Конституци цы бæстæйæн вæййы, уым реалон конституцион цардуаг арæзт æрцæуы барадон паддзахады принципты бындурыл. Конституци регламентаци кæны барадон системæйы, кæцы фадат нæ дæтты абсолютизацион хицауиуæгад саразынæн.

Знон, 8-æм апрелы Хуссар Ирыстон банысан кодта Республикæ Хуссар Ирыстоны Конституцийы бон. Хъыгагæн, ацы аз Конституцийы бон нысан æрцыд, æнæхъæн дунейы цы вирусон инфекци Covid-19 фæзынд, уымæй хи бахизыны нысанæн хæдизоляцийы уавæрты. Ацы Конституци райст æрцыд 2001 азы  8 апрелы æппæтадæмон референдум ауадзыны фæстиуæгæн.

Ивгъуыд æнусы 90-æм азтæй  фæстæмæ Республикæ Хуссар Ирыстоны райст æрцыд æртæ Конституцийы. Уыцы хъуыддаг баст у конкретон историон реалиты объективон æууæлтыл.

Историктæ, эксперттæ æмæ æхсæнадон архайджытæ республикæйы фыццаг Конституцийыл нымайынц 1993 азы Конституци. Фæлæ 1990 азы 20 сентябры сессийы рæстæджы адæмон депутаттæ республикæ куы расидтысты, уӕд райдыдтой кусын паддзахадон органтӕ ӕмӕ паддзахадон атрибуттӕ саразыныл, райст ӕрцыдысты Республикӕ Хуссар Ирыстоны герб, тырыса ӕмӕ гимн. Цыппӕрӕм ахсджиаг къахдзӕф та уыд Конституци райсын. Фæлæ Конституци райсын зындæр хъуыддаг уыд, уымæн æмæ йæ хъуыд ныффыссын. Уæд депутаттæ уынаффæ рахастой, цæмæй цыбыр æмгъуыдмæ фыст æрцыдаид Хуссар Ирыстоны Конституци. Уымæн æмæ æндыгъд уавæртæм гæсгæ  уынаффæтæ оперативонæй исын хъуыд, дунеон-барадон нормæтæ æххæст кæнгæйæ.

Конституци ныффыссыны тыххæй арæзт æрцыд Конституцион къамис зынгæ юрист Гаглойты Хазбийы сæргълæудæй. Къамисы сконды уыд зынгæ юрист Гатыгкоты Петр. Юристтæ æндыгъд уавæрты, сæ тыхтыл нæ ауæрдгæйæ, хъазуатонæй бакуыстой Конституцийыл æмæ йæ сцæттæ кодтой цыбыр æмгъуыдмæ. Уый тыххæй йæ иуæй-иу депутаттæ хуыдтой «иу æхсæвмæ арæзт Конституци». Конституцийы нысан æрцыдысты республикæйы цардархайды сæйраг здæхтытæ, Хуссар Ирыстон уыцы рæстæджы цы реалондзинады бахауд, уымæ гæсгæ. Конституци райстæуыд рæстæгмæ, уымæн æмæ æмбæлон процедурæтæ нæ рацыд.

 Кæд ацы Конституци æмбæлон процедурæтæ нæ рацыд, уæддæр уыцы документмæ гæсгæ республикæ цард дыууæ азы.

 1992 азы Уæлдæр Совет бакуыста ног Конституцийыл, кæцы, æппæт процедурæтæ рацæугæйæ, райст æрцыд 1993 азы 2 ноябры Республикæ Хуссар Ирыстоны фыццаг сæвзæрст паддзахадон Ныхасы VII сессийы. Кæй зæгъын æй хъæуы, 1993 азы Конституци дæр у цымыдисон документ, уымæн æмæ дзуапп дæтты уыцы рæстæджы реалитæн.

1996 азы ног Конституци нæ райстæуыд, фæлæ йæм ивындзинæдтæ бахæсгæйæ, республикæйы бакондæуыд хицауиуæгады президентон институт.

 Фæлæ та уый фæстæ дæр рæстæджы домæнтæм гæсгæ бахъуыд ног Конституци райсыны сæр æмæ 2001 азы 8 апрелы æппæтадæмон референдум ауадзыны фæстиуæгæн райст æрцыд Республикæ Хуссар Ирыстоны ног Конституци, кæцы у нырыккон паддзахады æххæст хъомыс паддзахаддзинады нормативон-барадон формæ. Ног Конституци ногæй бафидар кодта республикæйы статус, куыд суверенон паддзахад, афтæ. Ацы Конституци ссис æхсæнады æрбаиу кæныны, паддзахадон хицауиуæгады институттæ фидар кæнын æмæ хæдбар паддзахады размæцыды бындур.

Республикæйы сæйраг документы нысан æрцыдысты паддзахады æмæ æхсæнады барадон, политикон æмæ идеологион хицæндзинæдтæ, дырысæй бæрæг æрцыдысты паддзахады рæзты приоритеттæ, афтæ ма нысан æрцыдысты адæймаджы бартæ æмæ сæрибардзинады гарантитæ. Сæйраг Закъон республикæйы æмбæстæгты сифтонг кодта закъондзинадæй æмæ барвæткæй, æмбæстагон сразыдзинад æмæ стабилондзинадæй.

Сæйраг Закъон у Республикæ Хуссар Ирыстоны хæдбардзинад банымайыны фактортæй сæ иу. Ацы Конституци у нæ паддзахаддзинады бындуртæн сæ бындур, афтæ ма ахъаз у бæстæйы дарддæры рæзтæн, уымæн æмæ æмбæстæгты бартæ æмæ сæрибардзинад хъахъхъæд куынæ цæуой, уæд паддзахад дæр размæ нæ цæудзæн.

Конституцион бындуртæ дарддæр дæр фидар куы цæуой, уæд Хуссар Ирыстоны дырысæй уагъд цæудзысты эффективон экономикæмæ здæхт æхсæнадон ивындзинæдтæ, цæрджытæ ифтонг уыдзысты  социалон хъахъхъæнынадæй æмæ фæрныгадæй. Алы Конституцийы дæр æвдыст æрцæуы, цы историон реалондзинады арæзт æрцæуы, уый. Хуссар Ирыстоны Конституцийы æвдыст æрцыдысты нæ паддзахады уыцы демократон бындуртæ, кæцыты мах сдеклараци кодтам æмæ цæрæм уыдонмæ гæсгæ.

Конституцийы фыццаг сæры нысан æрцы-дысты, Республикæ Хуссар Ирыстоны суве-ренитет æмæ хицауиуæгады  парахатгæн-джытæ кæй сты йæ адæм, кæцытæ сæ пад-дзахаддзинад аразынц реформæтæ æмæ сæрибар æвзæрстыты фæрцы. Хицауиуæгад кæнæ хицауиуæгадон æххæстбартæ бацах-сын нымад сты адæмы ныхмæ карз фыдракæндыл æмæ сыл тæрхон цæуы закъонмæ гæсгæ.

Конституци райдайы ахæм преамбулæйæ: «Мах, Республикæ Хуссар Ирыстоны адæм, ныры æмæ фидæны  фæлтæрты раз бæрндзинад æнкъаргæйæ, нæ Фыдыбæстæйы  æдасдзинад æмæ дидинæфтыд ифтонг кæнынмæ тырнгæйæ, адæмты æмбардзинад æмæ хæдуправленийы иумиагæй нымад принциптæм гæсгæ, Республикæ Хуссар Ирыстоны паддзахадон суверенитеты тыххæй Декларацийæ къухдариуæг кæнгæйæ, адæймаг æмæ æмбæстаджы бартæ æмæ сæрибардзинад фидар кæнгæйæ, æхсæнадон æмæ политикон цардуаджы бындуртæ бафидар кæнгæйæ, аразæм Республикæ Хуссар Ирыстоны Конституци». Уый дзурæг у фыдæлтæй фæстæмæ хæдбардзинад – æмæ сабырдзинадмæ нæ адæмы тырнындзинадыл.

Æндæр бæстæты конституцитæ дæр æнгæс фразæтæй райдайынц, фæлæ нæ Конституцийы уыцы фразæтæ равзæрдысты хæдбардзинады сæрыл Хуссар Ирыстоны адæмы бирæазон тохты.

Конституци у нæ паддзахады Сæйраг Закъон. Герб, тырыса æмæ гимн та сты уыцы паддзахадон атрибуттæ, кæцытæй сæрыстыр хъуамæ уа алы æмбæстаг дæр.

  Конституцийы бон ахæм бæрæгбон у, кæцы бæрæг кæны нæ тугæй арæзт паддзахады хæдбардзинад. Абон нын нæхи паддзахад, нæхи Конституци кæй ис, уый стыр хæрзиуæг у æмæ йын аргъ кæнын хъæуы.

Адæмы фæндонмæ гæсгæ æмæ сæрибары сæрыл бирæ амæттæгты фæрцы  абоны бон уæвынад кæны Республикæ Хуссар Ирыстон.

Осиаты Индирæ

Comments are closed, but trackbacks and pingbacks are open.