Рæстдзинады сæрыл хæцын æви рæстдзинадæй тæрсын…

Уæдæ афтæ: алчи дæр загъта йæ ныхас, алчи дæр равдыста йæ цæстæнгас, байхъуыстам иуæрдæм дæр æмæ иннæрдæм дæр… Æниу нæм хъуамæ æрмæстдæр иуæрдæм уаид, уымæн æмæ армыдзаг йедтæмæ не стæм,  иуæрдæм-иннæрдæмтæн не ‘нтысæм. Фæлæ уый æндæр фарст у, нæ хъысмæтæй нын ис ахæм ныхыфыст  абонæй нæу афтæ, æнусты дæргъы нæ мары æмæ куынæг кæны уыцы гакк…

Фæлæ цыма бынтондæр ницы радта, алчи дæр йæ ныхас кæй загъта, уый…

Уæддæр æмæ уæддæр уынæм сæгъ æмæ бирæгъы æмбисонд!

Митингтæ чи райдыдта, уыдонæн фадат уыд цалдæр изæры сæ позици размæ кæнынæн, сæ домæнтæ хъæлæсыдзаг фехъусын кæнынæн. Президент дæр загъта: нæ цæрынхъуаг кæстæры æвирхъау мæлæтæй политикæ мачи аразæд, цы стыр æнамонддзинад ныл æрцыд, уым  чидæриддæр аххосджын у, уыдон дзуапп ратдзысты закъонмæ гæсгæ. Уæдæ æнамонддзинад кæуыл æрцыд, уыцы мыггаджы хистæр дæр æрсидт адæммæ æмæ фæндвидарæй загъта мыггаджы позици: нæ мардæй нын мачи пайда кæнæд!

Уæддæр!.. Бирæгъæн, дам, æмбисæндтæ хастой, уый та – ауадзут, дам, мæ уæлæ, дам, сæгъ фæлидзы…

Алчи дæр нæ цахæмфæнды позици ма  æвдиса, иуæрдыгæй дæр æмæ иннæрдыгæй дæр цыфæнды лозунгтæ ма рахæссæм, уæддæр уыдæттæй уыцы цардбæллон лæппу нал райгас уыдзæн, йæ чысыл си-дзæрты никуыуал барæвдаудзæн, цы æвирхъау трагеди ныл æрцыд, уыцы трагедийы худинаг нæ намысæй никуыуал ссæудзæн!..

Нæ, уæддæр!

Цæуыл у нæ тох, хорз адæм? Армыдзаг ирон адæмы кæстæртæй иуы æнæзакъонæй, æвирхъау мардæй кæй амардтой, ууыл?.. Уæд бузныг – алкæмæн дæр, рæстдзинад зæгъынхъом кæй стæм, адæймаджы цард нын уæлдайаг кæй нæу, закъон халын кæй нæ уадзæм. Фæлæ цæмæннæ æмбарæм иу хъуыддаг, масты фæдыл цæуын, цы ‘рцыд, уый æмбæлон уагæй равзарыны бæсты нæ сæвзæргæ уавæр карздæр кæнын фыддæр фыдбылызтæм кæй кæны?..

Дзабиты лæппуйы кæй æрцахстой, æгъатыр над æй кæй фæкодтой, æвирхъау мард æй кæй акодтой, уый нысан кæны закъоныл къахæй балæгæрдын, адæймагдзинады рæсугъд фарны нытту кæнын. Фæлæ фæзуаты æмæ Фейсбукы закъонмæ гæсгæ æвзæрст президенты, паддзахады сæргълæууæджы йæ бынатæй асурынмæ сидын цавæр закъоны фæлгæтты батъыссынмæ хъавут?..

Адæмы кæрæдзийыл чи ардауы, удæвдæрзæг тасы бын сæ чи дары, уыдонæй нæ куыд хъуамæ бауырна, искæй марды мæт сæ ис, уый? Чизоны сыл баууæндæн уыдис фыццаг бонты, фæлæ рæстæг цæуы, æмæ афон у, сæ ныхæстæ æмæ сын сæ митыл ахъуыды кæнæм, адæмæн цытæ дзырдтой, уыдæттæй сæ бафæрсæм: цы фæцис, афтæ кæмæй дзырдтат, Путин æй «широкими полномочиями» рарвыста, зæгъгæ, уый?.. Цы фесты, «Бибилов Битаровæй 100 омоновецы ракуырдта æмæ рацæуынц», кæмæй дзырдтат, уыдон? Цы фесты, сентябры цыппæрæм бон сихорафонмæ æввахс «уже тъунелæй чи рахызт», уыцы 100 «Тагъд æххуысы» машинæйы?..

Æппæт уыдæтты фæрцы адæммæ уынг-тæм рацæуынмæ чи сидт, уыдонмæ ноджыдæр уыд алыгъуызон дезинформацион фæрæзтæ, фæлæ сæ цæсты – æгæрыстæмæй, сæхи цæсты дæр – бафтыдта иу æнахуыр хъуыддаг: иутæ дзы фæйнæрдæм зыгъуытт кодтой ахæм информаци, цыма «Нургалиев Чъребамæ æрцыд Бибиловы бахъахъхъæнынмæ æмæ нæ фидар фæлæууын хъæуы», иннæтæ та цыма: «Нургалиев æрцыд, цæмæй Бибиловы йæ бынатæй раппара æмæ дзы рæстæгмæ искæй сбадын кæна…».

Æмæ, хæйрæг чи фестадаид, уый дæр æй нал базыдтаид, кæцы верси сын дзы растдæр уыд, уый. Æниу, кæд рабæрæг, иу верси дæр сын дзы кæй нæ уыд раст, уæддæр цы – исчи хатдзæгтæ сарæзта уымæй, исчи хатыр ракуырдта уый тыххæй? Ничи.

Ничи радта дзуапп, президент митингы цы цалдæр фарсты радта, уыдонæн дæр, иу фарстæн дæр ын дзы ничи сдзуапп кодта. Уый та рæстдзинад рæстдзинады охыл агурын нæ нысан кæны, уый æнгом æмæ æмуд æхсæнадыл дзурæг нæу. Президент цы цалдæр фарсты радта, уыдонæй иу у ахæм: нæ республикæйы территорийыл ссардæуыд, цалдæр азы размæ кæй амардæуыд, ахæм æртæ марды, иу дзы разынд ирон, хæрзæвзонг лæппу, иннæ дыууæ – дагъыстайнæгтæ. Уыцы ирон лæппу дæр цæрынхъуагæй æрцыд мард, уымæй дæр – хъизæмайраджы мардæй. Уæдæ иннæ дыууæ дæр сæ бинонтæн уæлдайаг кæм уыдаиккой, уыдон дæр тæригъæд куыд нæ сты, стæй  æндæр паддзахады æмбæстæгтæ уыдысты, уый та нæ республикæйæн стыр политикон дзæхст у. Æмæ лæг ма бирæгъы æвварс дæр куы рахæцы – раст у президент, ахæм фарст кæй дæтты, зæгъгæ, кæд уæ рæстдзинады мæт ис æмæ адæммæ рæстдзинады сæрыл сидут, уæд уыцы рæстдзинад цæмæннæ домут æртæ марды тыххæй…

Ахъуыды ма кæнæм уыдæттыл, хорз адæм. Ахъуыды ма кæнæм ууыл дæр, æхсæвæй-бонæй нын зонд чи амоны, кæрæдзийы ныхмæ нæ чи кæны, уыдо-нæн сæ иу хай сæхи цæмæн æмбæх-сынц, кæд раст сты, уæд, Интернеты ныл фæсномыгтимæ æмæ гамхудты æм-бæхстæй цæмæн «тыхсынц»?.. Цæмæн-нæ хъуыды кæнæм уыдæттыл, хорз адæм?..

Цæмæннæ ахъуыды кæнæм ууыл, кæйдæрты рæстдзинады мæт кæй нæй, уыдон тæрсгæ кæй кæнынц рæстдзинадæй. Хуссар Ирыстоны абон цы адæм цæры, цалдæр азы размæ дæр дзы уыцы адæм цардысты. Гъемæ, абон уыцы адæмыл чи «тыхсы», уыдон сыл цалдæр азы размæ цæмæннæ тыхстысты? Хæсты фæстæ, цæмæй хæстарыд Хуссар Ирыстон йæ къахыл слæууа, уый тыххæй нын стыр Уæрæсе цы миллиардтæ æрæрвыста, уыдоны кой нал кæнæм – хуымæтæджы адæм, алыгъуызон организацитæ нын сæ удыбæсты тыххæй цы æхцатæ æрæрвыстой, уыдон цалдæр адæймагыл дихгонд цæмæн æрцыдысты, чидæртæ дзы сæ хъуыртæй цæмæн акалдысты, нымад адæймæгтæн сæ æрæрвыстой æви махæй алкæмæн дæр?..

Цæмæннæ хъуыды кæнæм уыдæттыл, хорз адæм, абон ныл «зæрдиагæй чи тыхсы», уыдоны се зноны хабæрттæй бафæрсынхъом цæуылнæ стæм?..