Мыхуыры рацыд сабиты уарзон журнал «Ногдзау»-ы ацы азы æртыккаг номыр. Журналы æрмæджытæ сæйраджыдæр дзурæг сты Стыр Фыдыбæстæйон хæсты советон адæмы уæлахизыл. Хæсты хайадисæг уыд ирон поэт, Сырх Стъалыйы орден æмæ «Хъæбатырдзинады тыххæй» майданы хицау, поэт Кочысаты Мухарбег. Мыхуыр дзы æрцыд йæ биографи цыбыртæй, стæй ма йе ‘мдзæвгæтæй «Хæрзбон» æмæ «Фыстæг мæ мадмæ». Дарддæр дзы сты Дзæуджыхъæу, Фарны хъæу, Ольгинскæ, Донецк, Цхинвал, Беслæн æмæ æмæ æндæр рæттæй сывæллæтты конд нывтæ ахæм сæргондимæ – «День Победы глазами ребенка». Редакци хорз кæны, йæ авторты арæнтæ дардыл кæй сты æмæ сын йæ фæрстыл бынат кæй дæтты, уымæй. Ацы номыры та дзы мыхуыр æрцыд Цхинвалы 1-æм скъолайы 5-æм «б» къласы ахуырдзау Бестауты Ликæйы уац «Дидинæгджын фæз».

Рубрикæ «Ногдзау»-ы æвæрæнтæй»-ы дзырд цæуы ирон поэт Хуытъинаты Цыппуйы тыххæй. Поэзиуарзджытæ йын бакæсдзысты йе ‘мдзæвгæтæ «Майы зарæг» æмæ «Царды уалдзæг»-ы. Редакци йæ хъусдард здахы æндæр адæмты сфæлдыстад кæстæртæм фæхæццæ кæнынмæ дæр. Ацы номыры та дзы мыхуыр æрцыд африкæйаг аргъау «Лев, черепаха и кабан» уырыссаг æвзагыл. Кæсджытæ базонгæ уыдзысты Тедеты Дзамболаты æмдзæвгæ «Уалдзæг» æмæ Æрыдоны 1-æм скъолайы ахуырдзау Хъараты Лейлæйы «Фыдæлты зæхх»-имæ дæр.

Ирыстоны фæсивæд сæхи хъæбатырæй æвдисынц Украинæйы хæсты æмæ сын ис стыр кад. Хъыгагæн, иутæ дзы тохы быдыры бацарæфтыд вæййынц, æмæ сын сæ ном хорзæн фæмысынц. Хæсты быдыры фæмард Цгъойты Ацæмæз дæр æмæ йын йæ  тохвæндагимæ кæсджыты зонгæ кæны Хъараты Ацæмæз йæ уац «Хъæбатыр салдат»-ы. «Ногдзау» дарддæр йæ кæсджыты зонгæ кæны Уæрæсейы регионты сабиты журналтимæ. Ныр та йæ уазæг у Цæцæны Республикæйы сывæллæтты журнал «Стела ад»  æмæ цæцæйнаг æвзонг авторы æмдзæвгæтæ уырыссаг æвзагыл мыхуыр кæны.

«Ногдзау»-ы ма кæсджытæ базонгæ уыдзысты ахæм æрмæджытимæ, куыд рубрикæ «Нæ хурты хуртæн»-ы аргъау «Дзураг тути Туту», «Базон-базонтæ», «Ахуыр кæнæм мадæлон æвзаг», «Ирыстоны зайæгойтæ æмæ цæрæгойтæ», «Дидинджытæ», «Æмбисæндтæ», сканворд, дзырдбыд æмæ æндæр ахæмтимæ. Журнал аивадон æгъдауæй сфæлгонц кæныныл хорз бакуыстой нывгæнджытæ Айларты Владимир, Брызгалов Марат, Абайты Аркъади, Цомайты Аллæ æмæ Кодзаты Аидæ.

                                                                                ХУЫБИАТЫ Никъала

 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.