РХИ-йы Президент Тыбылты Леонидæн кусæгон фембæлд уыд Республикæйы Хъахъхъæнынады министр Гассеты Ибрагимимæ, кæцыйы рæстæджы æруынаффæ кодтой ведомствойы хъуыддæгтыл.

Фембæлды Президент банысан кодта, паддзахадон арæзтады цахæм нысаниуæг ис мобилон æфсадæн, уый.

«Æфсад у ахæм тых, кæцы хъуамæ уа кæцыфæнды паддзахады дæр. Нæ республикæйы Гарзджын тыхты хæстæ сты уый мидæг, цæмæй нæ адæмы, нæ республикæйы ныхмæ гарзджын агрессийы рæстæджы аккаг ныхкъуырд лæвæрд æрцæуа знагæн, æппæт хъæуæг æфсæддон ресурс æмæ потенциалæй спайда кæнгæйæ», – загъта Тыбылты Леонид.

Йæ ныхæстæм гæсгæ нæ республикæйы Гарзджын тыхты позицитæ æмæ æфсæддон хъомысад сфидардæр кæныны тыххæй ист цæуынц æппæт мадзæлттæ дæр, арæзт цæуы хъæуæг уавæртæ, хуыздæр кæны хуссарирыстойнаг æфсады техникон ифтонгад, баххæст цæуынц йæ кадрон рæнхъытæ.

«Æз уынын Республикæйы Хъахъхъæнынады министрады æрвылбонон куыст, кæцы здæхт у стабилондзинад æмæ æдасдзинад бахъахъхъæнынмæ. Бузныг зæгъын алы рæнхъон салдатæн, алы афицерæн æмæ къухдариуæггæнæг скондæн се службæйы тыххæй. Фæлæ, уыимæ иумæ курæг дæн, цæмæй ма рох кæнат, Хъахъхъæнынады министрады, куыд æндæр æфсæддон къабæзты, афтæ хатт кæй цуды дисциплинæ. Уый та райсинаг нæу», – йæ ныхасмæ бафтыдта Президент.

Тыбылты Леонид æвæрццаг аргъ скодта, Уæрæсейы Федерацийы специализацигонд æфсæддон уагдæтты уæлдæр æфсæддон ахуырад чи райстой æмæ фæстæмæ ведомствомæ чи æрыздæхтысты, уыцы æрыгон афицерты куыстмæ райсыны динамикæйæн. Уыимæ хъусдард аздæхта, куыст кæй райдыдта пенсион ифтонгады фæдыл, радзырдта, Гарзджын тыхты кæй райдайдзысты дæттын иурæстæгон бафыстытæ, уый тыххæй æмбæлон уынаффæ райст æрцыд раздæр.

Хъахъхъæнынады министр Гассеты Ибрагим банысан кодта, зæгъгæ, республикæйы Гарзджын тыхтæ кусынц уставмæ гæсгæ. Афтæ ма министр Президентæн фенын кодта, ахæм хуызы документы æппæт стандарттæн дæр дзуапп чи дæтты, уыцы æфсæддон билеты.

«Республикæйы Гарзджын тыхты рæнхъытæм цæуы радон æрсидт. Уыдон сты 147 адæймаджы. Уыдоны ‘хсæн ис ахæмтæ, кæцытæн се ‘нæниздзинад æмæ ахуыры тыххæй службæйы æмгъуыд раздæр адарддæр æрцыд. Абоны бонмæ мах æрбæстон кодтам æфсæддон æфтауцдæтты, уыи-мæ бæстон æрцыд ахуыртæ уадзæн территори дæр», – загъта министр.

Гассейы фырты ныхæстæм гæсгæ министрадæн ныр ис йæхи æфсæддон билет, ахæм документ лæвæрд цæудзæн, службæ чи бакæна, уыдонæй алкæмæн дæр.

«Афтæ ма мæ фæнды фехъусын дын кæнон, Къуайса æмæ Дменисы фæдыл дæ хæслæвæрд æххæст кæй æрцыдис. Мах фæфылдæр кодтам ацы здæхтыты æфсæддон службæгæнджыты контингент æмæ ныртæккæ уым службæ кæнынц 30 адæймагæй фылдæр.

Фембæлды кæрон Гассеты Ибрагим бакаст Хъахъхъæнынады министрады бардзырд, кæцымæ гæсгæ сæйраг командæгæнæгæн лæвæрд æрцыд ведомствойы фыццаг министр Хуыбылты Валерийы майдан.

Президент банысан кодта, зæгъгæ, ацы майданæй хорзæхджын кæй æрцыд, уый йын у стыр цыт.

«Валери уыд йæ адæмы æцæг фырт, министрады бындурæвæрæг, йæ бæстæйы патриот, иу ныхасæй, тыхджын адæймаг. Ахсджиаг у, фидæны фæлтæртæ кæй рæздзысты, ахæм цæвиттоныл», – загъта Тыбылты Леонид.

РХИ-йы Президенты

пресс-службæ

Comments are closed, but trackbacks and pingbacks are open.