Хуссар Ирыстоны  хæствæллад зæхмæ 1992 азы  14 июлы Æмхæццæ фидауынгæнæг тыхты æрконды бон æрвыл аз дæр нысан цæуы цытджын æгъдауæй. Ацы аз дæр уыцы бон Республикæйы къухдариуæгад æмæ раздæры фидауынгæнæг тыхты службæгæнджытæ дидинджытæ сæвæрдтой Фидауынгæнджыты номыл уынджы стеллæйы раз, нырттæккæ уæрæсейаг Арæнхъахъхъæнæг управленийы территорийыл æмæ 2008 азы августы хæстон архайдтыты рæстæджы сыгъд казармæйы раз.

Уыцы бон ма фидауынгæнæг тыхты боны цытæн уагъдцæуæг мадзæлтты фæлгæтты нæ горæты Анахарсисы номыл библиотекæйы байгом тематикон равдыст «Творящим… Мир», зæгъгæ. Мадзалы хайадисджыты рæгъмæ хаст æрцыдысты Гæззаты Иваны хъæдæй куыстытæ, бисер æмæ æндæхтæй  та – Тедеты Залинæйы  конд нывтæ.

Хуссар Ирыстоны ног историйы фидауынгæнæг операцийæн уыд хъысмæтскъуыддзаггæнæн нысаниуæг. Уый йæ нысаниуæгмæ гæсгæ уыд уникалон. Фидауынгæнæг тыхты стыр хайбавæрд нæ бæстæйы стабилондзинад æмæ сабырдзинадмæ æмæ сæ нысаниуæгыл дзырд цыд, 2008 азæй фæстæмæ цы штаб «Миротворец» уæвынад кæны, уый уæнгтимæ республикæйы къухдариуæгады фембæлды æмæ мадзалы. Фембæлды хайад райстой республикæйы бæрнон кусджытæ бæстæйы сæргълæууæг Бибылты Анатолийы сæргълæудæй. Куыд зонæм, афтæмæй Президент йæхæдæг дæр уыд ацы операцийы хайадисæг æмæ ирон батальоны командиры хæдивæг.

Бибылты Анатоли бузныг загъта фидауынгæнæг тыхты операцийы хайадисджытæн æмæ сын арфæ ракодта ацы нысаниуæгджын боны цытæн, уымæн æмæ 26 азы размæ сабырад æмæ фидыдад Хуссар Ирыстоны территорийыл биноныг æрцыдысты фидауынгæнæг тыхты руаджы. Уæд, уыцы уæззау æмæ æндыгъд рæстæджы, Президенты ныхæстæм гæсгæ, уыдон райстой сæхимæ уыцы бæрнон мисси æмæ йæ цæсгомджынæй æххæст кодтой.

«Нæ Республикæмæ фидауынгæнæг тыхтæ конд æрцыдысты Уæрæсейы Федерацийы разамынады хицæн минæвæртты политикон фæндондзинадмæ гæсгæ. Нæ бæстæйы уæды уæззау социалон æмæ экономикон уавæртæ хынцæгæйæ, уыдон райстой уыцы хъысмæтскъуыддзаггæнæн уынаффæ.

Уый уыд Уæрæсейы къухдариуæгады æхсарджын уынаффæ. Уый у нæ истори æмæ йæ хъуамæ хъуыды кæнæм, аргъ ын кæнæм»,- дзырдта Президент.

Зæрдыл æрлæууын кодта Сергей Шойгу, Александр Чиндаров æмæ æндæр æфсæддон командæгæнджыты ахсджиаг хайбавæрд ацы ахсджиаг миссимæ. Фидауынгæнæн позицитæ бахъахъхъæнынæн ацы къухдариуæггæнджыты куырыхондзинад, фæразондзинад æмæ фидардзинад куынæ уыдаит, уæд бæстæйы дарддæры хъысмæт куыд уыдаит, уый бæрæг нæу.

Бибылты Анатоли куыд банысан кодта, уымæ гæсгæ Хуссар Ирыстоны территорийыл фидауынгæнæг тыхты æнтыстджын операци бирæ рæстæг ахуыр цæудзæн специалистты рдыгæй æмæ дзы пайда цæудзæн æндæр конфликтты зонæты. Зæрдыл ма æрлæууын кодта,  уæрæсейаг æмæ хуссарирыстойнаг  фидауынгæнæг тыхты рæнхъытæй 2008 азы чи фæхъуыд, уыдоны рухс нæмттæ.

Сæ рухс нæмттæ сын мадзалы хайадисджытæ ссардтой æмырæй алæугæйæ.

«Гуырдзиаг фидауынгæнæг тыхты службæгæнджытæ, фыццаджыдæр, гадзрахатæй рацыдысты се ‘мслужбæгæнджытыл, кæцытимæ иумæ архайдтой æмæ хъахъхъæдтой сæртæг, фæлæ сабырад»,- дзырдта Президент.

Йæ раздæры æмслужбæгæнджыты Президент Бибылты Анатоли фембæлды рæстæджы схорзæхджын кодта майдантæй. Йæ цæст ноджыдæр бауарзта сабыр арв нæ сæрмæ, уадз, зæгъгæ, фидауынгæнæджы архайд макуы мауал бахъæуæт ирон адæмы.

Цæгатирыстойнаг Æмхæццæ фидауынгæнæг тыхтыл командæгæнæг Хацырты Филипп дæр куыд банысан кодта, уымæ гæсгæ Хуссар Ирыстоны территорийыл фидауынгæнæг тыхты архайдæн стыр нысаниуæг ис.

«Нæ республикæйы цæрджытæн уыцы азтæ уыдысты иууыл уæззаудæр. Уыцы рæстæджы уæрæсейаг къухдариуæгады уынаффæ нæ бæстæйæн ссис хъысмæтскъуыддзаггæнæн. Уыдон архайды руаджы нæ бæстæ фидар кодта æмæ размæ цыд, арæзт цыдысты паддзахадон структурæтæ»,- банысан кодта уый.

Ацы нысаниуæгджын боны ма бузныджы ныхæстæ загъта Уæрæсейы Федерацийы къухдариуæгадæн æмæ фидауынгæнæг тыхты рæнхъыты службæгæнджытæн сæ службæ æмæ архайды тыххæй.
Сабырад бахъахъхъæныны фæдыл Æмхæццæ фидауынгæнæг тыхтыл уæды хисдæр æфсæддон къухдариуæггæнæг Фриты Хъазбег Хуссар Ирыстонмæ фидауынгæнæг тыхты æрбаконды æнæмæнгхъæуындзинадыл дзургæйæ, банысан кодта, уыдон хуссарирыстойнаг æмбæстæгты кæй бахъахъхъæдтой скуынæг кæнынæй. Мах сæ, зæгъгæ, бахъахъхъæдтам нæ тых, хъару æмæ куырыхондзинадæй.

КЪÆБУЛТЫ Маринæ

 

Comments are closed, but trackbacks and pingbacks are open.