Ног азы бæрæгбон уæлдай уарзондæр у алкæмæндæр, уæлдайдæр та сывæллæттæн. Уыдонæй бирæты уырны, æцæгæйдæр Митын Дада кæй уæвынад кæны, уый æмæ йæм æнæрхъæцæй фенхъæлмæ кæсынц ногазон лæвæрттæм. Ног азы цытæн уагъд фæцæуынц алыгъуызон мадзæлттæ. Уыдоны, сæйраджыдæр, фæуадзынц декабры мæйы кæрон, фæлæ Цхинвалы Æвзæнгты республикон библиотекæйы кусджытæн та сæ директор Тототы Ленæйы сæргълæудæй традицион ссис Зæронд Ног азы бæрæгбон цытджын æгъдауæй нысан кæнын.
Ныр дæр та уыд афтæ. 11-æм январы Æвзæнгты республикон библиотекæмæ æрбамбырд бирæ уазджытæ. Уым уагъд æрцыд бæрæгбонон мадзал «Ногазон калейдоскоп» Зæронд Ног азы цытæн. Ацы хатт та библиотекæйы уазджытæ уыдысты Ирыстоны чысыл хуртæ. Мадзал сорганизаци кодтой библиотекæйы кусджытæ сæ директоры сæргълæудæй æмæ Цхинвалы 6-æм астæуккаг скъолайы 1 «б» къласы ахуыргæнинæгтæ сæ ахуыргæнæг Гæбæраты Мадинæйы къухдариуæгадæй, семæ ма уыд ахуырадон уагдоны ахуыры хайы сæргълæууæг Дыгъуызты Лианæ дæр.
Мадзалмæ фæуазæг сты РХИ-йы Культурæйы министры хæдивæг Дзеранты Джульеттæ, ацы министрады библиотекæты куысты фæдыл сæйраг специалист Дриаты Нателæ, горæты библиотекæты минæвæрттæ æмæ сывæллæтты ныййарджытæ. Библиотекæйы стыр зал уыд бæрæгбонвæлыст. Залы хъуыстысты музыкæйы æхцон зæлтæ. Æрæмбырдуæвджыты цæстæнгас йæхимæ здæхта залы æвæрд рæсугъдвæлыст Назбæлас. Ногазон мадзал байгом кодта уагдоны сæргълæууæг Тототы Ленæ. Уый зæрдæбын арфæтæ ракодта æрæмбырдуæвджытæн, бафæндыд æй уыдонæн царды иууыл хуыздæр фæндиæгтæ. Загъта, зæгъгæ, абон фыццаг хатт нæ библиотекæйы уазджытæ сты 1-æм къласы ахуырдзаутæ, æмæ, зæгъ, Хуыцау зæгъæд æмæ нырæй фæстæмæ уыдон цы уой нæ уагдоны æдзухон уазджытæ. Бузныджы ныхæстæ загъта Дыгъуызты Лианæйæн, дæргъæвтин азты дæргъы иумæ æнгом куысты тыххæй.
Ахуыргæнинæгтæ сæххæст кодтой ногазон зарджытæ, акафыдысты алыгъуызон кæфтытæ. Фыццагкъласонтæ иууылдæр кæд тырныдтой æмдзæвгæтæ хорз бакæсынмæ, зарджытæ иттæг хорз азарынмæ, кæфтытæ хорз сæххæст кæнынмæ, уæддæр мæ уæлдай тынгдæр рахицæн кæнын фæнды Уазæгты Амагæ, Саккаты чысыл чызджы æмæ Хуыгаты Георгийы. Уыдон сæ номыртæ æххæст кодтой тынг аив. Тынг цымыдисон рауадысты инсценировкæтæ «Золушка» (Золушкайы роль сæххæст кодта Уазæгты Амагæ), «Заяц и медведь» (Арсы роль сæххæст кодта Хуыгаты Георги), «Почтальон Печкин», «Волк и лиса», «Снеговик», «Снегурочка и Баба-Яга», «Зимушка» æмæ æндæртæ. Мадзалы æрæм-бырдуæвджыты раз æмдзæвгæтæ кæсынæй йæ арæхстдзинад равдыста грекъаг чысыл уазæг чызг, кæцы ногазон улæфтыты уазæгуаты æрцыд йæ нана Дзеранты Джульеттæмæ.
«Ногазон калейдоскоп»-ы уагъд æрцыд лоторея дæр. Библиотекæйы кусджытæ гæххæттыл фыстæй номыртæ байуæрстой сывæллæттыл æмæ уыдонæй призон номыртæ кæмæ æрхаудысты, уыцы сывæллæттæ райстой ногазон лæвæрттæ. Æмткæй залы уæвæг ахуыргæнинæгтæй алкæцыйы дæр уагдоны кусджытæ суазæг кодтой адджинæгтæй. Сывæллæтты ныййарджытæн та уагдоны кусджытæ балæвар кодтой фыссæг Хъазиты Мелитоны фыст чингуытæ, кæцытæ сын сæрмагондæй æрбарвыста Ирыстоны Фысджыты цæдисы æмсæрдар йæхæдæг. Бузныджы ныхæстæ зæгъын æмбæлы фыццагкъласонты ахуыргæнæг Гæбæраты Мадинæйæн йæ чысыл ахуырдзаутимæ афтæ хорз кæй бакуыста, уый тыххæй.
Уадз, алкæмæндæр Ног 2019 аз амондджын аз фæуæд!
ДЖИОТЫ Екатеринæ
Comments are closed, but trackbacks and pingbacks are open.