Рæхджы нæ республикæйы æппæт скъолаты дæр фæндзæм кълæсты онг ахуырдзау фæсивæдæн байуардзысты ногазон лæвæрттæ. Уый тыххæй нын фехъусын кодта Республикæ Хуссар Ирыстоны Ахуырад æмæ зонады министрады техникон ифтонгады хайады хистæр Тедеты Аленæ. Уый нын куыд загъта, уымæ гæсгæ ацы аз ногазон лæвæрттæ бацæттæ кодтой 9914 сывæллонæн. «Бирæ нал баззад Ног азы бæрæгбонмæ. Уымæ гæсгæ нæ министрад развæлгъау бацæттæ кæнынц сывæллæттæн лæвæрттæ. Ногазон лæвæрттæ байуардзысты республикæйы æппæт скъолаты 1-5-æм кълæсты ахуырдзаутæн, æмæ скъолайы агъоммæйы кары сабитæн. Уыцы ногазон лæвæрттæй 100 бæрц уæрст æрцæудзысты Президентон назбæласы мадзалы рæстæджы, кæцы традицимæ гæсгæ уагъд фæцæуы нæ горæты сывæллæтты сфæлдыстадон галуаны. Алы аз дæр нæ республикæйы Президенты резервон фондæй рахицæнгонд æрцæуынц æхцайы фæрæзтæ æмæ уыдонæй сывæллæттæн балхæнæм лæвæрттæ. Ацы аз мадзæлттæ уагъд куыдæй цæудзысты, уый нырма бæстонæй нæ зонæм. Ног къуырийы райдианты мах санэпидемстанцы кусджытимæ бацæудзыстæм æмæ сбæрæг кæндзыстæм адджинæгты æмгъуыд. Специалисттæ куы аскъуыддзаг кæной æмæ куы зæгъой хорз сты, зæгъгæ, ис сын сывæллæттæн радтæн, уæд ахуырадон уагдæттæн фехъусын кæндзыстæм, цæмæй сæ лæвæртты аласой. Стæй сæ уыдон куыд æмæ кæд уарой сывæллæттыл, уый сæхæдæг аскъуыддзаг кæнынц. Раздæр-иу сæ байуæрстой ногазон мадзæлтты рæстæджы, ныр карантинмæ гæсгæ хъуыддаг фæивта. Ахуыргæнæн уагдæттæн сæ бон уыдзæнис æртыццæгæй фæстæмæ министрадæй сæ лæвæрттæ аласын», – загъта министрады кусæг.
2020-12-14
Comments are closed, but trackbacks and pingbacks are open.