Хуссарирыстойнаг-гуырдзиаг паддзахадон арæнтыл Эргнеты хъæумæ хæстæг уагъд æрцыд Инциденттæ ма æруадзын æмæ сæм хъусдард здахыны фæдыл механизмты фæлгæтты 67-æм фембæлд. Фембæлд уагъд цыд Хуссар Ирыстон, Гуырдзыстон, Уæрæсе æмæ Евроцæдисы Миссийы хъусдарджытæ æмæ ЕÆÆО-йы минæвæртты хайадистæй.

Фембæлды рæстæджы дзырд цыд паддзахадон арæнтыл æрцæугæ цаутæ æмæ арæнты фæтк халыны цаутыл.

Фембæлды фæстæ хуссарирыстойнаг делегацийы сæргълæууæг Санахъоты Дауыт информацион фæрæзтæн куыд фехъусын кодта, уымæ гæсгæ механизмты куысты фæлгæтты дзырд цыд Хуссар Ирыстон æмæ Гуырдзыстоны арæнтыл инженерон арæзтæдтæ æмæ информацион нысæнттæ сæвæрыны фарстыл.

Хуссарирыстойнаг фарс ноджыдæр рæгъмæ рахаста, арæнтыл информацион нысæнттæ сæвæрын æмæ инженерон арæзтæдтæ саразыныл куыст кæй цæуы иуфарсонæй. Фæлæ нæ, зæгъгæ, ныфс ис, æмæ Гуырдзыстоны къухдариуæгад æмбаргæ ахаст кæй равдисдзæн ацы фарстмæ æмæ арæзт кæй æрцæудзæн иумиаг гуырдзиаг-ирон къамис паддзахадон арæнтæ делимитаци æмæ демаркацийы куыстыты фæдыл. Дауыты хъуыдымæ гæсгæ, ацы фарст æрбæстон кæнынæй паддзахадон арæнты фæйнæ фарс цæрæг адæм цы бирæ проблемæтыл сæмбæлынц, уыдон иуварс æрцæуикой.

Хуссарирыстойнаг фарс ныртæккæ кусы арæнтыл информацион нысæнттæ сног кæныныл.

«Иуæй-иу бынæтты ивæм информацион нысæнттæ, уымæн æмæ сæ халынц Гуырдзыстоны æмбæстæгтæ. Хатт сæ æхсæнгарзæй æхсынц, хатт архайынц фыстытæ схафыныл — ахорæнтæй сæ сахорынц. Уымæ гæсгæ куыст цæуы сæ раздæры хуызмæ сæ æркæныныл», — дзырдта делегацийы сæргълæууæг.

Уый ма куыд фехъусын кодта, уымæ гæсгæ механизмты фæстаг фембæлдæй фæстæмæ паддзахадон арæнтæ фехалыны тыххæй ахст æрцыд 37 адæймаджы, уыдонæй 25 сты Гуырдзыстоны æмбæстæгтæ. Уымæ гæсгæ механизмты куысты боны фæткы дæр сæйраг фарстатæй иу уыд паддзахадон арæнтæ халыны фарст.

«Ацы ран фарст баст уыд, æмбæстæгтæ æнæзакъонæй арæнты сæрты кæй хизынц, æрмæст ууыл нæ, фæлæ ма Гуырдзыстоны тыхон структурæты минæвæрттæ дæр. Уыимæ иумæ ма уыдон нысан кæнынц, зæгъгæ, арæнтыл уавæр хъуамæ сабыр уа, æмæ æппæтдæр арæзт цæудзæн, цæмæй арæнтыл уавæр ма æвзæрдæр кæна», — дзырдта Санахъоты Дауыт.

Нæ уацх.

Comments are closed, but trackbacks and pingbacks are open.