Абоны сывæллон тынг хицæн кæны, ахуырады системæ арæзт куы ‘рцыд, уæд цы сабитæ уыд, уыдонæй. Фыццаджыдæр, XXl-æм æнусы сывæллæттæн се ‘хсæнадон уавæр у бынтон æндæрхуызон.

Сывæллæттæн ис информаци райсынмæ хуыздæр гæнæнтæ. Раздæр кæд æрмæст скъола æмæ урок уыдысты ахæм фæрæзтæ, уæд ныр – дуне, адæймаг, æхсæнад æмæ æрдзы тыххæй алыхуызон информаци райсæн ис интернет æмæ телеуынынадæй. Абон дзыллон информацийы фæрæзтæ нæ сывæллæтты хъомылады ахсынц стыр бынат, куыд хорзæрдæм, афтæ æвзæрырдæм дæр. Хъыгагæн, ныртæккæ нæ адæмы наркомани, токсикомани æмæ алкоголизм бафтыдта стыр катайы. Уыцы æвирхъау низтæ скъуынынц нæ нацийы уидæгтæ, наркомани зыд кæфхъуындарау ныхъуыры нæ фæсивæды цардбæллон удтæ. Уымæ гæсгæ сæ ныхмæ хъæуы æппæтадæмон тох расидын.

О, фæстаг азты нæ адæм фæлæмæгъ кодтой сæ къæрцхъусдзинад царды ацы уд-хор æмæ æвирхъау фæзындтæм. Наркомани бирæтæн ссис, стыр æхца кæмæй аразынц, ахæм амал. Æмæ бирæ бæл-лæхтæ баст сты ацы проблемæимæ. Наркомани хонынц «фæсивæды низ», фæлæ йæм æмхиц сты ас адæймæгтæ дæр. Наркотиктæ чи уæй кæны, уыдоны ‘хсæн ис сылгоймæгтæ дæр æмæ нæ уый æфтауы уæлдай катайы, уымæн æмæ наркоманийы аххосæгтæ сты социалон æмæ экономикон царды уæззау уавæртæ, æгуыстдзинад. Наркоман цы бинонты ‘хсæн ис, уыдоны нал февдæлы нæдæр сабитæм, нæдæр – ныййарджытæм.

Наркоманийыл фæуæлахиз уæвын у тынг зын. Уыцы æвирхъау хъылмайы ныхмæ сæдæгай азты цæуы карз тох. Наркотиктæ куы нæ уа, уæд нæ уыдзæн наркомантæ дæр. Наркотиктыл фæуæлахизуæвæн ис æр-мæстдæр иумæйаг хъарутæй, уымæн æмæ наркомани у социалон фæзынд æмæ фæзыны ахæм ран, цыран бæрцыл у, æгъдау, закъæттæ дырысæй кæм нæ кусынц, кæм цуды иумæйаг æхсæнадон æмбарындзинад. Адæмы зондахаст хъæуы саразын наркоманийы ныхмæ, иудадзыг сын дзурын æмæ сæ æууæндын кæнын хъæуы, наркомани кæй у нацийы фыдбæллæх æмæ йæ æд уидæгтæ кæй хъæуы сыскъуынын.

Дохтыртæ-наркологтæ абон кусынц ныййарджытимæ, ахуыргæнджытимæ, хъомыл-гæнджытимæ, амонынц сын сывæллоны чысылæй наркотикты ныхмæ психологон æгъдауæй куыд кæнын хъæуы, уыдæтты. Уыцы амынддзинæдтæ стыр ахъаз сты ныййарджытæн æмæ ахуырады кусджытæн.

Хъæуы фылдæр рæстæг сабитимæ æрвитын, хъæуы сын амонын: цы у æвзæр æмæ хорз. Ацы хабар та æппæты фыццаг аразгæ у ныййарджытæй, æмткæй райс-гæйæ та – хистæртæй. Фæсивæды цайдагъ хъæуы фæллой кæныныл. Магуса амонд никæд ссары. Амонд ис фæллойы. Зæххæй тæрсын нæ хъæуы. Бирæтæ зæххы куыстæй сæхи иуварс кæнынц æмæ сæ кæны мæ-гуырдзинадмæ. Фæсивæды, сывæллæтты хъомыл кæнын хъæуы хæдзары, бинонты ‘хсæн.

Æрмæст скъола фаг нæу. Сывæллон хæдзары цæуыл сахуыр уа, æддейæ дæр уыдæттæ кæны. Ныййарæгæй фæзæгъынц, уал сывæллоны ныййардта. Цот ракæнын æнцон у, зындæр – се схъомыл кæнын. Нæ фыдæлтæ кæд æнахуыргонд уыдысты, уæддæр сывæллæттæ хъомыл кæнынмæ хорз арæхстысты. Йæ сывæллон фыдуаг кæмæн уыд, уый ныййарджытæм-иу Ныхасмæ фæдзырдтой æмæ дзы домдтой дзуапп. Уымæ гæсгæ нæ хæс у нæ фыдæлты фарн æмæ намыс раздахын, цæмæй хъомыладон фарстаты пайда кæнæм уыдоны фæлтæрддзинадæй. Мах ныртæккæ фылдæр дзурæм зиæнтты æмæ цины æгъдæутты тыххæй. Стыр хъыгагæн нæ рох кæнынц æфсарм, уæздандзинад.

Абоны сывæллæттæ чингуытæ нал кæсынц, уæлдайдæр та – классикон литературæ æмæ уымæ гæсгæ сæ культурæ дæр у æндæр. Уый та сын ахуыры æвзарын кæны къуылымпыдзинæдтæ. Зæгъæм, чиныг цы сывæллæттæ нæ кæсынц, уыдонæн сæ бон нæу текстæн анализ скæнын, нæй сæм логикон хъуыдыкæнынад, уымæн æмæ сæ миддуне у мæгуыр. Абоны рæстæг сабитæн æнæкастæй канд ирон литературæ нæ зайы, фæлæ уырыссаг æмæ æппæтдунеон классикон литературæ дæр.

Уымæ гæсгæ скъолайы æппæты ахсджиагдæр хæс у сабийы сфæлдыстадон хуызы, хъуыдыгæнгæйæ кæсын сахуыр кæнын. Хъыгагæн, ныййарджытæ сæ сывæл-лæтты аразынц ахуырадон предметтæй фылдæр зонындзинæдтæ райсынмæ, айрох сæ вæййы удварны хъомылад æмæ сабийы рæзт. Нæ сабиты цард фæстæмæ цæуы компьютеры раз бадынæй. Раздæр-иу уынгты, кæртыты цы хорз хъомылад истой хистæртæм кæсгæйæ, цы коллективон хорз хъæзтытæ-иу кодтой, уыдон рохуаты зайынц. Уый та сын къуындæгдæр кæны сæ моралон æмæ удварнон æууæлтæ.

Ирон зæххыл ирон сывæллон кæддæриддæр хистæрæн, æмгарæн, сылгоймагæн кад кæнын зыдта (æхсæнадон транспорты бынат радтын, хæссинæгтæ хæссынмæ аххуыс кæнын æмæ а.д.). Ныр уыдон ис-торимæ цæуынц. Сывæллæтты фылдæр хай, ΧΧ-æм æнусы сывæллæттимæ абаргæйæ, ницы æхсæнадон организациты архайынц, уымæ гæсгæ сæм нæй фæлтæрддзинад царды бирæ къабæзты æхсæ-надон куысты хи равдисынмæ, раздзог уæ-вынмæ, кæрæдзийæн æххуыс кæнынмæ, æмгардзинадмæ, хиуондзинадмæ æмæ а.д.

Йæхи разæй искæмæн хорздзинад скæнынмæ цæттæ чи у, ахæмтæ къаддæрæй къаддæр кæнынц. Фылдæр кæнынц хиуарзонтæ, искæйы зындзинады цурæй иуварс чи ахиздзæн, ахæмтæ. Сывæллæтты иу хай ахуырмæ æппындæр нæ бæллынц. Курдиатджын сывæллæттæ бирæ ис, фæлæ уыдон дæр, цы æрдзон курдиатæй хайджын сты, уымæй уæлдай ахуырыл æнувыд нал сты. Фылдæрæй фылдæр кæнынц, зын уавæрты чи цæры, ахæм сабитæ. Уымæ гæсгæ ахуыры процессмæ бæстон æркæсын хъæуы. Ссарын хъæуы ахæм мадзæлттæ, цæмæй сывæллæттæ ахуырмæ цымыдис кæной. Абоны сывæллæттæ сæрибардæр сты, æргомдæрæй дзурынц сæхи хъуыдытæ, арæхдæр цæуынц сæхи фæндыл, царды ногдзинæдтæм дæр тырнынц, фæлæ сæхи хъарутæй ныфсджын не сты, сæ зæрдæ дарынц ныййарджытыл. Ныййарджытæн та се ‘ппæтæн сæ бон нæу йæ сабийы царды хорздзинæдтæй фæхайджын кæнын. Уымæ гæсгæ арæх сывæллæтты ‘хсæн гуыры тызмæгдзинад æмæ хæрамдзинад.

Бирæ фыссæм газетты нæ фыдæлты æгъдæутты тыххæй, фæлæ се ‘ххæстгæн-джытæ тынг цъус сты абоны онг. Ныртæккæ ахуыргонд хистæртæ – бирæ, фарны ныхæстæ зæрдыл бадарын уадиссаг нæу. Фыдæлтæм цы хорз хъуыддæгтæ æмæ æгъдæуттæ уыдис, уыдон фæстæмæ разда-хæм, зæгъгæ, бирæ уынаффæтæ бæргæ кæнæм æмбырдты, афтæмæй та гæххæт-тыл фыстæй баззайынц, уымæн æмæ нæ вæййы, дарддæр сыл чи батыхса, ахæм адæм.

Æрмæгыл  бакуыста  ДРИАТЫ  Лейла

Comments are closed, but trackbacks and pingbacks are open.