ПАДДЗАХАДОН ПРОГРАММÆ – ФÆСИВÆДЫ МОНОН-ХÆРЗÆГЪДАУОН ХЪОМЫЛАДЫ ТЫХХÆЙ

Хицауады рабадты æруынаффæ кодтой «2020-2022 азты Республикæ Хуссар Ирыстоны рæзгæ фæлтæры монон-хæрзæгъдауон хъомылады тыххæй» Паддзахадон комплексон нысанон программæ (дарддæр – Паддзахадон программæ) реализаци кæныны фарстытыл.

Рабадты хайад райстой Хицауады Сæрдар Бекъойты Геннади, йæ хæдивæг – Экономикон рæзты министр Тадтаты Дзамболат, афтæ ма министрадты æмæ ведомствоты къухдариуæггæнджытæ, кæцытæ сты программæйы сæйраг æххæстгæнджытæ.

Æмбырды хайадисджытæ æруынаффæ кодтой Паддзахадон программæ æххæст кæныны фарстытыл, сæйраджыдæр, 2020 æмæ 2021 азты фæдыл хыгъд бацæттæ кæнын æмæ йæ Хицауадмæ бавдисын.

Куыд банысанчындæуыд, афтæмæй эпидемиологон уавæры тыххæй, кæцы 2020 æмæ 2021 азты баст уыд коронавирусон инфекци COVID-19-имæ, Паддзахадон программæйы кæцыдæр мадзæлттæ баззадысты æнæреализацигондæй, кæнæ та кæронмæ æххæст не ‘рцыдысты, уыдон хаст æрцыдысты ног редакцигондæй.

Бекъойты Геннадийы ныхæстæм гæсгæ, Хицауады раз æвæрд ис 2022 азы Паддзахадон программæ æххæст кæнынмæ бæрндзинадимæ бацæуыны хæс, 2017, 2018, 2019 азты программæ эффективонæй æххæст кæныны хыгъд анализ кæнгæйæ, афтæ ма абоны бон æнæреализацигонд мадзæлтты актуалондзинад хынцгæ-йæ.

«Аивгъуыйгæ программæтæн саргъ кæнын фадат ратдзæн бæрæг хатдзæгтæ саразынæн иу кæнæ иннæ мадзæлттæ æмæ здæхтыты æнтыстытыл дзургæйæ, уымæ гæсгæ Паддзахадон программæйы ног редакцимæ хаст æрцæудзысты ахæм мадзæлттæ, кæцытæн уыдзæн хъæугæ фæстиуæг», – банысан кодта Хицауады сæргълæууæг.

Æмбырды рæстæджы Ахуырад æмæ зонады министрадæн хæсгонд æрцыд Паддзахадон программæ реализаци кæныныл контроль фæтынгдæр кæнын.

Уымæй уæлдай ма  Хицауады сæргълæууæг къухдариуæггæнджыты хъусдард аздæхта, Пад-дзахадон программæ реализаци кæныныл фаг информаци кæй нæй, уымæ. Сæйраджыдæр, уый банысан кодта, фылдæр кæй хъæуы дзурын Сывæллæтты сфæлдыстады галуаны Планетарийы архайды тыххæй, кæнæ Колыты Аксойы номыл Аивæдты лицейы бындурыл виртуалон экскурситæ цæттæ кæнын.

Йæ райдианы Паддзахадон программæйы финансон ифтонгад 2020 азы уыд 14 466 984 сомы; 2021 азы – 13 878 281 сомы; 2022 азы – 9 986 801 сомы.

Программæйы сæйраг æххæстгæнджытæ сты Ахуырад æмæ зонады министрад, Культурæйы министрад, Фæсивæдон политикæ æмæ спорты фæдыл комитет, Информаци æмæ мыхуыры Паддзахадон комитет, Тыбылты Алыксандры номыл Хуссар Ирыстоны паддзахадон университет.