Республикæйы районты дæр уагъд æрцыдысты цытджын мадзæлттæ Стыр Фыдыбæстæйон хæсты Стыр Уæлахизы 71 азы цытæн.
Дзауы районы администрацийы пресс-службæйы куыд фехъусын кодтой, афтæмæй Стыр Уæлахизы цытæн районы веноктæ æмæ кады гирляндæ сæвæрдтой Стыр Фыдыбæстæйон хæсты фæмардуæвæг хæстонты цыртдзæвæныл.
«9 майы Дзауы поселочы организаци æрцыд бæрæгбонон концерт сфæлдыстадон къорд „Фарн“-ы, вокалон-инструменталон ансамбль „Нартæ“, музыкалон скъолайы ахуыргæнинæгты æмæ æндæрты хайадистæй», — загътой пресс-службæйы.
Знауыры районы культурæйы хайады къухдариуæггæнæг Тедеты Ноннæйы ныхæстæм гæсгæ Стыр Уæлахизы цытæн районы организаци æрцыдысты мысæн изæртæ, концерттæ Стыр Фыдыбæстæйон хæсты хъайтарты цытæн.
«Знауыры поселочы Культурæйы хæдзары нæ зынаргъ ветерантæн бацæттæчындæуыд стыр бæрæгбонон концерт районы сфæлдыстадон коллективты хайадистæй», — загъта Тедеты чызг.
Ленингоры районы культурæйы хайады хистæр Дудайты Динæ дæр куыд фехъусын кодта, афтæмæй Ленингоры поселочы æмæ Цъинагары хъæуы веноктæ æмæ дидинджытæ сæвæрдтой Стыр Фыдыбæстæйон хæсты фæмардуæвæг хæстонты мемориалтыл.
«Уымæй дарддæр ма 9 майы Ленингоры поселочы хæсты хайадисджытæн организаци æрцыдис концертон программæ районы сфæлдыстадон коллективты, скъолаты ахуыргæнинæгты æмæ сывæллæтты цæхæрадоны хъомылгæнджыты хайадистæй», — загъта Дудайты чызг.
Уый ма куыд загъта, афтæмæй Стыр Уæлахизы цытæн бæрæгбонон мадзæлтты активон хайад райстой РХИ-йы УФ-йы Æдасдзинады Федералон службæйы Арæнгæрон управленийы æфсæддон службæгæнджытæ дæр.
Стыр Уæлахизы цытæн бæрæгбонон мадзæлттæ уагъд æрцыдысты Цхинвалы районы дæр.
Банысан кæнын хъæуы уый, æмæ республикæйы æппæт районты минæвæрттæ 9 майы Цхинвалы хайад кæй райстой акци «Æнæмæлгæ полчы», кæцы адарддæр кодта Стыр Фыдыбæстæйон хæсты Уæлахизы 71 азы цытæн æфсæддон парад.
Comments are closed, but trackbacks and pingbacks are open.