Ацы азы кæрон нæ горæты сæйраг фæзуаты арæзт æрцæудзæн егъау музыкалон фонтан. Нæ республикæйы социалон-экономикон рæзтæн ахъазгæнæг инвестицион программæмæ гæсгæ, 23 милуан сомы бæрц хицæн æрцыд ацы арæзтадæн. Ныр цалдæр мæйы дæргъы нæ горæты сæйраг фæзуаты цæуынц арæзтадон куыстытæ ног«сур музыкалон фонтан» саразыны фæдыл. Фонтан саразыны куыстытæ æххæст кæны цæгатирыстойнаг компани «Промикс». Фонтаны арæзтады нырма куысынц дæс адæймаджы æмæ техникæйы дыууæ хуызы. Ныртæккæ куыст цæуы фонтаны демонтажыл, афтæ ма куыст цæуы электромонтажон куыстытæ сæххæст кæныны фæдыл, уый фæстæ та æрæвналдзысты арæзтадон – монтажон куыстытæм.
Нæ республикæйы Арæзтад æмæ архитектурæйы министрады пресс-службæ нын куыд фехъусын кодта, афтæмæй ацы фонтан эксплуатацимæ хъуамæ лæвæрд æрцыдаид ивгъуыд аз, нæ паддзахадон драмон театры ног арæзт бæстыхай эксплуатацимæ лæвæрд куы æрцыд, уæд. Уæд фонтаны дæр арæзта Татарстаны арæзтадон фирмæ «Эверест». Ацы подрядон организацийы кусджытæ бакодтой арæзтадон куыстыты æмбис, фæлæ сын уыцы куыстытæ дæр нæ уыдысты æмбæлон уагыл. Арæзтадон куыстытæ рæстæгыл æххæст кæй не ‘рцыдысты, уымæ гæсгæ нæ республикæйы къухдариуæгад уынаффæ рахаста, цæмæй ацы подрядон организацийы архайд урæд æрцæуа нæ республикæйы.
«Раздæр цы подрядон организаци æххæст кодта фонтаны арæзтадон куыстытæ, уый куыст нæдæр техникон æгъдауæй, нæдæр аивадон æгъдауæй нæ фæцыдис нæ республикæйы къухдариуæгады зæрдæмæ. Уымæн æмæ ацы фонтан аразгæйæ, акцент æвæрд цæуы нæ горæты сæйраг фæзуаты рæсугъдзинады. Уыдон нæ сарæхстысты ахæм рæсугъддзинад æмæ национ колорит равдисынмæ. Уымæ гæсгæ цасдæр рæстæгмæ куыстытæ æрурæдтой, фæлæ æрæджы нæ республикæмæ хуынд æрцыдысты цæгатирыстойнаг компани «Промикс»-ы кусджытæ. Уыдонæн ацы фадыджы ис стыр фæлтæрддзинад. Уыдон тынг серьезон ахаст равдыстой сæ разы æрæвæргæ хæсмæ æмæ сæ куыст æххæст кæнынц стыр бæрндзинадимæ», – загъта пресс-службæйы минæвар.
Ацы фонтаны проект хъуамæ суа инженерон хъуыды-кæнынады универсалон элемент. Фонтаны проект арæзт у националон элементтимæ.Уæлдæр ма йæ куыд банысан кодтам, афтæмæй фонтан уыдзæн музыкалон æмæ йæ дон цы музыкалон мелодиты зæлтимæ кæлдзæн, уыдоны ‘хсæн уыдзæн «Симд»-ы мелоди дæр. Фонтаны диаметр уыдзæн 15 метры бæрц. Пресс-службæйы ма нын куыд фехъусын кодтой, афтæмæй ног фонтанæн заказ æрцыд гермайнаг ифтонггарз, кæцыйы руаджы арæзт цæу-дзысты цалдæр хуызы музыкалон-аивадон циклтæ.
Нæ уацх.
Comments are closed, but trackbacks and pingbacks are open.