ТУГÆВДЫЛД НОГАЗ

Иры хæхбæстæ, –

     Кодтам нæхицæн

Царды фæрæзтæ…

Бирæ – нæ лæггад

      Не ‘лдар сыхæгтæн,

Уыдон та кодтой

     Сау ныв нæ сæфтæн!..

     Æмæ куы ‘рлæууыд

Ногæй тыхы дуг, –

    Ир та сын фестад

Цыма – фысты дзуг…

Иурайсом айхъуыст

    Не ‘хсæн фыдхабар:

«Хотыхджын гуырдзы

    Бацахстой сахар!»

    Тох ныл ныккодта

    Зымæджы карзы! –

Фаг нын нæ фесты

    Дыууынæм азы!..

     Ног джугъелитæ

Сау фæндтæ уафынц, –

     Не стджытыл та нын

Кафынмæ хъавынц!

«Уазæг» сыхæгтæ

     Махмæ – цыбырдзырд:

«Кæнæ – цагъартæ,

     Кæнæ – быныскъуыд!»

     Арæзт нæ риутæм

Топпы кæсæнтæ, –

     Гæрæхтæй уынгты –

Туджы лæсæнтæ!

Сыхæгты паддзах

    Тугмондаг Звиадæн

Фырцинæй нал ис

     Иуран æрбадæн:

    «Ис уал нæ къухты

‘Нæсæттон Цхинвал! –

     Дарддæр цы кæнæм.

Уый дæр – нæхи бар!

    Мачи равдисæт

    Хи уым тæппудæй.

Хъуамæ цæваг гал

    Ма здæха хъугæй!».

    Тохтæ, фæдистæ…

Сæрра нæ сафæг:

    Хæлы, нæ тулы

Уымæн йæ сауфæнд…

Иры лæппутæн

     Ахæм сæ равзæрст:

«Кæнæ – хæдбар цард,

    Кæнæ та – цардсæфт!».

 Тохы сæ алчи –

Йе ‘хсар æвдисæг, –

    Ласы йæ мæрдтæ

Иры зæххисæг.

 Саумаст ивылы

Звиад-сырды хурхæй:

    «Ойме, ивæрзы

Цхинвал нæ къухæй!».

Тохтæ, фæдистæ, –

     Цъус адæм – сидзæр:

Никуыдæм хъуысы

    Иры фæдисхъæр!

     Бæрзонд хицæуттæ

Хъазынц æмбырдтæй,

    Бæстæ та байдзаг

Цардхал лæгсырдтæй!..

    Архайæм тохты –

    Н ‘авналæн цас у…

Хи зæххыл хæсты

    Дур дæр нæ фарс у.

    Ссæдзы бæрц рацыд

Тугуарæн бонтæй, –

     Асыгъдæг Цхинвал

Звиады лæгхортæй!..

Федтам: цæваг гал

    Аздæхти хъугæй…

Иры зæхх – хъулон

Дыууæ сырх тугæй!

Comments are closed, but trackbacks and pingbacks are open.