Нæ горæты Театралон фæзуат æмæ фонтан уыдысты, нæ адæмы уарзондæр бынат.
Фонтан æвæрд æрцыд 1982 азы. Уый æппынæдзух нæ куыста, фæлæ-иу æрмæстдæр республикæйы исты бæрæг-бон нысан куы цыд, уæд. Фæстæдæр йæ куысты фæзынд згъуыдтæ – фонтанмæ нал цыд дон. Драмон театры бæстыхайы арæзтадмæ куы æрæвнæлдтой, уæд фонтан дæр пырх æрцыд. Цхинвалы центры фæстæмæ фонтан сæвæрын кæй хъæуы, уымæ тынг бæллыдысты цæрджытæ. Фылдæр-бæрцæй адæм домдтой, цæмæй фонтан арæзт æрцæуа йæ раздæры бынаты.
Фонтан саразыны хæс йæхимæ райста, драмон театры бæстыхайы арæзтадыл цы фирмæ куыста, уый. Арæзт ын æрцыд проект. Фыццаг хъавыдысты классикон æртæярусон фонтан саразынмæ, фæлæ бирæ дискусситы фæстæ равзæрстой хуыздæр вариант – ома «сур» фонтан.
«Мах аскъуыддзаг кодтам раздæры фонтаны æнгæс саразын. Арæзт æрцæудзæн, «сур» фонтантæ кæй хонæм, уыцы проектмæ гæсгæ. Уый уыдзæн Цæгат Кавказы иууыл стырдæр «сур» фонтан. Алайнаг орнамент æмæ симды музыкæйы зæл-тимæ. Проекты аргъ у 23 милуан сомы. Уыцы æхцайы фæрæзтæ хицæн хъуамæ æрцыдаиккой Паддзахадон драмон театры арæзтады иу-миаг хыгъдæй», – зæгъы Арæзтад æмæ архитектурæйы ми-нистр.
Афтæмæй арæзтадон фирмæ «Эверест» фонтаны арæзтадмæ куы бавнæлдта, уæд райдианы дæр, бæрæг уыд фонтаны конструкцийæн йæ кæцыдæр хæйттæ цух кæй сты. Уый фæдыл аразджытæн рæстмæ сæ бон не ссис фонтан смонтаж кæнын. Арæзтадон фирмæ фехъусын кодта фонтан заказ кæм æрцыд, уырдæм. Бадзырдмæ гæсгæ йæ аразæг дæтты гаранти æмæ хæсджын у, цæмæй йæ къуыхцытæ бараст кæна, фæлæ уый нырма къухы нæ бафтыд. Раст уый аххосæй фонтаны арæзтад хаст æрцыд 2019 азы Инвестпрограммæмæ æндæр арæзтæдтимæ иумæ.
Уæдæ нæ ныфс уыдзæн, æввахс рæстæджы Театралон фæзуаты цы фонтан арæзт æрцæудзæн, уый æхцондзинад кæй хæсдзæн нæ цæрджытæн.
Уазæгты Марфа
Comments are closed, but trackbacks and pingbacks are open.