31-æм марты РХИ-йы Парламенты депутаттæн кусæгон фембæлд уыд РХИ-йы Арæнгæрон службæйы æмæ Хуссар Ирыстоны УФ-йы Æдасдзинады федералон службæйы Арæнгæрон уравленийы къухдариуæгадимæ. Фембæлды хайад райстой Парламенты Сæрдар Бибылты Анатоли, Парламенты вице-спикер Тасойты Димитр, депутаттæ Коцты Игорь æмæ Тедеты Бахва, афтæ ма Знауыры районы Балта, Зиулет æмæ Мугуты хъæууон администрациты къухдариуæггæнджытæ.

Фембæлды райдианы РХИ-йы Парламенты Сæрдар Бибылты Анатоли раарфæ кодта æрæмбырдуæвджытæн æмæ банысан кодта, зæгъгæ, Парламентмæ æрбацæуынц Знауыры районы арæнгæрон хъæуты цæрджытæ, кæцытæ æмбæлынц бæрæг проблемæтыл арæнгæрон зонæмæ бацæуыны рæстæджы.

«Æнæмæнгхъæуæг у арæнгæрон зонæйы хъæуты цæрджытимæ æмбарынгæнæн куыст кæнын, цæмæй адæм æмбарой арæнхъахъхъæнджытæ цахæм функцитæ æххæст кæнынц, уый — уыдон хъахъхъæнынц нæ паддзахадон арæн. Знауыры районы арæнгæрон зонæйы хъæууон администрациты сæргълæуджытæ хъуамæ æмбарын кæной цæрджытæн, зæгъгæ, ис арæнгæрон зонæ æмæ йыл хъæуы сындæггай фæцайдагъ уæвын. Уый æддейæ ма районы администраци хæсджын у, цæмæй арæнгæрон зонæйы сæвæра æмбæлон нысæнттæ æмæ бынæттон цæрджытæ æнæ паспорттæй ма цæуой уыцы территоритæм», — загъта Бибылты Анатоли.

Фембæлды рæстæджы ма банысан æрцыд, зæгъгæ, республикæйы цæрджытæн æвзæры проблемæтæ арæнгæрон зонæмæ бацæуыны тыххæй специалон бары гæххæттытæ (разрешения) райсынимæ. РХИ-йы Паддзахадон æдасдзинады комитеты Арæнгæрон службæйы къухдариуæггæнæг Валерий Зозуля йæ рады æрæмбырдуæвджытæн фехъусын кодта, зæгъгæ, бары гæххæттытæ райсыны тыххæй раздæр кæд цæуын хъуыд республикæйы столицæмæ, уæд ныр документæн райсæн ис комкоммæдæр районты центрты.

«Хуссар Ирыстоны арæнгæрон хъæуты цæрджытæ хъуамæ райсой ахæм гæххæттытæ сæ зæххы фадгуыты цалынмæ хъæууонхæдзарадон куыстытæ нæ райдыдтой, уæдмæ. Афтæ ма арæнгæрон цæрæн пунктмæ бацæуыны тыххæй æнæмæнгхъæуæг у специалон барлæвæрд райсын, цæмæй цæрджытæ зындзинæдтæ ма æвзарой уый гæнæн ис саразæн комкоммæ районты центрты. Фæнды мæ банысан кæнын уый дæр, æмæ куыст кæй цæуы арæнгæрон хъæуты цæрджытимæ, уыдонæн æмбарын кæнынц цахæм уагæвæрдтæ уæвынад кæнынц арæнгæрон территоритæм бацæуыны тыххæй», — банысан кодта Валерий Зозуля.

Йæхи ’рдыгæй, Бибылты Анатоли раарфæ кодта хуссарирыстойнаг арæнхъахъхъæнджытæн сæ бакæнгæ куысты тыххæй, æмæ банысан кодта, зæгъгæ, æнæмæнгхъæуæг у арæнгæрон территориты цæрджытимæ æмбарынгæнæн куыст адарддæр кæнын быцæуы ситуацитæ ма æруадзыны тыххæй. Фембæлды ма уынаффæ кодтой Хуссар Ирыстоны паддзахадон арæны дарддæры арæзтады тыххæй.
___________

РХИ-ЙЫ ПАРЛАМЕНТЫ СÆРДАРЫ ХÆДИВÆГ ТЕДЕТЫ РУСЛАН: ЭКОНОМИКÆ СÆНДИДЗЫН КÆНЫНЫ ТЫХХÆЙ МАХ ХЪÆУЫНЦ УÆРÆСЕЙАГ ИНВЕСТИЦИТÆ ÆМÆ СПЕЦИАЛИСТТÆ

Экономикæйы уавæр æмæ рæзтимæ бирæбæрцæй баст у республикæйы тагъддæр сæндидзын кæныны хæслæвæрд. Фыццаг рады æнæмæнгхъæуæг у республикæйæн иумиагæй экономикон рæзты программæ бакусын, рæзты ацы этапы уæлдай перспективондæр æмæ приоритетондæр фадгуытæ æмæ здæхтытæ сбæрæг кæнгæйæ. Æмæ уый тыххæй та æнæмæнгхъæуæг у практикон уынаффæтæ бакусын, кæцытæ ахъаз кæндзысты Хуссар Ирыстоны бизнес-климат фæхуыздæр кæнынæн. Экономикæйы бирæ фадгуыты æнкъардæуы специалистты хъуагдзинад, сæрмагонæдй, æнæниз-дзинад хъахъхъæныны, цæрæнуатон-коммуналон хæдзарады, ахуырады, хъæууон хæдзарады æмæ къорд æндæр фадгуыты, кæцы фадат нæ дæтты сæ рæзты бæрзонд темптæ сифтонг кæнынæн. Бæрæг куыд у, уымæ гæсгæ ацы нысанæн бæрзондквалификациджын специалисттæ хуынд æрцыдысты Уæрæсейæ, кæ-цытæн сæ бон суыдзæн æмбæлон службæты куыст æрнывыл кæнынæн æмæ нæ кусджытæн сæ фæлтæрддзинад æмæ зонындзинæдтæ бацамонын.

Уæрæсейаг инвестициты æрбацыд сифтонг кæныны тыххæй æнæмæнгхъæуæг у инвестортæн æдас æмæ хæрзвадат уавæртæ саразын, хъæуæг закъæттæ райсын æмæ сæ æххæст кæнын, ома, хъуамæ скуса барадон паддзахад. Инвестицитæ комкоммæ баст сты куыд æддагон, афтæ мидæггагон æдасдзинадимæ дæр. Уæрæсе Бадзырдмæ гæсгæ ифтонг кæны Хуссар Ирыстоны хъахъхъæнынад æмæ æдасдзинад. Дыууæ бæстæйы Мидхъуыддæгты министрадтæн цы информацион-координацион центры сырæзт план цæуы, уый фæбæрзонддæр кæндзæн æхсæнадон æдасдзинады æмæ барадон фæткы æмвæзад.

Ныртæккæ республикæйы экономикæ къорд объективон æмæ субъективон аххосæгтæм гæсгæ нырма нæ рахызт уæззау кризисæй, кæцыйы Хуссар Ирыстон бахаудта Советон Цæдисы ныппырхы æмæ экономикон рæзты хуызæг баивыны фæстæ. 2008 азы августы цауты фæстæ Уæрæсейы Федерацийы æппæтварсон политикон, экономикон æмæ финансон æххуысы руаджы Хуссар Ирыстонæн фæзынд реалон шанс тагъдыл республикæйы экономикæ сæндидзын æмæ рæзын кæнынæн. Фæлæ Хуссар Ирыстон æмбæлон æгъдауæй не спайда кодта уæрæсейаг æххуысæй, номхуындæй, кондад саразын æмæ бюджетон фадыгæй кондад æмæ хъæууон хæдзарады фадыгмæ финансон æмæ фæллойадон ресурстæ ракæнын.

Ис æнтыстджын реализацигод проекттæ, фæлæ уыдон цъус сты. Зæгъæм, Цхинвалы ног хуыйæн фабрикæ БТК-4-йы байгом. Ныртæккæ Хуссар Ирыстоны цы проекттыл куыст цæуы, уыдонæй хъæуы рахицæн кæнын Уæрæсейы Федерацийы æххуысæй цыппар чысыл гидроэлектростанцы арæзтады проект. Ацы проекты реализаци бындуронæй бандавдзæн республикæйы иумиаг экономикон уавæрыл.

Уæрæсейаг инвестициты хъуагдзинады уавæрты нырма æнæмæнгхъæуæг у чысыл æмæ астæуккаг амалиуæгад райрæзын кæныныл æрлæууын, кæцы баххуыс кæнит хъæу сæндидзын кæнынæн. Экономикæйы рæзты фыццаг этапы æнæмæнгхъæуæг у мидæггагон базар хисæрмагонд кондадæй сифтонг кæнын. Паддзахадон хицауиуæгады органтæн приоритетон хъуамæ суа хисæрмагонд товаруадзджытæн æххуыс кæныны практикæ. Уый тыххæй æнæмæнгхъæуæг у паддзахадон программæ бакусын льготон кредиттæй сæ сифтонг кæныны нысанæн, хъалонтæ фидын сын фæфæстæдæр кæнын æмæ афтæ дарддæр. Ахæм программæ арæзт æмæ реализаци куы æрцæуа, уæд уый импульс ратдзæн нæ экономикæйæн.

Национ экономикæйы рæзты перспективæты æмæ гæнæнты анализы тыххæй фæндон хæссын 2016 азы экономикон форум ауадзын, уырдæм цымыдисгæнæг инвесторты æрба-хонгæйæ.

РХИ-йы Парламенты информацион-аналитикон управлени

Comments are closed, but trackbacks and pingbacks are open.