Ныр 10 мæйы дæргъы Ирыстоны фæсивæдæй бирæтæ активон хайад исынц Донбасс æмæ Луганск ссæрибар кæныны фæдыл Сæрмагонд операцийы. Кæй зæгъын æй хъæуы, хатгай нæ вæййынц æппæт хъæугæ дзаумæттæй ифтонг, афтæ æфсæддон мигæнæнæй дæр. Фæлæ зын уавæрты уæвæг адæмыл аудæг æмбæстæгтæ не ’хсæн тынг бирæ. Уыдон сæхи нæ бааууон кодтой æмæ фæдардтой æххуысы къух нæ хæстонтæм.

Дзауы Администрацийы сæргълæууæг Тыбылты Вандæ куыд загъта, афтæмæй районы ауагътой гуманитарон æххуысы акци. Æрбамбырд кодтой алыгъуызон дзаумæттæ æмæ æхцайы фæрæзтæ. «Цы æхца нæм æрбамбырд ис, уыдон арвыстам нæ Президенты администрацимæ æмæ уырдыгæй та иумæйагæй нæ республикæйы номæй æрвыст æрцыдысты Сæрмагонд операцийы ирон хæстонтæн», — загъта Вандæ.

Æртагæй ифтонггæнæг хызæг «Рояль»-ы кусджыты иу хай дæр æрæмбырд кодтой æхцайы фæрæзтæ æмæ балхæдтой дыууæ квадракоптеры. Уыдон, æмæ ма акцийы æхцайы фæрæзтæй дарддæр цы æрæмбырд ис, уыцы дзаумæттæ та Дзауы районы номæй арвыстой сæхæдæг.

Администрацийы сæргълæууæджы ныхæстæм гæсгæ, ноджыдæр фæнд кæнынц æххуыс кæнын хæстонтæн.

8 декабры Цхинвалы Равдыстыты залы бæрæгбоны цытæн байгом кодтой цымыдисон нывты экспозици. Ардæм æрбацыдысты не ’мбæстæгтæ, аивадæн табугæнджытæ, студенттæ æмæ скъоладзау фæсивæд, уыдонимæ экспозицийæн аргъгæнæг уыдысты горæты администрацийы сæргълæууæг Къадзты Гено, Галаты Барисы номыл кафт æмæ зарды паддзахадон ансамбль «Симд»-ы директор Харебаты Ацæмæз, Цхинвалы нывгæнæн ахуыргæнæндоны директор Зассеты Сæрмæт æмæ æндæртæ.

Бæрæгбонон мадзал бацæуæн ныхасæй байгом кодта Республикæ Хуссар Ирыстоны Нывгæнджыты цæдисы сæрдар Битеты Алан. Уый йæ коллегæтæн арфæ ракодта бæрæгбоны сæраппонд æмæ банысан кодта, зæгъгæ, Нывгæнæджы æппæтадæмон бон фыццаг хатт нысангонд кæй цæуы Хуссар Ирыстоны. Уый ма банысан кодта, бæрæгбон сын ахсджиаг кæй у æмæ традицион кæй хъуамæ суа, уый. «Арфæ кæнын æппæт нывгæн-джытæн дæр абоны равдыст чи бацæттæ кодта æмæ дзы хайад чи исы, æппæт уыдонæн. Ацы бæрæгбон хъуамæ суа æрвылазон æмæ традицион нывгæнджыты цæдисы уæнгтæн», — загъта Битеты Алан. Уый ма сæрмагондæй бузныджы ныхæстæ загъта нæ бæстæйы сæргълæууæг Гаглойты Аланæн, сæ куыстæн сын хъæугæ техникæ кæй балæвар кодта, уый тыххæй.

Къадзты Гено раныхасы йæ ахсджиагыл банымадта нывгæнджыты равдыстытæ арæх кæй хъæуы уадзын æмæ æххуысæй баныфсæвæрдта, хуызфыссынады аивады музей бакæныны хъуыддаджы.

Равдыстмæ хаст æрцыдысты 27 нывгæнæджы цымыдисон куыстытæ æндæр æмæ æндæр темæтыл. Сæ автортæ: Гæбæраты Барис, Цхуырбаты Тамерлан, Багаты Феликс, Хуыбиаты Роберт, Чилæхсаты Галинæ, Джиоты Вадим, Са-банты Анжелæ æмæ æндæртæ.

Нæ уацх.