Хицауады уæнгтæ 21-æм декабры æруынаффæ кодтой цалдæр ахсджиаг фарстыл. Æмбырд уагъта Хицауады Сæрдар Джуссойты Константин.

Ныхас цыд актуалон фарстатыл, уыцы нымæцы пенсион ифтонгады тыххæй дæр. Хуссар Ирыстоны пенсионерты царды æмвæзад уымæй нæ фæбæрзонддæр уыдзæн, фæлæ уæддæр 2023 азы пенситæ фæфылдæр уыдзысты 8,03 процентæй. Æнæниздзинад æмæ социалон рæзты министр Плиты Агуындæ куыд загъта, афтæмæй минималон пенси уыдзæн 4304 сомы, максималон та — 10250 сомы. Министр ма æрдзырдта, фæстаг рæстæг республикæйы гриппы эпидемийы тыххæй цы уавæр сæвзæрд, ууыл. «Рынчындоны арæзт ис æппæт уавæртæ дæр пациенттæн, ифтонг стæм хъæуæг хостæй дæр».

Плиты Агуындæ Хицауады размæ рахаста Паддзахадон гарантийы программæ, кæцымæ гæсгæ цæрджытæн дæттынц æнæаргъ медицинон лæггæдты бар. Программæ сæйраджыдæр арæзт у, цæмæй закъондæттынадмæ гæсгæ æмбæстагæн афоныл æмæ æххæстæй фадат уа медицинон лæггæдтæ райсынæн.

Æнæниздзинад хъахъхъæнын æмæ социалон рæзты министр рабадты хайадисджыты базонгæ кодта программæйы фæлгæттимæ. Цæмæй пациенттæ æххæстæй баууæндой медицинон лæггæдтыл, уый сæрмагондæй баст у дохтыры профессионалон ахастимæ. Цæрджыты æнæмæт ахаст се ’нæниздзинадмæ арæх цау кæй у, уый тыххæй та, дам, хъæуы рагацау профилактикон куыстытæ уадзын.

Финансты министры хæстæ æххæстгæнæг Тыбылты Фатимæ министры кабинеты размæ рахаста 9-мæйон «Паддзахадон бюджеты хыгъд». Бюджетмæ ивындзинæдтæ бахæссыны æнæмæнгхъæуындзинады тыххæй бавдыста гæххæттытæ. Азы райдианы Бюджетмæ цы 6 105 410, 3 мин сом хаст æрцыд, уыдонæй хардз æрцыд 6 023 726, 51 мин сомы.

Ахуырад æмæ зонады министр Джиоты Арианæ фæндон бахаста, цæмæй «Рæзгæ фæлтæры монон-хæрзнамысон рæзты» программæмæ хаст æрцæуа ивындзинæдтæ. Уымæн 2020-2021 азты COVID-19 аххосæй реализаци не ’рцыдысты кæцыдæр мадзæлттæ. Джиоты Арианæ банысан кодта, программæ аивынæн кæй нæ бахъæудзæн уæлæмхас æхцайы фæрæзтæ рахицæн кæнын. Хицауады уæнгтæ æмхъæлæсæй райстой ацы инициативæ.

Уый фæстæ та байхъуыстой Бастдзинад æмæ массон коммуникациты комитеты сæрдар Джиголаты Хасанмæ. Уый та министры размæ рахаста «Бастдзинады телекоммуникациты компани»-йы куыстæн Паддзахадон бюджетæй субсидитæ рахицæн кæныны суагъæ.

Æхсæнадæмон Сырх Дзуары комитет йæ куыст адарддæр кæна æви нæ, нæ республикæйы территорийыл, уынаффæ цыд уыцы фарстыл дæр. Ацы хъуыддаг хорзыл нымад æрцыд æмæ министртæ схъæлæс кодтой, цæмæй сæ архайд адарддæр кæной.

Уазæгты Марфа