Ирыстон курдиатджын адæймæгтæй хъæздыг кæй у, уымæн та радон хатт æвдисæнтæ систæм. Хуыцаубоны, 6-æм ноябры Уæрæсейы Фыццаг каналы эфиры æвдыст цыд алæвæрд «Лучше всех». Уым хайад райста не ‘мтуг чысыл чызг Плиты Николь æмæ нын нæ зæрдæтæ барухс кодта йæ диссаджы курдиатæй.

Уыцы райсом 6-аздзыд Плиты Николь райхъал зынгæ адæймагæй. Уый размæ УФ-йы Фыццаг каналы программæ «Лучше всех»-ы эфиры чысыл чызг равдыста йæ курдиат поэзийы зонындзинады. Сывæллоны курдиат куыд рæзын кæнын хъæуы, уый тыххæй NOAR-æн радзырдта йæ мад Плиты Зæлинæ.

– Николь йæ курдиатæй дисы баппæрста æппæт бæстæйы. Уый мады хъомылад у æви чызг йæ райгуырдæй архайы рæзты студиты?

Николь райгуырд Мæскуыйы, поэзи йын йæ райгуырдæй фæстæмæ кæсын æз. Æмдзæвгæтæ æцæгæйдæр зоны бирæ æмæ алыгъуызæттæ, уæлдай тынгдæр йæ зæрдæмæ цæуынц Æвзист æнусы поэттæ, уæлдайдæр та – Иосиф Бродский. Мæ чызг хорз кæсы прозæ дæр, уый диссагдæр уымæн у ахæм кары сывæл-лонæн, æмæ нырма кæсын дæр æмæ, цы бакæсы, уый радзурын дæр йæ бон нæма вæййы. Рæзты студимæ бацыдыстæм 3,5-аздзыдæй.

– Куыд уыд йе сфæлдыстадон рæзт?

Николь бирæ хæттыты хайад иста алыгъуызон Кæсджыты конкурсты æмæ-иу сæ алы хатт дæр бацахста призон бынæттæ. 4-аздзыдæй йæ схорзæхджын кодтой УФ-йы Паддзахадон Думæйы Уæрæсейы тыххæй фыст æмдзæвгæтæ бакæсыны сæраппонд. Ацы аз апрелы мæйы 5-аздзыдæй фыццаг бынат бацахста сывæллæтты сфæлдыстады фæдыл Уæрæсейы Кубокы, «прозæйы» категорийы (ацы конкурсы хайад райсын сæ бон у 5-12-аздзыд сывæллæттæн).

– Куыд бахаудтат сымах Фыццаг каналмæ?

Мах федтам анонс, байдзаг кодтам анкетæ, рацыдыстæм кастинг, уæлæмхас этаптæ æмæ нæ уый фæстæ фæхуыдтой финалмæ.

– Николь куы сыстыр уа, уæд æй цы специалист фæнды суæвын? Ды йæ цахæм профессийы уыныс?

Чызгæн ис бынтон гармонион рæзт, уый æрмæст поэзимæ нæ цымыдис кæны. Николь архайы балеты, хорз ныв кæны æмæ зары, цæуы хуымæтæджы сывæллæтты цæхæрадонмæ, ныртæккæ архайы скъоламæ цæттæгæнæн къорды. Куы йæ бафæрсынц, зæгъгæ, дæ цы специалист суæвын фæнды, уæд сдзуапп кæны, кæй йæ фæнды балеринæ суæвын æмæ Стыр театры кафын, кæнæ та куыд йæ мад, афтæ дохтыр суæвын. Ивгъуыд аз сæххæст йæ чысыл бæллиц – уый кафыд Стыр театры сценæйыл, балет тынг йæ зæрдæмæ цæуы. Фæлæ фидæны фылдæр цæмæ бацымыдис кæндзæн, уый нæ зонын. Мах иумæ арæх цæуæм спектаклтæм, музейтæм, равдыстытæм. Цард æй фенын кæндзæн, райсом ын цымыдисон цы суыдзæн, уый.

– Бацамон ма нын дæ фæлтæрддзинад сывæллоны курдиат куыд рæзын хъæуы?

Мæнмæ афтæ кæсы, æмæ хъуамæ уарзай дæ сывæллоны æмæ йын рæстæг алы хатт дæр ссарай. Æз æй нæ зонын, исты хицæн «рецепт» ис, уый.

– Рæстæг куыд ссарыс уыцы-иу рæстæджы куыст æмæ сывæллонимæ архайынæн?

Уый иууыл зындæр фарст у. Ныртæккæ æз демæ ныхас кæнын пациентты райсты фæстæ, кусын дохтыр-гинекологæй. Ныр та ацæудзынæн сывæллæтты цæхæрадонмæ Николы ракæнынмæ. Куыд загъдæуы, «графиктæ æмæ трафиктæ» сты иууыл вазыгджындæр – вазыгджын куысты график, уыимæ зын у мæскуыйаг пробкæты цæуын. Афтæ куы саразай, цæмæй сывæллон бацымыдис кæна æмдзæвгæмæ, уæд æм йæхи æлвасдзæн. Йæ райгуырдæй фæстæмæ йын кæсын æмдзæвгæтæ, иу хатт дæр нæ бафынæй стæм æнæ аргъæуттæй.

 

– Николь вæййы Ирыстоны? Зоны йæ мадæлон æвзаг?

Æз ын арæх дзурын Ирыстоны тыххæй. Иу рæстæджы тынг уарзта æмæ зыдта Хетæгкаты Къостайы «Ирон фæндыр». Николь ныридæгæн зоны иуæй-иу æмдзæвгæтæ, æгæрыстæмæй фæлвары иронау цыдæртæ дзурынмæ дæр. Ирыстонмæ æрцæуын арæх нæ бон не свæййы бæрæг аххосæгтæм гæсгæ. Куы æрцæуæм, уæддæр цыбыр рæстæгмæ. Хъуамæ æрцыдаиккам ноябры рай-дианы, фæлæ афтæ рауад æмæ Николæн уыд æндыгъд график: къуырисæры йæ систой фильм «Мама всегда рядом»-ы, сабаты та – рекламæйы, æртыццæджы уыд Фыццаг каналы, цыппæрæмы æмдзæвгæтæ каст Уæрæсейы Федерацийы Советы (дыккаг аз æй фæд-фæдыл хонынц æмдзæвгæтæ кæсынмæ сывæллæттæ-хъайтарты схорзæхджын кæныны церемонимæ).

– Кæд фæнд кæнут Ирыстонмæ æрцæуын?

Æз Николæн баныфсæвæрдтон Ног азы æрцæуын. Куыд нын рауайа Ирыстонмæ æрцæуын, уый рæстæг фенын кæндзæн.

Уæдæ ирон адæм сæрыстыр куыннæ хъуамæ уой ахæм курдиатджын адæймæгтæ, куыд Гергиты Валери, Адырхаты Светланæ, актертæ Беройты Егор, Уататы Бибо, Бестауты Татьянæ оперон зарæггæнджытæ Джиоты Вероникæ, Гагиты Иринæ æмæ бирæ æндæрты сын Стыр Хуыцауы цæст балæвар кæнын кæй бауарзта, уымæй.

Сомбоны Плиты чысыл чызгмæ дæр стыр фидæн кæй æн-хъæлмæ кæсы, ууыл дызæрдыггæнæн нæй. Гæнæн ис рауайа зынгæ балеринæ, кæнæ зарæг-гæнæг, кæнæ та суа Тугъанты Махарбеджы фæдон. Хуыцау зæгъæд! Фæлæ уал нын нырма нæ зæрдæтæ барухс кодта йæ диссаджы курдиатæй.

Comments are closed, but trackbacks and pingbacks are open.