Паддзахады сæргълæууæг дыццæджы рацыд ревакцинаци горæт Цхинвалы республикон бирæпрофилон медицинон центры поликлиникæйы. Уæрæсейаг вакцинæ «Спутник Лайт»-ы ревакцинацийы фæстæ Бибылты Анатоли йæхи хаты хорз æмæ йæ кусгæ бон арвыста йæ графикмæ гæсгæ.

Президент банысан кодта, дзыллон вакцинацийы ахсджиагдзинад, куыд иунæг фадат COVID-19 ма апарахат кæнынæн. Уый зæрдыл æрлæууын кодта, вакцинаци кæй у æрмæст хи бахъахъхъæнынæн нæ, фæлæ ма дæ алыварс адæмы дæр.

«Кæд адæймаг йæхи хаты бæрнджынæй æхсæнады раз, уæд сараздзæн вакцинæ. Ныхас цæуы нæ æдасдзинадыл, цардыл, нæ хиуæтты æнæниздзинадыл. «Спутник V»-йы дыккаг компонент æз сарæзтон 2021 азы 16 июлы, ныр ревакцинаци рацыдтæн «Спутник Лайт»-æй.

Æз курæг дæн алкæмæй дæр, цæмæй серье-зон ахаст уа ацы низмæ æмæ саразой вакцинæ, уый у иунæг æмæ иууыл ахсджиагдæр фæрæз COVID-19 ныхмæ тох кæнынæн. Республикæйы вакцинацийы ныллæг æмвæзад æркæны тæссаг фæстиуджытæм. Республикæ Хуссар Ирыстоны территорийыл бæрæг æрцыд дыууæ сæдæйы онг амæлæты хабар, уыцы статистикæмæ алчидæр йæ хъус хъуамæ дара, нæ гыццыл горæтæн уый егъау цифрæ у. Ахсджиаг у хи бахъахъхъæнын, уæлдайдæр уый хауы хистæр кары адæммæ», – загъта Бибылты Анатоли.

Процедурæйы хайадисæг Республикон бирæпрофилон медицинон центры директор Джио-ты Витали радзырдта Президентæн Хуссар Ирыстоны коронавирусон инфекцийæ рынчынты уавæры æмæ вакцинацийы темпты тыххæй.

«Президент йæ цæвиттонæй фенын кодта, ахсджиаг кæй у бæрндзинад райсын æмæ вакцинæ саразын. Абоны бон Хуссар Ирыстоны вакцинаци сарæзтой 1600 адæймаджы. Мах дæттæм вакцинаци ацæуыны тыххæй æвдисæнтæ, цыран фиксаци цæуынц вакцинаци саразыны бонтæ. Ацы документ нымад у Уæрæсейы территорийыл, æмæ махмæ QR кодтæ кæй нæй, уый тыххæй не ‘мбæстæгтæй бирæтæ ацæуынц Цæгат Ирыстонмæ æмæ уым рацæуынц вакцинаци.

Comments are closed, but trackbacks and pingbacks are open.