РХИ-йы Рог атлетикæйы федерацийы фæхуындмæ гæсгæ Цхинвалмæ æрцыдысты Волгограды областы рог атлетикæйы спортивон цæттæдзинады центры директор Владимир Типаев æмæ Белгороды областы рог атлетикæйы федерацийы президент Александр Горлов. Уазджыты балцы сæйраг нысан уыд Цхинвалы рог атлетикæйæ цæттæгæнæн сбортæ ауадзыны уавæртимæ базонгæ уæвын. Фыццаг рады, спортивон функционерты зæрдæмæ цы фæцыд, уый уыд, Цхинвалы равæрд денджызы æмвæзадæй 870 метры бæрзæндæн кæй у, уый. Зындгонд у, ахæм уавæрты сезоны размæ цæттæ кæнын ахъаз у спортивон бæрæггæнæнты рæзтæн.
«Денджызæй ахæм æмвæзадыл Уæрæсейы ис æрмæстдæр иу базæ тренировкæтæ кæнынæн. Базæ ис Кисловодскы. Фæлæ уым тынг бирæ спортсментæ тренировкæтæ кæнынц æмæ дзы алыхатт бынат дæр нæ вæййы. Стæй дзы алцы дæр у зынаргъ. Æмæ бирæ регионалон центртæн фæрæзтæ нæй уым цæттæгæнæн сбортæ уадзынæн. Уымæ гæсгæ агурæм ахæм бынæттæ, цыран фадат ис ахæм сбортæ ауадзынæн. Рагæй нæ фæндыд ардæм æрцæуын. Цъæхилты Игорь нæ рагæй хоны. Уыимæ рагæй зонгæ стæм. Зымæгон рæстæджыты-иу нæм бæстæйы æмбырдгонд командæйы сконды цæттæ кодта йæ хъомылгæнинæгты. Ныр нæхи цæстæй федтам стадион, спортивон залтæ, уазæгдон æмæ мæ зæрдæмæ тынг фæцыдысты», – банысан кодта Волгограды областы рог атлетикæйы спортивон цæттæдзинады центры директор Владимир Типаев.
Владимир Типаев æмæ Александр Горлов ма федтой, стадионы цур цы спортивон комлекс «Олимп» ис, уый дæр. Афтæ ма федтой кросс ауадзыны бынæттæ дæр. Уазджыты зæрдæты спортивон комплекс «Олимп» ныууагъта диссаджы ирд тæлмæнтæ, цыран спортсментæн цæттæ кæнынæн ис æппæт уавæртæ дæр. Сæ ныхæстæм гæсгæ, уыдон фехъусын кæндзысты, Уæрæсейы æмбырдгонд командæйы тренертæн Цхинвалы тренировкæйон сбортæ ауадзынæн цы хорз уавæртæ ис, уыдоны тыххæй.
«Кисловодскмæ фæстæмæ ацæугæйæ, цыран ныртæккæ сæхи цæттæ кæнынц рог атлетикæйæ УФ-йы æмбырд-гонд командæйы уæнгтæ, мах æнæмæнгæй дæр тренертæн зæгъдзыстæм, Цхинвалы тынг хорз уавæртæ кæй ис тренировкæтæ уадзынæн. Сабыр чысыл горæт. Уæлдæф æмæ йæ алфæмблай æрдз дисы æппарынц. Стæй фыццаг рады денджызæй 900 метрмæ æввахс бæрзæндыл кæй ис, уый тынг хорз у спортсментæн. Ам ноджы бæрзонддæр бынаты базæ куы саразиккой, зæгъæм, денджызы æмвæзадæй 1600 метры уæлдæр, уæд уый уаид уникалон арæзтад. Мæн ныфс ис, æмæ æввахс рæстæджы ацы фарстыл дзырд кæй цæудзæн», – загъта Белгороды областы рог атлетикæйы федерацийы президент Александр Горлов
Цъæхилты Игоры ныхæстæм гæсгæ, Хуссар Ирыстоны Рог атлетикæйы федераци алцы дæр сараздзæн, цæмæй уæрæсейаг рогатлеттæ цæуой Цхинвалмæ.
«Мах тынг фæнды, цæмæй нæм цæуой УФ-йы æмбырдгонд командæйы уæнгтæ æмæ уыдонмæ гæсгæ рæза нæ спортсменты цæттæдзинад дæр. Нæ федерацийы президент Икъаты Русланимæ æппæт дæр сараздзыстæм, цæмæй-иу уæрæсейаг спортсментæ ам ауадзой цæттæгæнæн сбортæ. Уый тыххæй сын сараздзыстæм æпппæт æнæмæнгхъæуæг уавæртæ», – загъта Цъæхилты Игорь.
Развæлгъау бадзырдтæм гæсгæ, уалдзæджы уæрæсейаг рогатлеттæ Цхинвалы ауадздзысты ног спортивон сезонмæ бацæттæ кæныны этаптæй сæ иу.
Хуриты Батрадз
Comments are closed, but trackbacks and pingbacks are open.