Хуссар Ирыстоны республикон радио уарзон у йӕ хъусджытӕн. Эфиры райхъуысынц нӕ республикӕйы ӕрцӕугӕ ног хабӕрттӕ, ӕндӕр ӕмӕ ӕндӕр фарстыты фӕдыл цымыдисон ралӕвӕрдтӕ.
Кӕй зӕгъын ӕй хъӕуы, радиойӕн ноджыдӕр бирӕ табугӕнджы-тӕ уаид, алы бынатмӕ дӕр куы хӕццӕ кӕнид йӕ уылӕн, уӕд. Фӕлӕ, хъыгагӕн, уый нырмӕ афтӕ нӕу, фӕлӕ нӕ ныфс ис, сомбон уыцы ахсджиаг фарст дӕр ӕвӕрццагӕй скъуыддзаг кӕй ӕрцӕудзӕн. Нӕ радиойы алӕвӕрдтӕм стыр ӕхсызгонӕй кӕй фӕхъусынц нӕ цӕрджытӕ, уымӕн ӕвдисӕн у уый дæр, æмæ фӕстаг рӕстӕджы эфиры куынæуал хъуыст йæ хъӕлӕс, уæд нӕ радиомӕхъусджытӕн нал уыд ӕрӕнцой, тыхстысты, кӕд та скусдзӕн ӕмӕ йын йӕ ралӕвӕрдтӕм кӕд уыдзӕн байхъусыны фадат.
Ацы бонты нӕ горӕты цӕрджытӕн сӕххӕст сӕ бӕллиц – ногӕй та айзӕлыд «Ир» FМ-ы хъӕлӕс. Нӕ радио кӕй нал зӕлыд эфиры, уыцы аххосаг базоныны тыххӕй бахатыдтӕн телерадиоралӕвӕрды хызӕджы къухдариуӕггӕнӕг Челӕхсаты Вячеславмӕ ӕмӕ уый афтӕ радзырдта:
– Хуссар Ирыстоны радио «Ир»-ы ифтонгæдтæ сты рагон, базӕронд сты ӕмӕ уый фӕстиуӕгӕн арӕх хӕлынц. Зындгонд куыд у, афтӕмӕй передатчиктӕн сӕ куысты ӕмгъуыд у иууыл фылдӕр 5 азмӕ. Афтӕмӕй та нӕ радиойы передатчиктӕ кусынц 2008-2009 азтӕй фӕстӕмӕ. Челӕхсайы фырт куыд банысан кодта, уымӕ гӕсгӕ рӕхджы бадзырд хъуамӕ саразой радиойы разамындимӕ ӕмӕ сын цы лӕггад кӕнынц, уый тыххӕй телерадиоралӕвӕрды хызӕгӕн ӕхцайы фӕрӕзтӕй чысыл уӕддӕр ӕххуыс кӕной. Радиойӕн мах эфир дӕттӕм нӕхи тыхтӕ ӕмӕ фӕрӕзтӕй. Иф-тонггæрзты куыстæввонгæй дарыны тыххæй хардз кӕнӕм нæхи фæрæзтæ. Зӕгъӕм, передатчик фехӕлд, уӕд ӕй аразынмӕ ӕрвитӕм Цӕгат Ирыстонмӕ, уымӕн ӕмӕ махмӕ ахӕм специалист нӕй, стӕй нын бар нӕй уыдонмӕ бавналынӕн дӕр. Иудзырдӕй, Челӕхсайы фырты ныхӕстӕм гӕсгӕ, бадзырд куы саразой, уӕд нӕ радиойы куысты нал уыдзӕн къуылымпытӕ ӕмӕ эфиры ӕдзухдӕр зӕлдзӕн йӕ хъӕлӕс.
Хуыбиаты Никъала
Comments are closed, but trackbacks and pingbacks are open.