Республикæ Хуссар Ирыстоны Фæсарæйнаг хъуыддæгты министрады пресс-службæ куыд фехъусын кодта, афтæмæй 3 февралы Наурумæ РХИ-йы Фæсарæйнаг хъуыддæгты министр Медойты Димитры официалон балцы кæрон горæт Яренейы уыд хуссарирыстойнаг-науруйаг æхсæнпаддзахадон документтыл къухтæ æрфыссыны церемони.
Къухтæ æрфыстæуыд Æхсæнадæмон хъуыддæгты æмгуыстад æмæ æмархайды фарстаты Меморандумыл æмæ дыууæ паддзахады æмбæстæгты кæрæдзимæ цæуыны нысанæн визæтæ аивыны тыххæй Республикæ Хуссар Ирыстон æмæ Республикæ Науруйы хицауадты ‘хсæн Сразыдзинадыл.
Документтыл сæ къухтæ æрфыстой Республикæ Хуссар Ирыстоны Фæсарæйнаг хъуыддæгты министр Медойты Димитр æмæ Республикæ Науруйы Президент Барон Дивавеси Вака.
Меморандумы нысан æрцыдысты æхсæнадæмон хъуыддæгты Хуссар Ирыстон æмæ Науруйы æмахастытæ, сæрмагондæй, науруйаг фарсы æрдыгæй Республикæ Хуссар Ирыстоны интерестæ Иугонд Нациты Организацийы, Науру цы организациты уæнг у, уыцы æхсæнадæмон æмæ регионалон организациты, афтæ æндæр æхсæнадæмон фæзуæтты раразмæ кæнын.
Сразыдзинадмæ гæсгæ иу паддзахады æмбæстæгтæн сæ бон у æнæ визæйæ иннæ паддзахадмæ æрбацæуын, ацæуын, транзитыл цæуын, æмæ йæ территорийыл 90 боны уæвын, алы æрдæг аз дæр.
Сразыдзинад здæхт у алы æмæ алы фадгуыты хуссарирыстойнаг-науруйаг ахастыты дарддæры рæзтмæ, хъуыддагон, туристон, гуманитарон æмæ культурон бастдзинæдтæ рауæрæх кæнынæн хæрзиуæгон уавæртæ саразынмæ.
Церемонийы кæрон Медойты Димитр æмæ Барон Вака сæ хъусынгæнинæгты стыр аргъ скодтой, сæ къухтæ цы документтыл æрфыстой, уыдонæн. Банысан кодтой, зæгъгæ, уыцы документты бындурыл арæзт æрцæудзæн дыууæфарсон ахастыты барадон базæ, уыдон рауæрæх кæндзысты дунеон аренæйы дыууæ фарсы æмахастыты тыххæй фадæттæ.
Кæронбæттæны бæрæгбоны цытæн Медойты Димитр ноджыдæр раарфæ кодта Республикæ Науруйы Президентæн æмæ бузныджы ныхæстæ загъта Барон Вакайæн, Науруйы сæ уæвынады рæстæджы Хуссар Ирыстоны делегацийы зæрдиагæй æмæ рæдауæй кæй райста, уый тыххæй.
Йæ рады сын Президент Барон Вака дæр загъта бузныджы ныхæстæ, Республикæ Наурумæ кæй æрцыдысты, уый тыххæй, æмæ йæ хуссарирыстойнаг делегацийæн бафæндыд амондджынæй сæ Райгуырæн бæстæмæ аздæхын.
Ууыл кæронмæ бахæццæ Республикæ Хуссар Ирыстоны Фæсарæйнаг хъуыддæгты министр Медойты Димитры балц Республикæ Наурумæ.
Comments are closed, but trackbacks and pingbacks are open.