæ – æппæт хуыздæр рæстæг йæ сахуыр кæнынæн. Кæд æмæ ныййарджытæ сæхæдæг дæр нæ зонынц шахматтæй хъазын, уæд тынг хорз рæстæг у уыдонæн дæр сæ сахуыр кæнынæн сæ сывæллæттимæ иумæ. Видеоурокты æххуысæй æнцондæр у ацы хъазт сахуыр кæнын æмæ йын йæ æнæмæнгхъæуæг фæткойтæ базонын.

Сæрибар рæстæг – уæ уарзондæр хоббийæн

Æппынфæстаг уын разынд бирæ рæстæг уæ уарзондæр хоббийæн. Уроктыл бадыныл, хæдзарон куыстытæ æххæст кæнынæй æмæ уын уæлæмхас куыстытæй рæстæг никуы уыд уæ уарзон хоббимæ хъус æрдарынæн.

Радтут уæ сывæллонæн ахæм фадат улæфты рæстæджы, цæмæй парахатæй фæныв кæна, фæкафа æмæ æртымбыл кæна йæ конструкцитæ. Кæд æмæ уæ сывæллон нæма ссардта, цæмæй аирхæфса йæхи, уæддæр ын ис бирæ рæстæг, цæмæй, йæ зæрдæ цæмæ æхсайы, уыцы хобби ссара æмæ йыл йæ рæстæг «амара». Алы бон дæр уæ сывæллонæн дæттут исты ног хæслæвæрд: хæринаг аразын, лепкæйæ æндадзын, æмдзæвгæтæ фыссын, нывтæ исын…

Къуыри иу хатт – иу ног хъуыддагмæ цайдагъдзинад

Карантин, каникултæ æмæ отпусчы рæстæджытæ сты æппæт хъомысджындæр хи бакусыныл. Хистæр кары адæмæн сæ бон у сæ зонындзинæдтыл бакусын, цæуыл нæ фæцайдагъ сты йæ рæстæджы, уый ныр баххæст кæнын. Бакусой сын сæ фæфылдæр кæнæ сæ фæхуыздæр кæныныл.

Тексттæ фыссын, фæсарæйнаг æвзæгтæ ахуыр кæнын, баныхæстыл цайдагъдзинад æмæ бирæ æндæртæ. Бахардз кæнут æнæхъæн къуыри дæр, цæмæй сахуыр кæнат сывæллоны йæ уат батухыныл. Ноджы ма иу къуыри рахицæн кæнут, цæмæй йæ фæцайдагъ кæнат хисæрмагонд гигиенæмæ: йæ дæндæгтæ æхса алы бон дæр æмæ йæхи найа, сыгъдæг кæна алы изæр дæр.

Скъолайы æрмæг фæлхатт кæнын

Каникулты рæстæджы хъæуы канд баулæфын нæ, фæлæ ма цы зонындзинæдтæ æртымбыл кодтат, уыдон дæр ма фесафын æмæ сæ спайда кæнын. Сæрдыгон улæфт хъуамæ дома æрвылбонон куыст дæр хæдзары. Цæмæй уæ сывæллонæн йæ зæрдæ ма «фæцъæх» уа иугъæдон хъæзтытæй, уый тыххæй ис ахæм онлайн-хъазт, кæцы æххуыс кæны сывæллæттæн сæ кæсыны цайдагъдзинад фæхуыздæр кæнын, хæслæвæрд æххæст кæныныл тренировкæ кæнын, растфыссынады бындуртæ зæрдыл æрлæууын кæнын æмæ рацæугæ æрмæг бафидар кæнын.

Иумæйаг мастер-класстæ

Уæ сывæллоны зæрдæмæ цæуы хæринаг аразын кæнæ цъиутæн ахстæттæ аразын? Алы хъуыддагæй дæр саразæн ис иумæйаг хъæлдзæг рæстæг æрвитæн. Ауадзут ерыстæ, ныффыссут видеоурок. Алы архайды сæйраг нысан – алцы дæр аразын иумæ æмæ хъæлдзæгæй.

Балц – хæдзары мидæг

Кæд уæ фæнды исты алыгъуызондзинад, уæд уæ бон у сæрдыгон балц саразын кæнæ пикник, хæдзарæй нæ рахизгæйæ. Бакæнут уæ рудзгуытæ, скусын кæнут уæ фантази, саразут халагъуд, фынæй кæныны голджытæ æмæ æнæмæнгæй – хорз зæрдæйы равг. Арт кæныны бæсты уын ацæудзæн уæлыстъолы лампæ. Цы гæнæн ис саразæн ахæм балцы рæстæджы? Зарын, худæг историтæ дзурын, дзаджджын «балцон» хæринæгтæ хæрын æмæ пъолыл фынæй кæнын.

Пижамон хъазтизæр

Пижамон хъазтизæр – ноджы иу фæрæз негативæй фервæзын æмæ хи хъæлдзæг равгæй сифтонг кæнынæн. Æнцондарæн дарæс, æхцон музыкæйы зæлтæ – иууылдæр бахъæудзысты хъазтизæр ауадзыны рæстæджы.

Хъазтизæры хайадисджыты хæслæвæрд – æрулæфын, эмоцитæ суæгъд кæнын кафты рæстæджы, æхцондзинад райсын æввахс адæмимæ рæстæг æрвитынæй.

Музей – диваныл

Кæд уæ фæнды эстетикон æхцондзинад райсын, исты ногдзинæдтæ базонын кæнæ цымыдисон рæстæг арвитын, уæд бабæрæг кæнут уæ сывæллæттимæ æппæты зындгонддæр дунеон музейтæ. Уымæн фадат ис виртуалон трансляцитæм гæсгæ. Компьютер æмæ интернеты руаджы уæ бон у бабæрæг кæнын Лувр, Æрдзон историйы Националон музей Вашингтоны.

Уæ зæрдыл дарут: улæфты рæстæджы алы минут дæр ма план кæнут. Мацы аразыны рæстæг дæр хъуамæ баззайа сывæллонæн. Уæ сывæллæтты фарсмæ ут, æххуыс сын кæнут, уæ хъус сæм дарут, разæнгард сæ кæнут æмæ активон хайад исут сæ фæндты æмæ хъуыддæгты. Ма рох кæнут семæ фылдæр рæстæг æрвитын.

Алы цымыдисон архайд дæр свæййы ноджы цымыдисондæр сывæллонæн, кæд æмæ йæ фарсмæ уой йæ уарзон ныййарджытæ. Ныхас кæнут, худут, хъæлдзæгæй æрвитут уæ рæстæг æмæ ногдзинæдтæ ахуыр кæнынмæ иумæ тырнут. Хъахъхъæнут уæ оптимизм æмæ хъæлдзæг зæрдæйы равг. Ахæм сæрдыгон каникултæ уæ сывæллон мысдзæн æхцонæй бирæ рæстæджы дæргъы.

Æрмæг мыхуырмæ бацæттæ кодта

 ДЫГЪУЫЗТЫ Зæринæ

Comments are closed, but trackbacks and pingbacks are open.