Сабитæ нæ фидæн, нæ сомбон сты. Уымæ гæсгæ раст уыдон хæрзиуæгæн арæзт цæуы абон æппæт дæр нæ республикæйы.

Фæстаг азты нæ республикæйы цыдæриддæр арæзтадон куыстытæ æххæст цæуы, уыдон фыццаг рады баст сты сабийы сомбоны хæрзиуæгыл.

Ацы бонты РХИ-йы Президент Тыбылты Леонид бабæрæг кодта нæ горæты сывæллæтты №6 рæвдауæндон «Радуга»-йы. Йемæ ма уыдысты Хицауады Сæрдары хæдивæг Пухаты Эрик, Ахуырад æмæ зонады министры хæдивæг Лолаты Аслан, Президенты Контролон управленийы хистæр Къодоты Таймураз, горæты Администрацийы хистæры хæдивæг Пухаты Димитр, горæт Цхинвалы ахуырады управленийы хистæр Джиоты Агуындæ.

Бæрæг куыд у, афтæмæй ацы сывæллæтты рæвдауæндоны сабиты ныййарджытæ Президентмæ ныффыстой коллективон фыстæг, цыран домдтой, цæмæй администрацийы 6-æм рæвдауæндонæн рахицæнчындæуа, сабитæ сæхи кæм ирхæфсой, ахæм хъазæн фæзуат.

Президент æмæ йе ‘мбæлццонтæ сфæнд кодтой бынаты бабæрæг кæнын сывæллæтты 6 рæвдауæндоны уавæр.

«Радуга»-йы коллектив æмæ сабиты Президент баййæфта уынджы тезгъогæнгæ. Сабитæ бæстæйы сæргълæууæгыл æмбæлдысты стыр райзæрдæйæ. Æзфæраздæронæй йын истой йæ къух.

Президент бацыд æмæ бабæрæг кодта, сабитæ кæм хæрынц æмæ улæфынц, уыцы хатæнтæ. Лæмбынæг каст æмæ цымыдис кодта, санитарон нормæтæ куыд хъахъхъæд цæуынц, рæвдауæндон цы цух у æмæ хистæр кары сабиты ахуырадон-хъомыладон процесс куыд цæуы, æппæт уыдæттæм. «Сабиты хæр-зиуæгон цардæн аразын хъæуы æппæт дæр. Сæрмагондæй æз мæхæдæг цæттæ дæн уыдон фидæныл аудынмæ. Фæнды мæ, цæмæй алы ныййарæг, хъомылгæнæг æви хицауады кусæг дæр, тырна уыцы хъуыддаг саразынмæ», – загъта Президент.

6-æм рæвдауæндоны хистæр Пухаты Джульеттæ Тыбылты Леонид æмæ йе ‘мбæлццæттæн радзырдта, рæвдауæндон абоны бон æххæст кæй у æппæт инвентарæй дæр. Ис дзы æппæт уавæртæ дæр хорз куыстæн. «Хæсты размæ цы зындзинæдтæ æвзæрстам, уыдон фæстейæ баззадысты. Абон нæ сабитæ рæзынц сыгъдæг арвы бын. Нал тæрсæм æхстытæй, блокадæ æмæ æндæр мæлæтхæссæг хæсты фæзындтытæй. Хицауады фæрцы абон нæ сабитæн ис хъармдзинад, фæлмæн хуыссæнтæ æмæ рæзгæ сывæллоны организмæн æнæмæнг цы у хæлцæй, æппæт уыцы продукттæ. Абон мах рæвдауæндоны ис 197 хъомылгæнинаджы. Уыдон иууылдæр сты æнæниз æмæ амондджын», – зæгъта Президентæн Пухаты Джульеттæ.

Горæты администрацийы ахуырады управленийы хистæр Джиоты Агуындæ та загъта: «Сæрдыгон рæстæг сабиты рæвдауæндæттæ сæйраг акцент аразынц сабиты ирхæфсæн мадзæлттыл. Ног ахуыры азæй сабидæттæ дæр æрæвналдзысты ахуыры процессмæ», – загъта Джиоты Агуындæ.

Президент æмæ йе ‘мбæлццæттæ  райгондæй баззадысты сывæллæтты рæвдауæндоны сыгъдæгдзинад æмæ куысты уавæртæй. Уый фæстæ Тыбылты Леонид бабæрæг кодта сывæллæтты рæвдауæндоны кæрты хиирхæфсæн хъазæнтæ æвæрд кæм хъуамæ æрцæуой, уыцы бынат.

«Тагъд ацы кæрты фæзындзæн, сабитæ сæ удыдзæбæхæн кæм хъазой æмæ ирхæфсой сæхи, ахæм хъазæн комплекс», – загъта Президент сабиты рæвдауæндоны коллективæн.

Уый фæстæ Тыбылты Леонид бабæрæг кодта цæрæн массивы, Остъайы фырты уынгыл арæзт цы спортивон зал цæуы, уый. Куыд зонæм, афтæмæй ацы аз нæ республикæйы Президент Тыбылты Леониды хъæппæрисæй фæсивæды æнæниздзинадмæ хъусдарыны тыххæй бакуыст æрцыд программæ «Спорт в шаговой доступности»-йыл. Президент йæ сæйраг хæсыл нымайы республикæйæн фидæны æнæниз фæсивæд схъомыл кæнын. Йæ программæмæ гæсгæ, азы кæронмæ хъуамæ нæ горæт æмæ районты конд æрцæуа аст спортивон гом фæзуаты æмæ аст та – спортивон залтæ. Уыдон иууылдæр ифтонг цæуынц Президенты резервон фонды финансон æххуысæй.

Спортивон залты ис алыгъуызон тренажертæ æмæ спортивон инвентарь. Уый хуызæн залтæ конд æрцыд горæты алы районты цалдæр ран æмæ ныр та арæзт цæуы, Остъайы фырты уынджы цы кæлæддзаг, афтид бæстыхай уыд, уым. Ныридæгæн ам цæуы сæрдæн-цалцæггæнæн куыстытæ. Уый фæстæ зал ифтонг æрцæудзæн, уый размæ нæ горæты цæгатварс БАМ-ы, ЦАРЗ-ы æмæ Текстилы районты цы спортивон зал æмæ фæзуаттæ байгом, уыдонау.

Уазæгты М.

Comments are closed, but trackbacks and pingbacks are open.