Цхинвалы районы сколаты рауагдонтæн аттестаттæ цытджын æгъдауæй радтыны церемони уыд горæт Цхинвалы. Мадзалмæ æрбацыдысты Цхинвалы районы администрацийы сæргълæууæджы хæдивæг Дзанайты Ингæ, районы скъолаты директортæ æмæ ахуыргæнджытæ.
Рауагъдонтæн зæрдиагæй раарфæ кодта Цхинвалы районы администрацийы ахуырады хайады сæргълæууæг Лолоты Барис. Йæ зæрдæ сын загъта хорз фидæн, ахуыр адарддæр кæнын, професси райсын, цæмæй уой Республикæйæн аккаг сомбон.
Дменисы астæуккаг скъолайы директор Дудайты Земæ раарфæ кодта рауагъдонтæн, загъта сын, цæмæй сæххæст уой сæ фæндтæ, сæ бæллицтæ, сомбон сæ рауайа хорз специалисттæ, цæмæй сæ сæрыстыр уой сæ хъомылгæнджытæ, ахуыргæнджытæ æмæ райгуырæн бæстæ.
Дудайты Земæ ма бузныг загъта Цхинвалы районы администрацийы фæсивæдон политикæйы хайады сæргълæууæг Козаты Олегæн ахæм хорз мадзал сорганизаци кæныны тыххæй.
Аттестаттæ радтыны церемонийы рæстæджы рауагъдонтæн раарфæ кодта Козаты Олег дæр. Бафæндыд æй уыдонæн фидар æнæниздзинад, æнтыстытæ сæ сомбоны царды.
«Царды сымах кæнут фыццаг къахдзæфтæ, фæнды мæ, цæмæй ацы къахдзæфтæ уой æнтыстджын. Адæймаг, гæнæн ис, ма уа стыр ахуыргонд, фæлæ, куыд адæймаг, афтæ хъуамæ уа хорз. Арфæ уын кæнын, цæмæй алыхатт дæр уат хорз адæймæгтæ», — загъта Козайы фырт.
Районы ахуырады хайады методикон кабинеты хистæр Алик Шахпоронов дæр зæрдиаг арфæ ракодта рауагъдонтæн.
«Царды зындзинæдтæ уæ макуы фæтæрсын кæнæд. Зындзинæдтыл тых кæнут æмæ цæут размæ, уæ фæндтæ, уæ бæллицтæ æххæст кæнынмæ», — загъта ма Шахпоронов.
Рауагъдонтæ дæр стыр бузныг загътой районы администрацийæн ахæм хорз бæрæгбонон мадзал сорганизаци кæныны тыххæй.
Мадзалы кæрон рауагъдонтæн радтой зæрдылдарæн лæвæрттæ. Мадзал адарддæр кодтой адджын фынг æмæ музыкалон программæйæ.
Comments are closed, but trackbacks and pingbacks are open.