Республикæ Хуссар Ирыстоны Президент Бибылты Анатоли бабæрæг кодта «Республикæ Хуссар Ирыстоны гом институт». Цхинвалы Паддзахады сæргълæууæг базонгæ ис «Ирон чиныджы бынтæ»-йы программæимæ, кæцы æххæст цæуы Президенты хæслæвæрдмæ гæсгæ.
«Гом институт»-ы куысты фæлгæтты арæзт цæуы ирон авторты æмæ нотæты халдихтæ æмæ цæуынц нымæцгонд.
Институты ректор Дмитрий Котов куыд радзырдта, афтæмæй халдихтæ саразæн ис алыгъуызон амæлттæй æмæ ифтонггæрзтыл.
«Чингуытæн халдихтæ саразæн ис тагъд, кæд чиныг хицæн кæны йæ хъæбæрцъарæй, уæд. Афтæмæй куыстыл ацæуы бæрцæй цалдæр минуты. Фæлæ ма ис æндæр амал дæр, кæцыйæ пайда кæнæм стæм æмæ тынг зынаргъ чингуытæн. Ахæм уавæры чиныг халдихгонд æрцæуы къухæй æмæ йæ хъæуы цалдæр сахаты», – загъта ректор.
Ахæм чингуытæй сæ иу у 1936 азы «Ирон фольклор», кæцыйы æрбахаста Национ музейы директор Зассеты Мераб æмæ йын халдих сарæзтой Президенты цæсты раз.
Дмитрий Котов куыд банысан кодта, афтæмæй халдих æмæ нымæц кæныны фæстæ чингуытæн ссарæн ис сайтыл ironkniga.rf. Уым ма байхъусæн ис аудиочингуытæм дæр.
Президент стыр аргъ скодта институты куыстæн æмæ банысан кодта, ахæм программæ тынг ахъаз кæй у ирон æвзаджы программæйы рæзтæн.
«Ацы программæйы фæрцы кæмæнфæндыдæр фадат ис йæ телефоны бакæса ирон фысджыты уацмыстæ. Уый тынг ахсджиаг у æмæ ахъаз кæны национ æвзаджы рæзтæн», – загъта Бибылты Анатоли.
Президент ма бабæрæг кодта, онлайн-лекцитæ цы конференц-залы уагъд æрцæуынц, уый дæр.
«Йæ мидис уый мидæг ис, æмæ конференцийы кæнæ лекцийы хайад райсын кæй фæнды, уыдонæн сæ бон у социалон хызæгты фæрцы сæм байхъусын. Афтæмæй алкæмæн уыдзæн йæ хъуыдытæ зæгъын æмæ фарстатæ радтыны фадат, æцæгæй дзы хайад чи исы, уыдон æмрæнхъ», – загъта уый.
«РХИ-йы гом институт» цæттæ кæны 14 здæхты фæдыл. Институт дæтты дипломтæ, кæцытæ ны-мад сты Уæрæсейы Федерацийы дæр. Хуссар Ирыстоны территорийыл институты программæтæ æххæст цæуынц æнæаргъæй.
Республикæ Хуссар Ирыстоны Президенты пресс-службæ
Comments are closed, but trackbacks and pingbacks are open.