Кæд адæймаджы цард, цалынмæ студент свæййы, уымæй бирæ раздæр райдайы уæддæр, бирæтæн сæйрагдæр æмæ ахсджиагдæр къахдзæфыл нымад вæййы, уæлдæр ахуыргæнæндонмæ бацæуын. Уæд фæбæрæг вæййынц æвзонг адæймаг скъоламæ цæугæйæ цы зонындзинæдтæ райста, цахæм фæндтæ æмæ йæм хъуыдытæ сæвзæрд, уыдон. Абон бирæ уæлдæр ахуыргæнæндæтты нысан кæнынц Студенты (Татьянæйы бон). Ацы бæрæгбоны агъоммæ нæ уацхæссæг фембæлд Хуссар Ирыстоны паддзахадон университеты ахуыргæнджытæ æмæ студенттæй цалдæримæ æмæ йын радзырдтой сæ бæрæгбоны тыххæй сæм цы хъуыдытæ, фæндтæ æмæ зæгъинæгтæ сæвзæрд, уыдон тыххæй.
Университеты студентты хъомыладон-профориентацион куыстыты фæдыл проректор Цхуырбаты Иннæ.
– Зынаргъ студенттæ! Зонын, ис уæм стыр тырнындзинæдтæ зонæдты бæрзæндтæм æмæ сæ æнтысгæйæ æххæст кæнут уæ уарзон университеты. Уырны мæ, фæуыдзыстут университет æмæ стыр хайбавæрд хæсдзыстут нæ уарзон, æвзонг æмæ рæзинаг Хуссар Ирыстоны рæзт æмæ размæцыдмæ. Уæ бæрæгбоны сæраппонд уын арфæ кæнын æмæ уын мæ зæрдæ зæгъы цæмæй æнтысгæйæ исат æмæ пайда кæнат уæ абоны тæхудиаджы уавæртæ æмæ рæстæгæй, цы бирæ æмæ уæм алы-гъуызон хорз æмæ раст хъуыдытæ фæзыны, уыдонæй.
Сæудæджерад æмæ хæдзарадон арæзтæдты 4-æм курсы студент Гæджиты Арсен.
– Афтæ мæм кæсы æмæ алы æвзонг адæймаг дæр йæхи хуыздæр æмбарынхъом куы фæвæййы, уæд райдайы хъуыды кæнын, скъола каст куы фæуа, уæд кæдæм ацæуа, йæ ахуыр кæм адарддæр кæна, ууыл. Æз тынг раджы бауарзтон нæ уæлдæр ахуыргæнæндон æмæ скъола каст куы фæдæн, уæд мын, кæд фадат уыдис æндæр горæт, æндæр уæлдæр ахуыргæнæндонмæ ацæуынæн, уæддæр нал аивтон мæ фæнд. Æнтысгæйæ радтон бацæуæн фæлварæнтæ æмæ сдæн университеты студент. Лектортæ æмæ ахуыры уавæртимæ бæстондæр куы базонгæ дæн, уæд хуыздæр бамбæрстон, раст кæй аскъуыддзаг кодтон, уый. Хорз бынат ссардтон куыд ме ‘мкурсонтæ, афтæ лекторты раз дæр. Уымæн æмæ нæ хъуыды кæнын æмæ исгуы лекци-мæ афоныл не ‘рбацыдтæн, хорз нæ бацæттæ кодтон фæлварæнтæм. Уымæй дарддæр ма, бирæ æндæр студенттимæ активон хайад исын, университеты цыдæриддæр мадзæлттæ уагъд фæцæуы, уыдоны. Æппæт уыдæтты тыххæй мын университеты разамынд кæны хорз аргъ æмæ кад, исын Президенты стипенди.
Студенты (Татьянæйы боны) цытæн мæ раарфæ кæнын фæнды æрмæст нæ университеты студенттæн нæ, фæлæ дунейы æп-пæт студенттæн дæр. Афтæ университеты ректор Тедеты Ва-димæн. Университеты алыварсон æнтыстытæн ахъаз сты Хуссар Ирыстоны Президент Бибылты Анатолийы иузæрдион æмæ æппынæдзухон хорз ахастытæ æмæ йын мах дæр зæгъæм бузныг. Бузныджы ныхæстæ зæгъын ма мæ фæнды, æрвылбон дæр нын цæстуарзонæй йæ зо-нындзинæдтæ чи хæлар кæны, уыцы лектортæ æмæ ахуыргæнджытæн дæр.
Юридикон факультеты 4-æм курсы студент Джиоты Аннæ.
– Студенттæ сты, æхсæнад стыр ныфс кæмæй æвæры, ахæм фæлтæр. Рухс фидæнмæ бæлгæйæ алы студент дæр архайы йæ размæцыдыл. Уый ирдæй бæрæг у нæ университеты студенттæй. Нæ факультеты студенттæ буц, райгонд æмæ сæрыстыр сты сæ уавæртæ æмæ фадæттæй. Цæмæй æвзонг адæймагæн йæ зонындзинæдтæ æмæ арæхстдзинæдтæ фæбæрæг уой уый тыххæй, университеты ис æппæт уавæртæ дæр. Университеты цы зонадон-студентон æхсæнад ис, уым студенттæ кæрæдзийæн базонын кæнынц сæ чысыл зонадон куыстытæ æмæ уый хорзæрдæм бандавы бирæ æндæр студенттыл.
Зарын кафын, чи уарзы, уыдонæн дæр ис хорз фадæттæ. Уни-верситеты кусы кафджыты æмæ зарджыты къордтæ. Студенты Советы куыст дæр рæзы бонæй бонмæ. Æз мæхæдæг дæр дæн йæ уæнг. Арæх ауадзæм поэтикон æмæ музыкалон мадзæлдтæ.
Æвзонгад æнæхъæнæй дæр спорт у. Университеты ис цалдæр спортивон секцийы æмæ сæм не студенттæ цæуынц æнæзивæгæй, сæхи фæлварынц бирæ спорты хуызты. Уыцы нымæцы стъолы теннис, волейбол, бокс æмæ æндæр хуызты. Æппæт уыдæтты тыххæй бузныг университеты ректор Тедеты Вадимæн. Цæмæфæнды йæм ма бахатæм, алы хатт дæр нын нæ фарстыл ахъуыды кæны бæстон æмæ саразы æмбæлон хатдзæгтæ.
Ирон-уырыссаг факультеты 3 курсы студент Къуылыхты Аннæ.
– Афтæ мæм кæсы æмæ уæлдæр ахуыргæнæндоны ахуыргæнинæгтæн сæ иууыл хъæлдзæгдæр æмæ рæсугъддæр рæстæджытæй иутæ сты се студентон бонтæ. Уымæн æмæ æмбæлынц бирæ æмæ алыгъуызон хъæлдзæг æмæ царды ахсджиаг чи у, ахæм цаутæ æмæ зонындзинæдтыл. Ацы хъуыдытæ мын ноджы фæтынгдæр сты, студент куы сдæн, уæд. Университеты рæсугъд æмæ райдзаст къæлидортæ æмæ аудиторитыл цæст ахæсгæйæ, адæймаджы зæрдæ æнæ бахъæлдзæг нæ фæвæййы. Алчи дæр нæ банкъары сæрыстырдзинад, ахæм бæстыхайы кæй ахуыр кæнæм, уый тыххæй. Уымæй дарддæр ма ахуыр кæнын æртыккаг курсы æмæ нæ хъуыды кæнын, искуы мæм искæцы лектор тызмæг цæс-тæнгасæй æрбакаст. Се ‘нгас алы хатт дæр вæййы, раст цымæ сæхи хъæбултæ стæм, уый хуызæн. Канд æз, афтæ алы студент дæр райгонд у нæ университеты ректор Вадим Ботазы фыртæй. Уымæн æмæ уый алы студентмæ дæр байхъусы лæмбынæг, цы аскъуыддзаг кæны, уымæй та алы хатт дæр баззайæм райгондæй. Студенты (Татьянæйы боны) цытæн ма зæрдæбынæй арфæ кæнын, нæ университеты æмæ æндæр бæстæты дæр абон студенты ном чидæриддæр хæссы, æппæт уыцы æрыгон фæлтæртæн. Мæ зæрдæ сын зæгъы, цæмæй ноджы бæрзонддæр исой студенты кадджын ном.
Фæсарæйнаг æвзæгты дыккæгæм курсы студент Тедеты Гермаген.
– Афтæ чи дзуры, зæгъгæ, студентон бонтæ сты иууыл адджындæр æмæ зæрдыл бадаринагдæр, уыдон раст сты. Уымæн æмæ уæд æвзонг адæймаг фенкъары, алыгъуызон хъæлдзæг æмæ удæн æнцойдзинад чи хæссы, ахæм миниуджытæ. Райсы, дарддæр ын ахъаз чи уа, ахæм зо-нындзинæдтæ. Дæн дыккаг курсы æмæ лекторты раз мæ ахуыр, æгъдау æмæ зондахастæй кад кæнын мæхицæн. Нæ лекторты зонындзинæдтæ сты дардыл, куы нын сæ фæамонынц, уæд сæм фæхъусын лæмбынæг æмæ алы хатт дæр райсын хорз зонындзинæдтæ. Раппæлинаг хъуыддаг ма у, фæсарæйнаг бæстæтæй нæм лектортæ кæй æрцæуы æмæ нын лекцитæ кæй бакæсынц, уый дæр.
Не студенттæ хорз зонындзинæдтæ æмæ хъомылдзинæдтæ исынц клуб «Аполлон»-ы дæр. Арæх йæ рабадтыты ныхас фæцæуы зындгонд æмæ сгуыхт фысджытæ, нывгæнджытæ, музыкантты цард æмæ сфæлдыстадыл. Нæ университеты «Литературон уа-зæгдон» кæй архайы, уый дæр хорзæрдæм æндавы, чи йæм цæуы, уыцы студентты зонындзинæдтæ æмæ удыхъæдыл. Уымæн æмæ ам бæстонæй фæцæуы дзырд куыд фыссæ-гæн йæхиуыл, афтæ йæ уацмыстыл дæр. Студенттæй сфæлдыстадон куыст чи кæны, уыдон дæр ам бакæсынц сæ уацмыстæ.
Университеты куысты æмæ царды ма активон хайад исынц «Студенты совет»-ы уæнгтæ дæр. Уыдон æрвылаз дæр сæ рабадтыты æрдзурынц æмæ аскъуыддзаг кæнынц, университет æмæ студентты цардæн ахъаз чи у, ахæм, къорд фарстайы. Уымæй дарддæр ма нæ университеты архайы вокалон-инстументалон ансамбль. Архайынц дзы, музыкалон фæлтæрддзинад кæмæ ис æмæ ацы къабазы æнтыстытæм чи тырны, ахæм студенттæ. Уыдон арæх университеты мадзæлтты рæстæджы сæ программæтимæ ралæууынц залы уæвджыты раз æмæ сын сæ арæхстдзинадæй бахъæлдзæг кæнынц сæ зæрдæтæ. Иу дзырдæй, нæ университеты студенттæн ис иттæг хорз уавæртæ цæрын, ахуыр кæнын æмæ æппæт хъуыддæгты дæр хи хорзæрдæм равдисынæн æмæ уыцы фадæттæй мах дæр пайда кæнæм æнтысгæйæ.
Гæззаты Иван
Comments are closed, but trackbacks and pingbacks are open.