Горæты уынгтæ сыгъдæг кæнын æрмæст хæрзарæзтады кусджыты хæс нæу, фæлæ ма цæрджыты дæр. Уынгты арæзтадмæ ацы аз ноджыдæр бафтдзæн аст.
Уыдоныл мах тынг фæцин кæнæм. Фæлæ цасфæнды уынгтæ ма аразой, уæддæр сæм дарддæр хъæуы зилын, сæ рæсугъддзинад сын ноджы аивдæр кæнын. Цæмæннæ ис гæнæн, æмæ алы хæдзары раз цæрджытæ дидинджытæ, декоративон къутæртæ æмæ æндæр мыггаг бæлæстæ ныссадзой? Сæ къухты руаджы сæхи æмæ уынгты цæуджыты зæрдæтæ дæр уæд рухс кæндзысты ахæм рæсугъддзинадæй.
Фæлæ, хъыгагæн, хатт афтæ дæр вæййы, хæрзарæзтады кусджытæ цы дидинджытæ ныссадзынц, уыдонæй бирæтæ дыккаг бон фæтары вæййынц. Адавынц сæ æмæ хæрзарæзтады кусджытæн сæ фыдæбон дзæгъæлы фæвæййы. Масты хай свæййынц кусджытæ, горæты цæрджытæ…
Горæт дæр æмæ йæ рæсугъддзинæдтæ дæр иумæйаг сты æмæ йыл цы иугай адæймæгтæ фыдаудæн кæнынц, уыдон раргом æмæ бафхæрын хъæуы. Цæвиттон, нæ сахары цы хисæрмагонд хæдзæрттæ ис, уыдонæй алы хæдзары акомкоммæ ис уынджы тротуары кæцыдæр хай. Æмæ хæдзары хицау дæр уыцы тротуары хаймæ йæ хъус куы дара, сыгъдæг æмæ йæ рæсугъд куы кæна, куы дзы ныссадза дидинджытæ, уæд цас фæрæсугъддæр уаид нæ горæт!
Зонын, бирæтæ зæгъдзысты, зæгъгæ, уый мах хæс нæу, ис хæрзарæзтады кусджытæ, уый тыххæй исынц мызд æмæ сæ куыст кæнæнт. О, фæлæ дæ хæдзары раз рæсугъд, хæрзæфснайд куы уа, уæд дзы дæхæдæг дæр исдзынæ æхцондзинад æмæ ма хæдзарæн дæр аивдæр хуыз уыдзæн.
Бирæ сты Цхинвалы йæ хæдзары раз тротуар æдзух сыгъдæг кæмæн у, ахæмтæ дæр. Зилынц сæм, куыд сæхи хæдзары кæртмæ, афтæ. Сæ разы ныссадзынц алыгъуызон дидинджытæ æмæ уынджы цæуджытæн сæ зæрдæтæ райынц уыцы тæмæссаг дидинджыты гауызы уындæй. Ахæм цæрджытæн фæарфæтæ кæнын уынджы адæм. Уыдон бирæ сты, фæлæ мæ дæнцæгæн æрхæссын фæнды Владимир Путины (раздæры Мæскуыйаг) уынджы цæрæг Зассеты бинонты. Уыдон нæ быцæу кæнынц искæмæ. Сæхæдæг иудадзыгæй зилынц сæ хæдзары раз дидинджытæм.
Сæ цæрæнбынаты раз срæсугъд кæны-ныл чи архайы, алыгъуызон дидинджытæй сæ чи сфæлындзы, уыдон хорз цæвиттон æвдисынц. Хорз уаид, ацы бинонтæ æмæ иннæ ахæмты, горæты администраци дидинджыты мыггæгтæ æмæ декоративон къутæртæй куы ифтонг кæнид.
УАЗÆГТЫ Марфа
