Октябры дыккаг æмбисы Уæрæсейы Федерацийы Паддзахадон Думæ сратификаци кодта ОАО «Газпром – Хуссар Ирыстон»-ы акцитæ балхæнын æмæ куыстуаты дарддæры архайды тыххæй Хуссар Ирыстон æмæ Уæрæсейы  Федерацийы æхсæн бадзырд.

Бадзырдмæ  гæсгæ Хуссар Ирыстоны фарс æмæ «Газпром» сæ къухтæ æрфыстой 35 азы æмгъуыдмæ куыстытыл. «Газпром»-ы фарс ацы куыстытæн кæндзæн сæ 100 проценты. Бадзырд, кæцы фыст у 35 азмæ, гаранти дæтты ОАО «Газпром – Хуссар Ирыстон»-ы финансон-хæдзарады архайды стабилон уавæртæн.

«Газпром» 2009 азæй фæстæмæ райдыдта уадзын æрдзон газ Хуссар Ирыстонмæ, Уæрæсейы территорийæ «Дзуарыхъæу-Цхинвал» газы хæтæлыл. Ныртæккæ æрдзон газæй Хуссар Ирыстоны домæнтæ сты 35-36 милуан кубометр афæдзы дæргъы, æмæ æххæст цæуынц уæрæсейаг газ уадзæнæй.

Цæмæй республикæйы районтæ æмæ хъæутæ æмткæй газæй ифтонг æрцæуой, уый тыххæй нæ хицауад 2015 азæй нырмæ уадзы бадзырдтæ «Газпром»-имæ. Уæды Президент Тыбылты Леонид «Газпром»-ы правленийы сæргълæууæг Алексей Миллеримæ фембæлды рæстæджы загъта, бакусын кæй хъæуы Хуссар Ирыстоны дарддæры газификацийы фарстатыл, сæрмагондæй та республикæйы хъæутæ газæй сифтонг кæныныл. Уымæн æмæ уый бæстæйы экономикæйы райрæзтæн у иууыл ахсджиагдæр фарст. Цæмæй республикæйы хъæуты цæрджыты цард фæрогдæр уа. Газификацийы руаджы бахъахъхъæд æрцæудзæнис æрдзы рæсугъддзинад дæр.

Уæдæй нырмæ ацы фарстыл цыд æмбæлон куыст, ныры Президент дæр йæ кусæгон балцы рæстæджы Уæрæсейы Федерацийы сæргълæууæгимæ æппынæдзух дзырдта ацы фарстыл.

Июлы мæйы та Бибылты Анатоли ногæй фембæлд «Газпром»-ы къухдариуæгадимæ. Бацæттæгонд æрцыд æппæт документаци дæр æмæ Республикæйы газификаци райдайдзæн фи-дæн азæй.

«Газпром» цæттæ у Хуссар Ирыстоны территорийы газификацийæн 2,5 миллиард сомы рахицæн кæнынмæ.

Бибылты Анатоли æмæ Алексей Миллер уæд æруынаффæ кодтой тарифон политикæйыл дæр, ома газы аргъ кæй суыдзæнис Цæгат Ирыстоны газы аргъы бæрц. Æрмæст æвиппайды нæ, фæлæ цадæггай, республикæйы куыстмызд куыд фылдæр кæна, афтæ. Ныртæккæ Хуссар Ирыстоны газы иу кубометры аргъ у 4,27 сомы, Цæгат Ирыстоны та – 5,47 сомы.

Специалисттæ куыд зæгъынц, афтæмæй республикæйы районты газификацийæн бахъæудзæн 1,5 азы. Цы генералон нывæзт сфидар кодтой, уымæ гæсгæ газæй ифтонг æрцæудзысты 200 цæрæн пункты, газы хæтæл арæзт æрцæудзæн 520 километрæй фылдæр поселоктæ æмæ 370 километрæй фылдæр та – хъæутæм.

Ныртæккæ Хуссар Ирыстонмæ Уæ-рæсейæ магистралон газыхæтæл «Дзуарыхъæу-Цхинвал»-ыл цæуæг æрдзон газæй Хуссар Ирыстоны ифтонг сты æрмæстдæр республикæйы столицæ Цхинвал æмæ æввахс хъæутæй иу.

Уазæгты Марфа

Comments are closed, but trackbacks and pingbacks are open.