Ног фатерты фæзуат уыдзæн стырдæр

2017 азæн Инвестицион программæ реализаци кæныны фæлгæтты нæ горæты Хъайтарты уынджы кæрон арæзт цæуынц ног муниципалон хæ-дзæрттæ, цыран уыдзæн 200 фатеры.

Ног цæрæн комплексы уыдзæн 13 фондзуæладзыгон секцион корпусы, кæцытæ кæрæдзиимæ баст æрцæудзысты. Уыдоны уыдзæн фæхуыздæргонд планировкæйы 80 – иухатæнон, 6-дыууæхатæнон, 55-æртæхатæнон æмæ 5 -цыппархатæнон фатеры. Арæзтады иумæйаг фæзуат уыдзæн 3369 квадратон метры, фатерты – 1090 кв.метры.

Компани «СТМ-Юг»-ы генералон директор Гæджиты Игоры ныхæстæм гæсгæ, абоны бонмæ объекты активон режимы æххæст цæуынц пластикæй арæзт рудзгуытæ æмæ дуæрттæ сæвæрыны куыстытæ.

«Гъæдджын пластикæй арæзт рудзгуытæ æмæ дуæрттæ вæййынц фидар æмæ фæлæууынц дæргъвæтин азты дæргъы. Фæразынц тæвдады фæивд-тытæн дæр. Уыцы иурæстæджы уыдон сты рæсугъд. Уымæ гæсгæ пластикæй арæзт рудзгуытæ æмæ дуæрттæ монтаж кæныны рæстæджы мах пайда кæнæм æрмæстдæр иууыл хуыздæр æмæ нырыккон æрмæджытæй, кæцытæ сын ифтонг кæнынц сæ фидардзинад æмæ рæсугъд хуыз», – банысан кодта Гæджиты Игорь.

Уый ма куыд банысан кодта, уымæ гæсгæ цæрæн комплексы сты фондзуæладзыгон цæрæн хæдзæрттæ, кæцытæй сæ иу у астбахизæнимæ, дыккаг та – фондзбахизæнимæ. Ныртæккæ куыстытæ æххæст цæуынц, астбахизæны кæм ис, уыцы хæдзары. Уым кусджытæ æххæст кæнынц электромонтажон æмæ сантехникон куыстытæ.

«Сантехникон куыстытæ сты ахæм: донуадзæн, канализацион æмæ хъæрмадон хæтæлты монтаж, хинайæн хатæнмæ сантехникæ баиу кæнын æмæ бирæ æндæртæ», – загъта уый.

Ныртæккæ объекты кусы 78 адæймаджы æмæ 10 иуæджы уæззау техникæ. Цæрæн комплекс æххæстæй раттын плангонд у 2018 азы.

Дунеон информацион агентад ХУССАР ИРЫСТОН АБОН