Ныр цыппæрæм хатт уагъд æрцыд Хуссар Ирыстоны физикон культурæйы сгуыхт кусæг Габойты Иваны номарæн турнир мини-футболæй. Ерыстæ уагъд æрцыдысты йæ райгуырæн хъæу Дменисы. Хайад сæ райстой 6 командæйы, кæцытæ дихгонд æрцыдысты дыууæ дæлкъордыл. Уыдон уыдысты республикæйы районтæй, афтæ ма Цæгат Ирыстоны Горæтгæрон районæй.
Габойты Иван йæхæдæг дæр уыд хорз футболист. 60-æм азты кæрон хъазыд Цхинвалы «Спартак»-ы, кæцы уæд цалдæр сезоны ахъазыд Советон Цæдисы «Б» къласы чемпионаты. Иванимæ ма уæд хъазыд Джиджджойты Алан дæр. Уыдон уыдысты коман-дæйы лидертæ.
«Иванимæ базонгæ дæн 1965 азы. Уæд уый æфсадæй æрцыдис æмæ хъазынмæ æрбацыд «Спартак»-мæ. Командæ бæрзонд æмвæзадыл хъа-зыдис. Æрмæст легионертæ нæм 12 уыдис. Фæлæ уымæ æнæкæсгæйæ Иван хъазыд сæйраг сконды», – радзырдта Джиджджойты Алан.
Габойты Иван республикæйæн уæззау рæстæджыты куыста Цхинвалы администрацийы спорты хайады сæргълæууæгæй. Уый æппæт дæр арæзта, цæмæй фæсивæдæн уавæртæ уа спортæй архайынæн. Уыцы рæстæджытæ хорз хъуыды кæн Иваны æмгар Тедеты Владимир, кæцы уыцы рæстæджы куыста фæсивæдон политикæ, спорт æмæ туризмы фæдыл министры хæдивæгæй.
«Иумæ цы ерыстæ арæзтам, уыдон-иу алы хатт дæр уыдысты бæрзонд æмвæзадыл. Стæй ма диссаг уый у, æмæ тынг хорз хъазыд волейболæй дæр. Тынг рæхстис зарын æмæ кафынмæ», – загъта Тедеты Владимир.
Ерыстæ рауадысты тынг цымыдисон. Алы хъазты дæр цыд карз спортивон тох. Цымыдисон рауад æртыккаг бынат бацахсыны фæдыл фембæлд дæр. Бронзæйон майдантыл ерыс кодтой Знауыры æмæ Цæгат Ирыстоны Горæтгæрон районы футболисттæ. Ам спортивон амонд бахудт знауырæгтæм, кæцытæн бантыст 7:6 хыгъдæй рамбулын.
Æндыгъд рауад финалон хъазт дæр. Сæйраг призыл тох кодтой Цхинвалы æмæ Дзауы районты командæтæ. Ам та чысыл хуыздæр сæхи равдыстой Цхинвалы районы минæвæрттæ æмæ систы турниры уæлахиздзаутæ. Уыдонæн сæйраг приз æмæ майдантæй дарддæр ма лæвæрд æрцыд æхцайы преми дæр. Уæлахиздзауты æмæ призерты схорзæхджын кæныны церемонийы хайад райста Футболы федерацийы президент Пухаты Владимир.
Турнир бацæттæ кодта Цхинвалы районы администраци. Банысангонд куыд æрцыд, афтæмæй уый уагъд цæудзæн æрвылаз дæр.
Бæрæг ма æрцыдысты турниры хуыздæр хъазджытæ. Сæрмагонд призтæ райстой Битеты Нарик, Быценты Сæрмæт, Мамытаты Сослан, Цхуырбаты Давид æмæ Гæджиты Алан.
ХУРИТЫ Батрадз
