25-æм январы информацион агентад «Спутник»-ы пресс-центры уагъд æрцыдис Хуссар Ирыстоны уæвæг «Россотрудничество»-йы сæргълæууæг Сергей Скворцов æмæ нæ республикæйы уæрæсейаг æмбæстæгты организацийы къухдариуæггæнæг Хъотайты Светланæйæн пресс-конференци, цыран уыдон æрдзырдтой ацы аз сæ куысты плæнтты тыххæй.

Сергей Скворцовы ныхæстæм гæсгæ «Россотрудничество» фæнд кæны Советон дуджы шаблонтæй ахизын, æндæр бæстæтæн Уæрæсейы гуманитарон æххуыс рæгъмæ куы нæ хастой æмæ сæ куы нæ хъæр кодтой, уæды рæстæгæй. «Мах фæнд кæнæм уæрæсейаг бизнес Хуссар Ирыстонмæ æрбакæнын, уыцы хъуыддаджы минæварад уыдзæн æхсæны лæг хуссарирыстойнаг бизнес-æмæхсæнадимæ», – загъта уый.

Сергей Скворцов ма банысан кодта, зæгъгæ, Хуссар Ирыстоны «Россотрудничество»-йы минæварад активон æмархайд кæны республикæйы уæрæсейаг æмбæстæгты Координацион советимæ, æмæ уымæн та йæ сæйраг информацион партнер у «Спутник» Хуссар Ирыстон.

«Уæрæсейаг æмбæстæгты организацитæ махæн æххуыс кæнынц мадзæлттæ уадзыны хъуыддаджы, мах кусæм иумæ иумæйаг тыхтæй æмæ æнæ уыдон, кæй зæгъын æй хъæуы, нæ уынæм нæ архайд дæр», – загъта Сергей Скворцов. Уый ма банысан кодта, республикæйы «уæрæсейаг æмбæстаг» куыд æмбæрст цæуы, уый. «Хуссар Ирыстоны бирæ адæм сæхи нымайынц уæрæсейаг æмбæстæгтыл. Æз афтæ нымайын, æмæ адæймаг Уæрæсейы Федерацийы æмбæстаг куы уа кæнæ куы зона уырыссаг æвзаг, уæд уый фаг нæу, уæрæсейаг æмбæс-таг у ахæм, кæцы уарзы æмæ зоны Уæрæсейы, абон цахæм у, ахæмæй», – загъта Скворцов.

Ацы аз бæрæгбонон мадзæлттæ ауадзыны тыххæй дзырд куы цыдис пресс-конференцийы, уæд банысангонд æрцыд, зæгъгæ, ацы фарст баст у республикæйы эпидемиологон ситуациимæ. «Мах фæнд кæнæм бæрæгбонон изæртæ æмæ мадзæлттæ ауадзын Уæлахизы бæрæгбонмæ, Уæрæсейы боны цытæн, афтæ ма уæрæсейаг фысджыты юбилейты тыххæй. Нæ планмæ ма бахастам конкурстæ, викторинæтæ æмæ æндæр ахæм мадзæлттæ ауадзын дæр. Фæлæ алцы дæр баст у, нæ республикæйы эпидемиологон ситуаци куыд уыдзæнис, ууыл», – банысан кодта Хъотайты Светланæ.

Йæ рады ма Сергей Скворцов цы-быртæй æрдзырдта, Хуссар Ирыстоны абитуриенттæй уæрæсейаг уæлдæр ахуыргæнæндæттæм квотæты фæлгæтты «Россотрудничество»-йы хаххыл чи цæуа, уыдон сæ документтæ ахуырмæ кæй хъуамæ бадæттой онлайн-режимы, уый. «Æвзарæн кампани уагъд цæудзæнис онлайн-режимы. Нæ уыд-зæнис конкурс портфолио, абитуриенттæ, сæ хæдзæрттæй нæ ра-хизгæйæ, рацæудзысты тест кæ-нын.

Скворцов ма куыд фехъусын кодта, афтæмæй ацы аз Хуссар Ирыстонæн квотæты нымæц нæ фæивтой – 18, нæдæр – уæлдæр ахуыргæнæндæтты номхыгъд. Уый ма банысан кодта, зæгъгæ, «Россотрудничество»-йы минæварад оптимистонæй кæсынц сæ куыстмæ æмæ, сæ, зæгъгæ, ацы аз сæ плæнттæ реализаци æрцæудзысты.

Нæ уацх.

Comments are closed, but trackbacks and pingbacks are open.