«Спутник-Хуссар Ирыстоны» уазæг уыд Республикæ Хуссар Ирыстоны Паддзахадон æдасдзинады комитеты сæрдар Олег Ширан. Æдасдзинады органты кусджыты бон 20 декабры цытæн арфæтæ æмæ хорзæхтæ райстой бæстæйы къухдариуæгадæй, сабырад, барвæтк, нæ паддзахады интерестæ кæй хъахъхъæнынц, уый фæдыл. Æдасдзинады комитеты кусджыты архайдæн Президент Бибылты Анатолийы ‘рдыгæй æрцыд бæрзонд аргъ.

Паддзахадон Æдасдзинады комитеты сæрдар зæрдыл æрлæууын кодта æдасдзинады органтæ кæй сырæзтысты 1917 азы революцион цауты фæстæ, контрреволюци æмæ саботажы ныхмæ тохы фæдыл Æппæтуæрæсейаг Уæлвæткон къамис куы сырæзт, уæд. Уый фæстæ æдасдзинады органтæ ивд цыдысты, фæлæ ивгъуыд æнусы иууыл хъомысджындæр сæрмагонд службæйыл эксперттæ банымадтой ССРЦ-ы Паддзахадон æдасдзинады комитеты. Уыцы ном хæссынц ныр дæр æмæ къухдариуæг кæнынц уæды куысты традицитæ, куыст организаци кæныны принциптæ, нор-мæтæ æмæ нормативтæй. Кад кæнынц куыд Æдасдзинады комитеты, афтæ Федералон æдасдзинады службæйы ветерантæн дæр.

Æдасдзинады комитет цæттæ у æдасдзинад ифтонг кæныны фæдыл цыфæнды хæстæ æххæст кæнынмæ

Паддзахадон æдасдзинады комитет æмæ æндæр сæрмагонд службæты архайд æргом нæу, йæ куыст æмæ архайды фæдыздæхтытæн сæрмагонд нысаниуæг ис. Уыдонæн сæ сæйраг хæс у паддзахады уæлдæр къухдариуæгады, сæрмагондæй бæстæйы Президентæн оперативон информацийы фæдыл доклад кæнын, уавæрæн анализ кæнын, цæмæй сцецслужбæты бæрæггæнæнты бындурыл уымæн йæ тыхы уа æмбæлон политикон, æфсæддон, æфсæддон-стратегион æмæ экономикон уынаффæ райсын.

Нырыккон æддагон æмæ мидæггагон фарстытыл дзургæйæ комитеты сæрдар банысан кодта, зæгъгæ, уыдон комкоммæ баст сты Хуссар Ирыстоны национ интерестимæ, йæ дунеон-барадон статус æмæ йæ дарддæры политикон системæйы рæзты процессимæ.

Æддагон тыгъдады Хуссар Ирыстоны æдасдзинады сæйраг тасдзинадыл Олег Ширан банымадта, Гуырдзыстон æмæ дунеон æмæхсæнады иу хай кæй нæ нымайынц нæ бæстæйы суверенитет æмæ хæдбардзинады факт. Æмæ ууыл баст у, Тбилис кæй нæ разы кæны базæйон документ – тыхæй пайда кæй нал æрцæудзæн, ууыл къухтæ æрфыссыныл. Æмæ юридикон бæрнджын документ кæй нæ уæвынад кæны, уый фæстиуæгæн Гуырдзыстон æндыгъдады бынæттæ аразы нæ арæнтыл æмæ зиан хæссы Хуссар Ирыстонæн, махæй та нæ сæйраг стратегион æмцæдисон – Уæрæсейæн.

Куыд ма банысан кодта, уымæ гæсгæ гуырдзиаг спецслужбæтæ ныртæккæ дæр реализаци кæнынц алыгъуызон æнгæс стратегитæ паддзахаддзинад фæивын æмæ республикæйы территорийы иу хай байсынмæ бафæлвæрдтытæ.

Нырыккон æхсæнады информацион, æргом характер хынцгæйæ æмбарын хъæуы иу хъуыддаг: иу æнæахъуыдыгонд ныхас, социалон хызæгты иу пост, иу æнæсанкцигонд балц фæсарæнтæм гæнæн ис æмæ зиан æрхæссой æрмæст хицæн адæймæгтæн нæ, фæлæ организаци кæнæ паддзахадæн æмæ саразой, ныхмæллæууæг фарсы спецслужбæты цæсты бафтауынæн уавæртæ адæймагæн. Ныртæккæ Æдасдзинады комитет æххæстгуырахстæй цæттæ у Республикæ Хуссар Ирыстоны æдасдзинад ифтонг кæныны фæдыл цыфæнды хæстæ бæстон кæнынмæ.

Фæсарæйнаг развæдсгарæн службæты ныхмæ архайдыл дзургæйæ Æдасдзинады комитеты сæрдар банысан кодта, зæгъгæ, комитеты архайд æргом нæу, фæлæ йæ бирæ æтыстытæ рахъæр вæййынц хатт дæсгай азты фæстæ дæр. Æндæр бæстæты спецслужбæтæ стыр цымыдис кæнынц Хуссар Ирыстоны æхсæнадон-политикон æмæ экономикон процесстæм. Уыдоны сæйраг сты Гуырдзыстоны Паддзахадон æдасдзинады æмæ Развæдсгæрсты службæтæ, кæцытæ тырнынц нæ бæстæйы архайды алы фадыджы дæр сæ фындз тъыссынмæ. Уыдон хынцыд цæуынц. Уыцы здæхты комитет æрвылбон куыст кæны, фæсарæйнаг агентурæйы архайды æууæлтæ ма æруадзын æмæ сæ аиуварс кæныныл.

Æдасдзинады комитет сæрибар у алыварсон æндæвдадæй

Æдасдзинады комитеты сæрдары ныхæстæм гæсгæ йæ дæлбаруæвæг уагдон у бæрзондпрофессионалон æмæ эффективон спецслужбæ, кæцыйы тыхы ис рæс-тæгыл тæссагдзинæдтæм æмæ паддзахады интерестæм хъусдард аздаха. Фæлæ уый æмрæнхъ комитет сæрибар у политикон æндæвдадæй æмæ нæ лæггад кæны нæдæр партион нæдæр цавæрдæр къордты интерестæн, йæ куыст аразы Республикæ Хуссар Ирыстоны Конституцийы бындурыл, бæстæйы адæмы интерестæ хъахъхъæнгæйæ.

Комитеты куысты фæстиуджытæн стыр аргъ цæуы бæстæйы уæлдæр къухдариуæгады ‘рдыгæй æмæ йæм æмбаргæ ахаст ис æмбæстæгты ‘рдыгæй дæр. Йæ кусджытæ æнкъарынц Президенты ‘рдыгæй æдзухон хъусдард, кæцы хорзæрдæм æндавы сæ куыстыл æмæ оперативон-службæйон архайды хорз фæстиуджыты æнтыстытыл.

Хуссар Ирыстоны Гарзджын тыхтыл Уæлдæр сæйрагкомандæгæнæг Бибылты Анатоли хайад исы комитеты архайды здæхтыты, сæвзæргæ тæссагдзинады ныхмæ архайды фæдыл сæдас кæныны нысанæн æвæры конкретон хæстæ, сбæрæг кæны структурæ рæзын кæныны иумиаг здæхтытæ.

Олег Ширан ма банысан кодта уый дæр, æмæ Бибылты Анатоли базæйон ахуырад кæй райста Советон Цæдисы уæлдæр ахуыргæнæндæттæй сæ иу – Рязаны Уæлдæфон-Десантон æфсæддон ахуыргæнæндоны, уый бирæйыл дзурæг у. Историйы, зæгъгæ, бирæ цæвиттонтæ ис æрхæссæн, ацы ахуыргæнæндоны рауагъдонтæ кæй систы æнтыстджын губернатортæ, министртæ æмæ президенттæ.

Гуырдзыстон уæддæр у потенциалон тæссаг бæстæ

2008 азы хæстон архайдтыты фæстæ Гуырдзыстон састы бынаты куы баззад æмæ нæ территорийыл уæрæсейаг æфсад куы æрбынат кодта, уæд гуырдзиаг спецслужбæтæ аиуварс сты Хуссар Ирыстонмæ ахасты паддзахадон терроризмы практикæйæ. Фæлæ уымæ нæ кæсгæйæ Гуырдзыстон уæддæр баззад Хуссар Ирыстонæн потенциалон террористон тæссагдзинад чи æвзæрын кæны, ахæм бæстæйæ.

«Хынцыд цæуынц ахæм факттæ æмæ Гуырдзыстоны территоримæ кæй цæуынц Сирийæ лигъдæттæ. Уыдоны ‘хсæн сты ахæмтæ, кæцытæ уыдысты Сириаг Арабаг Республикæйы архайæг сæргълæууæг Башар аль – Ассады ныхмæ æмæ тох кодтой оппозицион тыхты фарсмæ. Уыдон æхсæнгарзимæ архайын, кæй зæгъын æй хъæуы, хорз рæхсынц, рацыдысты хæстон цæттæдзинад æмæ бæрæг тæссагдзинад æвзæ-рын кæнынц нæ бæстæйæн.

Гуырдзыстоны Панкисы комы дæр æмбырд кæнынц радикалон исламæн табугæнджытæ, кæцытæ активонæй æххæст кодтой Сирийы ИГИЛ-ы боевикты рæнхъытæ. Уыдонæй дарддæр ма Хуссар Ирыстонæн тæссаг сты афтæхуыйнæг «Гуырдзиаг националон легионы» уæнгтæ. Уыдон 2014 азы активон архайд кодтой Донбассы хæстон архайдтыты. Уыдонæй бирæтæ фæстæмæ æрыздæхтысты Гуырдзыстонмæ æмæ активон хайад исынц гуырдзиаг оппозицийы архайды, не ‘мбæхсынц сæ негативон æмæ знагиуæгон ахаст Хуссар Ирыстоны ныхмæ. Уымæ гæсгæ гæнæн ис æмæ алыгъуызон тыхты руаджы архайой нæ бæстæйы уавæр схæццæ кæныныл», – банысан кодта Ширан.

Дунеон терроризмы ныхмæ тох кæныны здæхтыты комитет æнгом æмархайд кæны дыууæфарсон сразыдзинады фæлгæтты Уæрæсейы Федералон Æдасдзинады службæимæ.

Паддзахады æдасдзинад ифтонг кæныны нысанæн Æдасдзинады комитет йæ барты фæлгæтты алы фадгуыты æмархайд кæны Уæрæсейы Федерацийы спецслужбæтимæ. Активон æмархайд цæуы Уæрæсейы Федералон Æдасдзинады Арæнгæрон управлениимæ, уагъд цæуынц иумиаг мадзæлттæ паддзахадон арæнхалджыты æруромыны фæ-дыл, профилактикон куыст цæуы бынæттон цæрджытимæ арæнгæрон фадыджы барады ныхмæ архайдæй бафæдзæхсыны фæдыл. Ныхасгæнæг æмгуыстад æмæ æмархайды иууыл сæйрагдæрыл банымадта, бынæттон чекисттæ Уæрæсейы профилон ахуырадон уагдæтты кæй ахуыр кæнынц, æмæ кадртæ сæ квалификаци кæй бæрзонддæр кæнынц.

Олег Ширан æрæджы нысан æрцыд Хуссар Ирыстоны Æдасдзинады комитеты сæргълæууæгæй. Уымæн хорз ахастытæ ис коллективимæ. Мæхи, дам, æнкъарын Хуссар Ирыстоны æмбæстагæй. Тынг хорз бæстæ у, рæсугъд æрдз æмæ иттæг хорз адæмимæ.

КЪÆБУЛТЫ Маринæ

Comments are closed, but trackbacks and pingbacks are open.