Ног азы æрбалæудмæ алчи дæр фенхъæлмæ кæсы, уымæн æмæ алкæйы дæр фæуырны, аивгъуыйгæ азæй сын æрцæугæ ног аз æнтыстджындæр аз кæй уыдзæн, йемыдзыг кæй уыдзæн алыгъуызон æвæрццаг цаутæй.

29-æм декабры Ног азы бæрæгбон цытджын æгъдауæй банысан кодтой Ленингоры районы Цъинагары зонæйы хъæутæ – Абреу, Дзукъатыхъæу, Цъинагар æмæ Гдулеты хъæуты цæрджытæ. Уыдон æрбацыдысты Цъинагары Культурæйы хæдзармæ ногазон концертмæ бакæсынмæ. Ацы комбæстæм фæуазæг сты цхинвайлаг зарæггæнджытæ Багаты Шота, Дыгъуызты Сабинæ æмæ  Харебаты Вадим Тасойты Игоры сæргълæудæй, афтæ ма долиты къорд Дудайты Константины къухдариуæгадæй.

Æрæмбырдуæвджытæн ногазон арфæтæ ракодтой Тасойты Игорь æмæ Ленингоры районы администрацийы культурæйы хайады хистæр Битарты Бессарион. Концерты хайад райстой Цъинагары Культурæйы хæдзары хæдархайгæ къорды хайадисджытæ. Бацæттæ сæ кодтой Гус-сойты Ласко æмæ Бестауты Емзар. Сценæйыл уазджытæ æмæ фысымтæ кæрæдзи ивтой, раст цыма кæрæдзиимæ ерыс кодтой, чи хуыздæр азардзæн æмæ акафдзæн, уыйау. Сценæмæ-кæсджытæ сыл æмбæлдысты тыхджын къухæмдзæгъдимæ, уæлдайдæр та – цхинвайлаг уазджытыл.

 Куыд æрвылаз, афтæ та ныр дæр  Цъинагары  хъæуы бынæттон администрацийы раз æвæрд æрцыд рæсугъд наз бæлас. Наз бæласы цурмæ æрбацæуынц комбæсты фæсивæд æмæ сæ хъæлдзæг хъæлæба дардмæ фæхъуысы.

Уыцы бон Цъинагары Культурæйы хæдзармæ уыйбæрц адæм æрбамбырд æмæ дзы, æгæрыс-тæмæй, алкæмæн бынат дæр не сфаг. Цæрджытæй бирæтæ ногазон мадзалмæ æрбацыдысты сæ чысыл сабитимæ дæр. Концертæй райгондæй баззадысты  комбæсты цæрджытæ æмæ хорз зæрдæйы равгимæ здæхтысты сæ хæдзæрттæм.

Банысан кæнын хъæуы уый дæр, æмæ сын ногазон мадзал ауадзынæн финансон фæрæзтæй кæй баххуыс кодта Ленингоры районы администрацийы сæргълæууæг Мамытаты Витали, афтæ ма сын балæвар кодта ногазон хъазæнтæ дæр, кæцытæй сфæлындзыдтой наз бæлас. Уый размæ та Цъинагары Культурæйы хæдзары хæдархайгæ къорды фæхуыдтой Ленингоры поселочы ногазон концертмæ, цыран сын бакодтой ногазон лæвæрттæ. Зæгъын ма хъæуы уый дæр, æмæ Цъинагары культурæйы хæдзары хæдархайгæ къордæн хорз æнтыстытæ кæй ис, уымæ гæсгæ къорды авд хайадисæджы Гуссойты Ласкоимæ  фæхуыдтой Мæскуыйы уагъдцæуæг фестивалмæ.

УАЛЫТЫ Зоя,

РХИ-йы

Культурæйы сгуыхт кусæг

Ацы æрмæджытæ дæр бакæс:

Кусæгон балц – Ленингоры районы хъæутæм Default ThumbnailЛенингоры районы администрацийы ног сæргълæууæг фембæлд Цъинагары зонæйы хъæуты цæрджытимæ Республикæйы къухдариуæгад дарддæр дæр здахдзæнис æмбæлон хъусдард Ленингоры районмæ Default ThumbnailФаг у цъыфкалæн æмæ хахуыртæ кæнынæн Мысæн мадзал — Цъинагары хъæуыМысæн мадзал — Цъинагары хъæуы

Comments are closed, but trackbacks and pingbacks are open.