Ацы административон бӕстыхаймæ кӕддӕр фæндæгтæ кодтой, Цхинвалы районы Къостайыхъӕу ӕмӕ йӕ администрацимӕ цы хъӕутӕ хауынц, уыдоны цæрджытæ. Ам куыстой паддзахадон хӕдзарады разамонæг кусджытӕ, уыдысты дзы, библиотекӕ ӕмӕ ӕндӕр уагдæттæ. Фӕлӕ йӕ нысаниуӕг фӕивта, гуырдзиаг лӕгхортӕ Хуссар Ирыстонмӕ сырдон ӕгъдауӕй куы ӕрбабырстой, сабырцӕрӕг ирӕтты милмӕ куы систой, уыцы дӕргъвӕтин ӕмӕ хъизӕмайраг азты. Уӕд ацы бынат сси, райгуырӕн къуым чи хъахъхъӕдта, ӕхсӕвæй-бонӕй чи нӕ хицӕн кодта, уыцы сагсур нӕлгоймӕгты штаб. Дӕргъвӕтин уыдысты уыцы ӕнкъард ӕмӕ ӕнтъыснӕг азтӕ, удхайраг бонтӕ ӕрвыстой уӕд Ирыстоны хъахъхъӕнджытӕ, ӕдзухдӕр мӕт ӕмӕ сагъӕсты уыдысты сомбоны тыххӕй. Фӕлӕ уӕддӕр сӕ ныфс нӕ саст, ӕууӕндыдысты, азты цыдимӕ рӕстдзинад кӕй фӕуӕлахиз уыдзӕн ӕмӕ хъуыддаг афтӕ дӕр рауад. Уӕд хъӕуы хъахъхъӕнджытӕ дӕр хӕрзбон загътой ӕфсӕддон цардӕн, уыимӕ ацы бӕстыхайӕн дӕр.

Кӕй зӕгъын ӕй хъӕуы, ӕвыдӕй нӕ баззад ацы дыууӕуӕладзыгон агъуыст дӕр гуырдзиаг хотыхджынты ‘рдыгӕй, уӕлдай тынгдӕр ыл сӕ тыхтӕ бавзӕрстой 2008-ӕм азы августы хӕсты рӕстӕджы. Иу рӕстӕджы хъӕуы милмӕ систой, алырдыгӕй йӕ ӕхсын райдыдтой ӕмӕ уӕд тынг разиан кодтой астӕуккаг скъола, цӕрджыты хӕдзӕрттӕн, ӕвыдӕй нӕ баззад ацы административон бӕстыхай дӕр. Уымӕй дарддӕр ма уал азы дӕргъы ӕнӕркаст кӕй у, йӕ хъус ӕм кӕй ничиуал дары, уымӕ гӕсгӕ ӕрцыд бынтон раууатмӕ. Хуыздӕр уавӕры нӕй йӕ алыварс территори дӕр, ис бынтон антисанитарон уавӕры ӕмӕ йӕм адӕймаджы цӕст бакӕсын дӕр нал уарзы. Хъӕуы цӕрджытӕ, уӕлдайдӕр та сыхбӕстӕ, тынг тыхсынц кӕстӕрты, уӕлдайдӕр та ӕнахъомты тыххæй, уымӕн ӕмӕ уыдон ам арӕх фервитынц сӕ рӕстӕг, нӕ хъуыды кӕнынц, тынг тӕссаг бынат кӕй у, ууыл. Сӕ фӕндон у, цӕмӕй ацы бынатмӕ рӕстӕгыл ӕркӕсой ӕмбӕлон органтæ, уымӕн ӕмӕ дзы ӕхстыты фӕстиуӕгӕн, гæнæн ис, баззадаид хӕлӕн ӕрмӕджытӕ.

Нӕ республикӕмӕ сомбон хуыздӕр фидӕн ӕнхъӕлмӕ кӕсы  æмæ ацы бæстыхай дæр æнæмæнг искуы бабæздзæн. Дардыл у йӕ территори дæр ӕмӕ уый та иттӕг хорз уаид, хъӕубӕстӕ сӕ улӕфты рӕстӕг кӕм ӕрвитиккой, ахӕм бынатӕн. Иудзырдӕй, ис гӕнӕн ацы бынат фӕткмӕ ӕркӕнынӕн ӕмӕ йыл хъуамӕ батыхсиккой ӕмбӕлон органтӕ.

Хуыбиаты Никъала

Comments are closed, but trackbacks and pingbacks are open.