Зынаргъ æмфыдыбæстæйонтæ!

Республикæйы цытджын уазджытæ!

Хуссар Ирыстоны ногдæр истори хъæздыг у зæрдылдарæн бонтæй, фæлæ Республикæ Хуссар Ирыстоны бæрæгбонты æмæ зæрдылдарæн бонты къæлиндары 20 сентябрь барджынæй хаст æрцыд нæ сæйрагдæр политикон бæрæгбонты нымæцмæ. Растдæр уыцы бон 26 азы размæ, 1990 азы, Хуссар Ирыстоны адæм дунеон барадон нормæтæм гæсгæ расидт йæ паддзахаддзинад. Ацы ахсджиаг политикон акт, кæцыйы райст уыдис адæмы фæндондзинады ирд равдыст, 2008 азы августы адихтæ кодта постсоветон геополитикон тыгъдады картæ.

Историон барæнтæм гæсгæ 26 азы стыр æмгъуыд нæу. Фæлæ уыцы азты мах бавзæрстам стыр фыдæвзарæнтæ. Хуссар Ирыстоны сабыруарз æмæ хъайтарон адæм республикæ расидтысты комкоммæ æфсæддон агрессийы æмæ карз æфсæддонпо-литикон, финансон-экономикон æмæ транспортон-энергетикон блокадæйы реалон уавæрты, сæ паддзахаддзинад банымайыны дæрзæг фæндагыл рацæугæйæ. Ахæм уавæры мах тох кодтам нæ сæрибардзинад æмæ хæдбардзинады сæрыл 18 дæргъвæтин азы.

Нацийы хæдуагæвæрды бар реализаци кæныны дунеон фæлтæрддзинадыл цæст ахæсгæйæ, цъус цæвиттонтæ ссарæн нæй, иу кæнæ иннæ этнос сæ паддзахаддзинадмæ фæндагыл, нæ адæм цы хъизæмæрттæ бавзæрстой, ахæм хъизæмæрттæ кæй нæ бавзæрстой. Расидгæ паддзахаддзинады дунеон банымады сæрыл хуссайраг ирæтты тохы азфыст фыст æрцыдис нæ адæмы хуыздæр фырттæ æмæ чызджыты тугæй, кæцытæ сæ цард æрхастой сæрибардзинад æмæ хæдбардзинады сæрыл.

Нæ бæстæйы ногдæр истори хъæздыг у адæмы хъайтардзинад, сæрибаруарзондзинад æмæ æнæфæтасгæ уырнындзинадæй, кæцыйы æвдыстой æрæвæргæ хæс æххæст кæнгæйæ. Уыдон ноджыдæр дунеон æмæхсæнадæн бауырнын кодтой, æрдзы кæй нæй ахæм тыхтæ, кæцытæ фæлæууой сæрибар æмæ хæдбардзинадмæ фæндагыл нацийы раз, хæдуагæвæрды æнæфæхицæнгæнгæ хай реализаци кæнгæйæ.

Хуссайраг ирæтты сæрибаруарзондзинадæн, республикæйы хъахъхъæнджыты хъайтардзинадæн аккаг аргъ кæнгæйæ, мæ бон нæу, ма банысан кæнон, нæ хъысмæты стыр Уæрæсейæн, йæ бирæнацион адæмæн æмæ Уæрæсейы Федерацийы уæлдæр политикон разамынадæн цы стыр роль уыдис, уый. Нæ бæстæйы алы цæрæг дæр зоны, кæмæй бузныг сты, махæн сымахимæ æнæдызæрдыгæй хъысмæтхæссæн чи уыд, ахæм уынаффæтæ райсыны — Гуырдзыстоны тыхæй сабырадмæ æркæныны фæдыл операци ауадзын, Хуссар Ирыстонæн æфсæддон æххуыс бакæнын æмæ йын уый фæстæ йæ хæдбардзинад банымайыны. Уый фервæзын кодта нæ адæмы физикон æгъдауæй сæ скуынæг кæнынæй æмæ сæ сæ историон райгуырæн бæстæйæ фæсурынæй.

Æмæ абон ног конкретон уавæрты Уæрæсейы Федераци дарддæр ахадæн æххуыс кæны нæ республикæйæн 2015 азы 18 марты Мæскуыйы дыууæ бæстæйы лидертæ сæ къухтæ кæуыл æрфыстой, уыцы Æмцæдисад æмæ интеграцийы тыххæй бадзырды бындурыл. Зæрдыл лæууын кæнын, уыцы ахсджиаг, куыд фæдзурынц, афтæмæй фæлгæтон ба-дзырдæй дарддæр нæ бæстæты ‘хсæн къухтæ æрфыстæуыд нæуæдзы бæрц æхсæнхицауадон сразыдзинæдтыл, кæцытæй бирæтæ сæ тыхы бацыдысты. Абон Республикæ Хуссар Ирыстоны Паддзахадон æдасдзинад, йæ территориалон æнæ-хъæндзинад æмæ бæстæйы Паддзахадон арæнтæ иумæйаг тыхтæй ныфсджынæй хъахъхъæнынц Уæрæсейы æмæ Хуссар Ирыстоны Гарзджын тыхты дæлхæйттæ. Уый мах хизы ног агрессийы тасдзинадæй, не мбæстæгтæн ифтонг кæны сабырадон, арæзтадон куысты гарантитæ.

Бар мын раттут, уæ номæй стыр бузныг зæгъон Уæрæсейæн, йæ политикон къухдариуæгадæн, сæрмагондæй Владимир Путин æмæ Дмитри Медведевæн, Хуссар Ирыстоны цæрджыты хъуагдзинæдтæм æдзух сæ хъусдард кæй здахынц, уый тыххæй. Нæ бæстæты адæмты æфсы-мæрдзинадæн альтернативæ нæй. Уый бæлвырд æрцыд рæстæгæй æмæ йын йæ дарддæры рæзтæн ис реалон перспективæтæ. Уый бæлвырд æрцыд æн-дæрæбон Уæрæсейы Федерацийы Федералон Æмбырды VII сæвзæрст Паддзахадон Думæмæ æвзæрстыты цæвиттонæй дæр. Ацы æвзæрстыты, Хуссар Ирыстоны цæрджытæй уæрæсейаг æмбæстагдзинад кæмæн ис æмæ хъæлæс дæттыны кары чи сты, уыдон традиционæй равдыстой политикон цæттæдзинад æмæ æрбацыдысты æвзарæн фадгуытæм хъæлæс дæттынмæ.

Цытджын æмбæстæгтæ! Сымах хорз зонут, цалдæр мæйы фæстæ нæ хайад райсын кæй хъæуы Республикæ Хуссар Ирыстоны радон Президентон æвзæрстыты. Ацы политикон мадзалы ахсджиагдзинады тыххæй никæмæн хъæуы æмбарын кæнын. Мах уымæн аргъ кæнæм, куыд нæ бæстæйы Паддзахадон арæзтмæ фæн-дагыл ахсджиаг этап, афтæ, куыд демократийы бындурон принципты фидардзинад æвдисæг,  хъæлæс дæттыны бар кæмæн ис, уыцы æмбæстæгтæн лæвæрд куы æрцæуы Паддзахады лидер сæрибарæй равзарыны бар, сæ бæстæйы, сæхи æмæ сæ сывæллæтты фидæн равзарыны бар. Мах æнæфæцудгæйæ æххæст кæнæм уыцы бындурæвæрд конституцион нормæ-тæ æмæ нæ уырны, æвзæрстытæ кæй ацæудзысты РХИ-йы закъондæттынадмæ гæсгæ.

Сæйраджы мæ банысан кæнын фæнды уый, æмæ Республикæйы бон абон махимæ иумæ нысан кæнынц нæ хæлæрттæ æфсымæрон Цæгат Ирыстоны, Уæрæсейы Федерацийы æмæ дард фæсарæнты ноджы цалдæр бæстæйы. Уымæн æвдисæн сты, республикæйы къухдариуæгады номыл цы бирæнымæц арфæтæ цæуы, уыцы нымæцы Уæрæсейы Федерацийы Президент Владимир Путинæй, Уæрæсейы Федерацийы хицæн субъектты къухдариуæггæнджытæй, æхсæнадон организацитæй, хицæн политикон æмæ æхсæнадон архайджытæй, уыдон. Уымæн æвдисæн у уыцы факт дæр, æмæ ныртæккæ Республикæ Хуссар Ирыстоны боны цытæн цытджын мадзал уагъд цæуы дард Стамбулы. Турчы цæрæг не ‘мбæс-тæгтæй мах исæм зæрдиаг арфæтæ. Турчы ирон æхсæнад «Алан»-ы къухдариуæгад æмæ активисттæ Хъуысаты Садреттин, Пухаты Жале, Хъаныхъуаты Ремзи, Хоситы Бурхан, Абысалты Кай æмæ æндæрты инициативæйæ Стамбулы цытджын уавæрты Хуссар Ирыстоны цытæн байгом равдыст. Мах нæ рох кæны, уыдон Анкара, Стамбул, Измир æмæ Турчы æндæр стыр горæтты 2008 азы августы цы протесты акцитæ ауагътой, уый. Бар мын раттут нæ адæмы номæй уыдонæн зæгъон бузныджы ныхæстæ.

Цытджын хæлæрттæ! Ацы бæрæгбон уын зæгъын иууыл зæрдиагдæр арфæтæ Республикæ Хуссар Ирыстоны боны цытæн! Алкæмæн дæр, алы бинонтæн æмæ алы цæрæгæн дæр мæ зæрдæ зæ-гъы æнæниздзинад, амонд æмæ хæрзиуджытæ. Рæз æмæ дидин æфтау, не взонг Республикæ Хуссар Ирыстон!

Ура, æмбæлттæ!

Comments are closed, but trackbacks and pingbacks are open.