Знон, 25 июлы, нæ республикæмæ кусæгон балцы æрцыд гом акционерон æхсæнад «Газпром»-ы сæрдары хæдивæг Валери Голубев. Уый йæхимæ райста нæ республикæйы Президент Тыбылты Леонид. Фембæлды нысан уыд, нæ республикæйы районты газæй сифтонг кæныны фарстатыл æруынаффæ кæнын.
Банысан кæнын хъæуы уый æмæ нæ адæмы царды ацы ахсджиаг фарстыл дзырд кæй цыдис, Тыбылты Леонид æмæ Уæрæсейы Федерацийы Президент Владимир Путин фыццаг хатт куы фембæлдысты, уæд дæр. Фембæлды фæстæ бакуыстæуыд республикæ газификаци кæныны фæдыл план-схемæ, кæцыйы цытджын æгъдауæй сфидар кодта нæ республикæйы президент. Ацы фарстыл дзырд цыдис дыууæ президенты иннæ фембæлдтыты дæр. Уымæй дарддæр ма республикæйы Президент Мæскуыйы фембæлд гом акционерон æхсæнад «Газпром»-ы правленийы сæрдар Алексей Миллеримæ æмæ уынаффæ цыдис Хуссар Ирыстоны хъæуты газификацийы фарстыл.
Алексей Миллер æмæ Тыбылты Леонид сæ фембæлды рæстæджы æрдзырдтой акционерон æхсæнад «Газпром»-ы ‘рдыгæй газификацийы программæ реализаци кæныны финансон æххуысы фарстаты фæдыл. Зæгъын хъæуы уый æмæ Тыбылты Леонид Президенты бынатмæ бацæугæйæ ацы фарст æвæрдта раздæр дæр. 2013-2014 азтæн Инвестпрограммæйы дæр лæууыд газификацийы фарст. Уымæн сæрмагондæй хицæн æрцыд 90 милуан сомы, фæлæ Æхсæнхицауадон къамисы рабадты ацы æхцайы фæрæзтæ здæхт æрцыдысты фыццаградон социалон проекттæм, сæрмагондæй æндидзынгæнæн куыстытæ æххæст кæнынмæ. Фæлæ Тыбылты Леонид уæддæр агуырдта фæндæгтæ ацы фарст аскъуыддзаг кæныны тыххæй. Æмæ арæзт æрцыд фыццаг къахдзæф. Уæрæсейы «Газпром»-имæ сырæзт «Газпром – Хуссар Ирыстон»-ы куыстуат, кæцы райдианы арæзт æрцыд газуадзæн хахх «Дзуарыхъæу»-Цхинвал»-ы хуссар фадыгмæ хъус дарыны тыххæй.
Дыууæ азы размæ ацы куыстуат конкретон куыстытæ бакодта проектон-сметон документацийыл ахæм хæххыты фæдыл, куыд «Цхинвал-Тъбет, «Цхинвал-Къостайыхъæу», «Цхинвал-Дзау». Фæлæ уый фаг нæу, кæй зæгъын æй хъæуы. Хъуамæ уый йæхимæ райстаид республикæйы газификаци кæныны фæдыл сæйраг закъазгæнæджы, аразæджы æмæ эксплуатацигæнæджы функцитæ. Ивгъуыд аз та нæ республикæмæ æрцыдысты «Газпром»-ы специалисттæ, цæмæй сарæзтаиккой Хуссар Ирыстоны газификацийы генералон схемæ. Арæзт æрцыд 2015-2019 азтæн газификацийы программæйы проект, цыран нысан æрцыдысты 200 цæрæн пункты, 1 сæудæджерадон куыстуат, 26 километры æхсæн-поселокон хæххытæ, 520 километры хъæууон бынæтты газы хæххытæ.
Алексей Миллер æмæ Тыбылты Леониды фембæлды рæстæджы дзырд цыд, цæмæй, ацы программæ реализаци кæнынæн финансон æххуыс рахицæн æрцæуа. Уæд Уæрæсейы Федерацийы «Газпром»-ы сæргълæууæг ныфс бавæрдта, æввахсдæр рæстæджы Мæскуыйæ Цхинвалмæ сæ минæвæртты кæй æрæрвитдзысты æмæ кусæгон уавæры газотранспортон инфраструктурæйы рæзтыл кæй æрдзурдзысты. Раст уыцы нысанæн æрцыд нæ республикæмæ «Газпром»-ы правленийы сæрдары хæдивæг Валерий Голубев.
Уазæгæн раарфæ кæныны фæстæ нæ Республикæйы Президент банысан кодта, зæгъгæ, мах æнхъæлмæ кастыстæм ацы фембæлдмæ æмæ мын, зæгъгæ, æхсызгон у, 31 марты Уæрæсейы Федерацийы Президент Владимир Путинимæ, афтæ ма «Газпром»-ы правленийы сæрдар Алексей Миллеримæ фембæлдтыты рæстæджы къухыбафтгæ сразыдзинæдтæ реализаци кæй цæуынц. Республикæйы газификацийы фарст аскъуыддзаг кæнын фадат ратдзæнис бирæ социалон-экономикон проблемæтæ аиуварс кæнынæн. Æгæрыстæмæй йын ис политикон нысаниуæг дæр.
Тыбылты Леонид, Уæрæсейы ‘рдыгæй финансон æххуысы тыххæй дзургæйæ, банысан кодта, зæгъгæ, 2013 азæй фæстæмæ уыцы æххуысæй пайда цæуы йæ нысаниуæгмæ гæсгæ, рационалонæй. Уый бафидар кодта УФ-йы Нымайæн палатæ дæр. Æндидзынад куыд цæуы, уый тыххæй та загъта, зæгъгæ, ацы процесс хъуамæ кæронмæ фæуа 2017 азмæ. Горæт æмæ уымæ æввахс хъæуты газ кæй фæзындис, уымæй сæ цæрджыты ныфс бацыд æмæ бузныг сты Уæрæсейæ ахæм стыр æххуысы тыххæй.
Валерий Голубев дæр йæ рады раарфæ кодта, зæрдæбынæй йыл кæй сæмбæлдысты æмæ банысан кодта, зæгъгæ, мах хъуыдис рæстæг, цæмæй цæттæ уынаффæтимæ æрцыдаиккам. Банысан кодта Республикæйы Президенты фæдфæдылон архайд цæрджыты социалон-экономикон уавæр бæрзонддæр кæныны фæдыл. Республикæйы газификацийы фæдыл, зæгъгæ, мах æркастыстæм алыгъуызон варианттæм æмæ æппынфæстагмæ æрæнцадыстæм, раздæры Цæдисы хицæн республикæты кæмæй пайда кæнæм, ахæм вариантыл, ома, «Газпром» йæхимæ бæрндзинад исы æппæт хæрдзтæ дæр. Уæрæсейы Федерацийы транспортировкæйы, газотранспортон системæйы рæзты, газификацийы тыххæй. Æппæт процедурæтæ дæр æххæст цæудзысты паддзахадон æмвæзадыл. Уæрæсейы ‘рдыгæй уыдон æх-хæст кæндзæн Энергетикæйы министрад. Йæ ныхæстæм гæсгæ хорз уаид, уыцы процедурæтæ куы фæуиккой сентябры мæймæ.
Ахсджиаг уыд газы таможнæйон фиддонты сисыны тыххæй фарст.
«Иттæг ахсджиаг нысаниуæг уыдзæн Уæрæсейы Хицауады уынаффæйæн УФ-йы Хицауады сæрдары хæдивæг Александр Хлопонинмæ дæ фыстæджы фæдыл, Леонид Харитоны фырт, цæмæй газ дæр хаст æрцæуа уыцы продукцийы скондмæ, кæцыйæ ист нæ цæуы таможнæйон фиддон. Уый 30 проценты фæасламдæр кæндзæн газы продукцийы аргъ æмæ фæлхасгæнджытæн йæ аргъ уыдзæн, Цæгат Ирыстоны куыд у, афтæ. Уый сифтонг кæндзæн газæй фиддонтæ æххæстæй æмбырд кæнын æмæ нын уыдзæн æнæмæнгхъæуæг фæрæзтæ нæ инвестицитæн», – загъта Валерий Голубев.
Тыбылты Леонид банысан кодта, ахсджиаг къахдзæф кæй æрцыд Хуссар Ирыстоны дарддæры газификацийы фарстаты æмæ бузныг загъта «Газпром»-ы къухдариуæгадæн.
Бестауты Валя
Comments are closed, but trackbacks and pingbacks are open.