РХИ-йы Хицауады Сæрдар Пухаты Эрикæн кусæгон балц уыд Знауыры районмæ ахуырадон уагдæттæ бабæрæг кæныны нысанæн. Йемæ ма уыдысты Ахуырад æмæ зонады министр Гасситы Натали æмæ Знауыры районы администрацийы ахуырады хайады хистæр Гæбæраты Эльвирæ.
Хицауады Сæрдары хæдивæг фембæлд Уахтъана æмæ Хъорнисы хъæуты скъолаты ахуыргæнджытимæ, афтæ ма Цъорбисы хъæуы сывæллæтты цæхæрадоны кусджытимæ.
Уахтъанайы скъолайы фембæлдмæ æрбацыдысты ахуыргæнинæгты ныййарджытæ, кæцытæ фыстæг ныффыстой РХИ-йы Президент Тыбылты Леониды номыл, цыран уыдон скъолайы коллективимæ иумæ курынц Уахтъанайы æнæххæст астуæккаг скъолайæ астæуккаг иумиагахуырадон скъола саразын. Афтæ ма ныййарджытæм фарстытæ уыд, республикæйы Ахуырад æмæ зонады министрад цы модернизацийы план æххæст кæны, уый фæдыл дæр. Уыдон сæрмагондæй цымдыис кодтой, рацарæзтытæ бандавдзысты сæ куыстмызд æмæ ахуыргæнджыты штатон нымæцыл æви нæ, уымæ дæр. Ныхасы рæстæджы банысанчындæуыд, зæгъгæ, модернизацийы процесс нæ бандавдзæн, цы фарстыты кой ракодтат, уыдоныл.
«Модернизаци уадзыны рæстæджы иунæг ахуыргæнæг дæр йæ куысты бынат æмæ йæ куыстмызд нæ фесафдзæн, бахъахъхъæд æрцæудзæн штатон ранывæзт дæр. Æмæстдæр ивд æрцæудзæн скъолайы ном, кæцы, гæнæн ис æмæ хуыйна Терегуаны базæйон скъолайы филиал».
Фембæлды рæстæджы Гасситы Натали æрæмбырдуæвджыты хъусдард аздæхта, модернизацийы планы рæстæджы иунæг хъæууон скъола дæр æхгæд кæй не ‘рцæудзæн, уымæ. «Ацы фарст Президент Тыбылты Леонидмæ ис уæлдай контролы бын», – бамбарын кодта Ахуырады министр.
«Æппæт нæ архайдтытæ дæр здæхт сты ахуыргæнджытæ æмæ ахуыргæнинæгты пайдайæн. Мах цæттæ кæнæм корректировкæтæ, кæцыты фехъусын кæндзыстæм октябры, Æхсæнхицауадон къамисы радон рабадты. Æмæ нын хæрзчысыл шанс дæр куы уа, æнæхъæн аз, раздæр куыд уыд алцыдæр, афтæ ныууадзынæн, уæд дзы спайда кæндзыстæм. Президент æмæ Хицауады сæрдар æмбаргæ ахаст равдыстой нæ позицимæ æмæ хæцынц йе ‘вварс», – банысан кодта Гасситы Натали.
Ахуырад æмæ зонады министр ныхас кодта ахуыргæнджытæ æмæ ныййарджытимæ, афтæ ма бацыд уроктæм дæр. Ныхасы рæстæджы ныййарджытæ банысан кодтой, зæгъгæ, райгонд сты скъолайы ахуыр-хъомыладон процессæй. Министр йæхæдæг дæр райгондæй баззад, цы федта æмæ фехъуыста, уымæй.
Дарддæр балцы хайадисджытæ бацыдысты Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты Хъорнисы ногарæзт астæуккаг скъола æмæ Цъорбисы хъæуы сывæллæтты цæхæрадонмæ. Пухаты Эрик ныхас кодта ахуырадон уагдæтты кусджытимæ æмæ байхъуыста, се ‘рвылбонон архайды цы проблемæтыл æмбæлынц, уыдонмæ.
Куыд рабæрæг, афтæмæй, ацы хъæутæн раздæрау актуалон у доны хъуагдзинады проблемæ, æмæ Цъорбисы сывæллæтты цæхæрадоны та хъæуы хæрзарæзт хъазæн фæзуат. Хицауады сæрдары хæдивæг банысан кодта, зæгъгæ, цы проблемæты тыххæй фехъуыста, уыдонимæ зонгæ у республикæйы къухдариуæгад, æмæ куыд гæнæн уа, афтæ скъуыддзаг æрцæудзысты.
РХИ-йы Президент æмæ
Хицауады пресс-службæ
Comments are closed, but trackbacks and pingbacks are open.