Уæрæсейы Федерацимæ уæлдæр ахуыргæнæндæттæм кæй арвитынц ахуыр кæнынмæ, уыцы студенттæн æмæ курсанттæн практикæ рацæуын, кæй зæгъын æй хъæуы, сæ райгуырæн бæстæйы æнцондæр вæййы. Æмæ ахæм фадат кæмæн фæзыны, уыдон дзы спайда кæнынц. Мидхъуыддæгты министрады хаххыл цы курсанттæ ахуыр кæны Уæрæсейы, уыдон дæр фылдæр хатт практикæ рацæуынц ам, Хуссар Ирыстоны барадхъахъхъæнæг органты.

Ныридæгæн УФ-йы Мидхъуыддæгты министрады Орловы æмæ Воронежы юридикон институтты 3-æм курсы ахуыргæнинæгтæ практикæ цæуынц РХИ-йы милицийы Слестгæнæн управленийы. Æдæппæт сты авд курсанты, кæцытæ ахуыр кæнынц ахæм факультетты, куыд «Правовое обеспечение» æмæ «Национальная безопасность». Практикæйы рæстæджы ахуыр кæнынц нормативон-барадон акттæ, зонгæ сæ кæнынц журналтæ æмæ чингуыты хыгъд бæстон аразыны æууæлтимæ, слестгæнæджы службæйон хæстимæ æмæ сæ куысты сæйраг фæдыздæхтимæ, практикон æгъдауæй уынынц слестгæнæг æмæ иннæ службæты ‘хсæн кæрæдзиимæ архайды формæтæ.

Ацы практикæ ахæсдзæнис суанг июлы мæйы фæудмæ. Августы мæйы райдианы та Слестгæнæн управленимæ ахæм практикон ахуырмæ æрбацæудзысты УФ-йы Мидхъуыддæгты министрады Краснодары университеты 3-æм курсы курсанттæ.

ДЖИОТЫ Алыксандр

Comments are closed, but trackbacks and pingbacks are open.