Нæ республикæйы цæрджытæ ныридæгæн хорз зонгæ сты æвзонг чызг Хетæгкаты Викторияйы сфæлдыстадимæ. Сыгъзæрин зæрдæйы хицау, йæ рæсугъд зардæй балхæдта адæмы зæрдæтæ, уарзынц ын йе сфæлдыстад, йæ цардбæллондзинад.
Ацы бонты рацыд Викторияйы ног патриотон зарӕг «Я вернусь». Музыкæ ӕмӕ ӕмдзӕвгӕты автор у Бирæгъты Маргаритæ. Авторы ныхæстæм гæсгæ зарæг ныффыссыны идеяйы фарс рахæцыд Парламенты депутат Мулдарты Гарри æмæ йын бакодта финансон æххуыс дæр.
Зарӕг у куывд Хуыцаумӕ ӕмӕ ныстуан фӕсивӕдмӕ, ирон лæппуты фарс балæууыны тыххæй, кæцытæ хайад исынц Украинæйы сæрмагонд æфсæддон операцийы æмæ ма хъуамӕ рох кӕной нӕ кадджын фыдӕлтӕ ӕмӕ нӕ зынгхуыст хъайтарты. Æнкъард зарӕг у, фӕлӕ йӕм дзӕбӕх куы байхъусай, уӕд дзы ис бирӕ позитив.
Ныридӕгӕн зарӕгмӕ байхъусӕн ис социалон хызӕгты дæр, фӕстӕдӕр та йын бацӕттӕ кӕндзӕн клип.
Виктория, æрыгон уæвгæйæ, Ирыстонæн йæхи бауарзын кодта йæ зарджытæй. Уый æрмæст уникалон хъæлæсы хицау нæу, фæлæ ма у цæвиттойнаг хæрзæгъдауы миниуджытыл хæст дæр.
Афтæ мæм фæкæсы, цыма аивадимæ баст адæм бынтон æндæргъуызон сты удыхъæдæй æмæ уагæй. Аивадимæ баст адæймагæн йæ хъуыдытæ æвзæр никуы уыдзысты. Аивад куыд рæсугъд у, афтæ рæсугъд вæййы сæ миддуне дæр.
Уæдæ йын мах цæст дæр уарзы, цæмæй кæддæриддæр цæуа стыр аивады уæлахизы фæндæгтыл, уа йын ноджы фылдæр сфæлдыстадон æнтыстытæ.
Дриаты Лейла
