Уынаффæ цыд Уæрæсеимæ арæныл  рентгенон басгæрсты фарстыл

Республикæ Хуссар Ирыстоны Парламенты уынаффæ цыд Дæллаг Зæрæмæджы таможнæйон пунктыл рентгенон басгæрсты руаджы уæзтæ, уыцы нымæцы хæлцадон продукттæ ласыны фарстыл дæр.

Ацы фарстыл ныхас бацайадагъ Экономикæ, чысыл амалиуæгад æмæ хъæууон хæдзарады парламентон комитеты. Комитеты сæргълæууæг Джиоты Инал банысан кодта, зæгъгæ, уæрæсейаг таможнæйон службæ фидарæй дзуры рентгенон тынты æдасдзинады тыххæй, фæлæ профилон комитеты раздæры рабадтмæ цы медиктæ хуынд æрцыдысты, уыдонæн сæ хъуыды у æндæр.

Хуссар Ирыстоны таможнæйон комитеты къухдариуæггæнæг Цхуырбаты Мураты ныхæстæм гæсгæ транспортон фæрæзтæ цы аппаратыл ра-цæуынц, уым пайдагонд нæ цæуы рентгенон тынтæй. Уый у инспекцион сгарæн комплекс (ИДС) æмæ уым ницахæм рентгенон тынтæ ис. Ацы куысты пайдагонд цæуы фотонон тынтæй. Уæрæсе нын цы документтæ æмæ сертификат æвдисы, уым фыст ис, зæгъгæ, ацы аппарат æппындæр ницы зиан хæссы транспортон фæрæзтæ æмæ хæлцадæн», – банысан кодта Цхуырбайы фырт.

Йæ ныхасмæ ма бафтыдта, зæгъгæ, Хуссар Ирыстоны таможнæйон службæйы къухы чи ис, уыцы фæстаг зонæнтæм гæсгæ, Дæллаг Зæрæмæджы контролон – уадзæн пункты сгарæн комплексыл цæуæг транспортон фæрæзты нымæц бæлвырд фæкъаддæр. Таможнæйон комитеты сæргълæууæджы ныхæстæм гæсгæ, ныртæккæ транспортон фæрæзты 90 проценты арæны сæрты рахизынц инспекцион сгарæн комплексыл æнæрацæугæйæ.

«Сæрмагонд сгарæнты сæрты рахизынц æрмæст транспорты 10 проценты. Раздæр сгæрст чи цыд, уыцы уæзтæ уыдысты бæрæг фылдæр, уымæн æмæ бафиппайдæуыд сусæгæй тамакотæ ласыны цаутæ. Фæлæ ныртæккæ, æгæрыстæмæй стыр уæзтæ дæр, афтæ сгæрст нал цæуынц», – бамбарын кодта йæ хъуыды Цхуырбайы фырт.

Депутат Къозонты Алан дæр банысан кодта, зæгъгæ, кæд дзырд цæуы фотонон тынæндæвдады тыххæй, уæд уый банымайæн нæй рентгенон тынæндæвдадыл. «Сæрмагондæй рентгенон тынæндæвдады кой куы кæнæм, уæд уый фæдыл ис æнæниздзинад хъахъхъæныны дунеон организацийы нормæтæ. Уым фыст ис, рентгенон тынæндæвдады нормæтæ цæйбæрц хъуамæ уой, уый. Уымæй дæр, таможнæйон комитеты сæргълæууæг куыд зæгъы, афтæмæй арæныл кæд пайда кæнынц фотонон тынтæй, уæд уымæн та рентгенон тынæндæвдадимæ иумæйагæй ницы ис», – загъта Къозонты Алан.

Парламенты Сæрдар Гасситы Петр банысан кодта, зæгъгæ, специалистты хатдзæгтæм гæсгæ, сгарæн комплекстæ ницы зиан хæссынц адæйма-джы æнæниздзинадæн.

«Æз сахуыр кодтон ацы проблемæ, æмæ æнгæс рентгентæ æвæрд сты  УФ-йы  æппæт  уадзæн  пунктты дæр. Ацы аппараттæн бар лæвæрд ис канд Уæрæсейы нæ, фæлæ уыдон æмбæлон сты æппæт дунеон домæнтæн дæр. Специалисттæ куыд бахынцыдтой, афтæмæй ацы аппараттæ ницы зиан кæнынц адæймаджы æнæниз-дзинадæн. Уымæй дарддæр ма ахæм хуызы сгæрст цы автотранспорт цыд, уыдонæн сæ нымæц бæрæг фæкъаддæр ис фæстаг рæстæджы», – банысан кодта Гассийы фырт.

Парламенты сæргълæууæг ма банысан кодта, зæгъгæ, УФ-йы таможнæйон органтæн ис сæхи закъондæттынадон нормæтæ, кусынц уыдонмæ гæсгæ, æмæ арæнты фæтк куы фæлæмæгъдæр уа, уæд уымæй спайда кæндзысты контрабандисттæ.

«Мах куы домæм, цæмæй искæцы продукт, зæгъæм æхсыры продукттæ, рентгеныл ма цæуой, уæд уый фæрцы байгом уыдзæн сусæг фæндаг контрабандисттæн, æмæ уымæй спайда кæнгæйæ, æхсыры продуктты æфсон ласын райдайдзысты, бар цæмæн нæй, ахæм ласинæгтæ», – банысан кодта Гасситы Петр.

Йæ ныхæстæм гæсгæ, ацы фарст скъуыддзаг куыд æрцæуа, уый баст у Хуссар Ирыстон æмæ Гуырдзыстоны æхсæн арæны уавæримæ дæр.

«Мах УФ-имæ арæныл æрбацæуæн фæхуымæтæгдæр кæныныл дзурын куы райдайæм, уæд хъуамæ æрхæссæм Гуырдзыстонимæ нæ арæн гом цæмæн у, уый тыххæй фарст дæр. Зæгъæм Ленингоры районы кусынц арæны сæрты æрбахизыны фæхуымæтæгдæр фадæттæ. Афтæмæй та махæн Гуырдзыстонимæ ницы дипломатон ахастытæ ис, æмæ къух фыст не ‘рцыд хæцæнгарзæй ма спайда кæныны тыххæй меморандумыл», – загъта уый.

Гассийы фырты хъуыдымæ гæсгæ, Хуссар Ирыстонæн ныртæккæ ахсджиаг у Гуырдзыстоны ‘рдыгæй арæны басгæрст фæкарздæр кæнын, уымæн æмæ уырдыгæй ис æцæг тæссагдзинад.

Comments are closed, but trackbacks and pingbacks are open.