Инциденттæ ма æруадзын æмæ сæм хъусдард здахыны фæдыл механизмты фæлгæтты ацы азы фыццаг фембæлдæн хатдзæгтæ аразгæйæ, хуссарирыстойнаг делегацийы сæргълæууæг, постконфликтон фарстатæ бæстонкæнынады фæдыл РХИ-йы Президенты æххæстбарджын Джиоты Мурат информацион фæрæзты минæвæрттæн афтæ радзырдта:
«Механизмты фæлгæтты дзырд цыд фæстаг фембæлдæй фæстæмæ паддзахадон арæнтæм хæстæг уавæртыл. Ног азы бæрæгбонтæй фæстæмæ абоны онг не ‘рцыд ахæм бархалæн цау, кæцы фæвазыгджын кодтаид уавæр. Уымæ нæ кæсгæйæ, мах, Механизмты куысты хайадисджытæ, æркастыстæм боны фæткы фарстатæм.
Хуссарирыстойнаг фарс сæйраг хъусдард аздæхта паддзахадон арæнтыл радон хатт нысан фехалыны цаумæ. Уый уыд Дæллаг Отъреу – Къоркулайы районы гуырдзиаг хъæу Плауы фарсæрдыгæй. Уым пайда æрцыд æхсæнгарзæй. Уыцы цауы фæдыл хуссарирыстойнаг фарс йæ тыхстдзинад уымæн æвдисы, æмæ ныр цалдæр фембæлды рæстæджы дзырд цæуы ацы фарстыл. Сæйраг уый нæу, Джиоты Мураты хъуыдымæ гæсгæ, æмæ паддзахадон арæны нысæнттæ æхст кæй цæуынц, фæлæ уый, æмæ æдзух гуырдзиаг фарс Хуссар Ирыстоны ‘рдæм æхсæнгарзæй кæй æхсы. Уымæн, зæгъгæ, гæнæн ис æмæ æндæр уæззаудæр фæстиуджытæ уа. Уымæ гæсгæ Хуссар Ирыстоны делегаци ноджыдæр æрсидт гуырдзиаг фарсмæ, Евроцæдисы миссийы хъусдарджытæм, цæмæй ацы цаутæ фæлхатт мауал æрцæуой.
Хуссар Ирыстонимæ Уæрæсе æфсæддон сразыдзинад знон кæй сратификаци кодта, уый, кæй зæгъын æй хъæуы, базмæлын кодта гуырдзиаг фарсы. Гуырдзыстоны информацион фæрæзтæ цымыдис кодтой ацы фарстмæ, æгæрыстæмæй йæ бастой Хуссар Ирыстоны суверенитетимæ. Уый тыххæй Джиоты Мураты дзуапп уыд афтæ, зæгъгæ, кæцыфæнды сразыдзинад дæр Уæрæсейы Федерациимæ сты дыууæфарсон æмæ дунеон нормæтæм гæсгæ здæхт сты бæстæйы æдасдзинад æмæ стабилон рæзтмæ. Æртыккаг бæстæтæн уыцы сразыдзинæдтæм ницы ахаст нæй.
Суверенитеты фæдыл та Мурат банысан кодта, кæй рæзын æмæ фидар кæнæм нæ суверенитет алы гæнæнуæвæг фæрæзтæй. Уымæй дарддæр уыцы сразыдзинадмæ гæсгæ Хуссар Ирыстон рæзын кæны хæларадон ахастытæ Уæрæсейы Федерациимæ, кæцы у йæ æдасдзинады сæйраг гарант.
Гуырдзыстоны хъахъхъæнынады министрад йæхи хъомысджын кæны æфсæддон алыхуызон техникæйæ. Уæвæг информацимæ гæсгæ та æрæджы самал кодта танкты ныхмæ фæсарæйнаг системæтæ, кæцытæн цæттæ кæнынц ныридæгæн кадртæ. Ацы фарстыл Механизмты фæлгæтты кæд дзырд нæ цыд, уæддæр бынтон æнæраразмæгонд нæу ахæм æнгæс фарст. Паддзахадон арæнтæм æввахс кæд æмæ уагъд фæцæуы æфсæддон ахуыртæ кæнæ æфсæддон техникæ уыцы бынæтты змæлы, уæд фæрстæ кæрæдзийæн хъуамæ хъусын кæной развæлгъау Евроцæдисы Миссийы хъусдарджыты руаджы, уымæн æмæ уыдон сты æхсæнлæгтæ.
Гуырдзыстоны информацион фæрæзтæ, абарст куы саразынц, уæд арæх цымыдис кæнынц Хуссар Ирыстоны мидæггагон хъуыддæгтæм, фæлæ лæмбынæг дзуапп, кæй зæгъын æй хъæуы, нæ райсынц.
Механизмты радон фембæлд уагъд æрцæудзæн ацы аз 1 марты.
Къæбулты Маринæ
Comments are closed, but trackbacks and pingbacks are open.